Nehemías 1 - Beibel na Papiamentu Koriente 2013

Orashon di Nehemías pa e israelitanan

¹ Relato di Nehemías, yu di Hakalías. Den luna di Kisleu den e di binti aña di gobernashon di rei Artaxèrxès di Persia, ora ami, Nehemías, tabata den fòrti Susan,

² un di mi rumannan, Hanani, huntu ku algun otro hòmber a bini for di Huda. Mi a puntra nan pa e hudiunan ku a bolbe for di den eksilio i tambe kon kos tabata na Herusalèm.

³ Nan a kontestá mi: ‘E sobrá hudiunan ku a bolbe kas den provinsia Huda, ta den situashon penoso i humiliante. E muraya di Herusalèm ta bashá abou i kandela a destruí e portanan.’

⁴ Ora mi a tende esaki, mi a sinta yora i tene luto dianan largu. Tambe mi a yuna i mi a resa na Dios di Shelu.

⁵ Mi a bis'É: ‘Ai SEÑOR, Dios di Shelu, Dios grandi i temibel, Bo ta mantené bo aliansa, Bo ta keda fiel na esnan ku ta stima Bo i ta kumpli ku bo mandamentunan!

⁶ Mi ta roga Bo: No kita bo bista for di bo sirbidó. Skucha ku atenshon e orashon ku mi ta dirigí na Bo di dia i anochi, pa e israelitanan ku ta bo sirbidó. Mi ta rekonosé ku nos, israelita, a peka kontra Bo; ami i mi famia tambe a peka.

⁷ Nos a ofendé Bo gravemente. Nos no a kumpli ku e mandamentunan, e leinan i e dekretonan ku Bo a duna pa medio di bo sirbidó Moises.

⁸ Kòrda loke Bo a ordená Moises. Bo a bisa: “Si boso ta infiel, lo Mi plama boso den e nashonnan,

⁹ pero si boso bolbe serka Mi i biba segun mi mandamentunan, lo Mi reuní boso i hiba boso na e lugá ku Mi a skohe pa manifestá mi presensia, ounke boso ta plamá te den e partinan di mas leu di mundu.”

¹⁰ SEÑOR, e israelitanan ta bo pueblo, bo sirbidó; ku man fuerte i ku poder Bo a salba nan.

¹¹ Ai Señor, skucha ku atenshon orashon di bo sirbidó i di esnan ku ta respetá Bo i ta adorá Bo di kurason. Laga bo sirbidó logra su plannan i laga ku rei ke mi bon.’ E tempu ei mi tabata sirbidó di biña na mesa di rei.