Mateo 27 - Beibel na Papiamentu Koriente 2013

Nan ta hiba Hesus serka Pilato

¹ Mainta trempan tur e saserdotenan importante i e ansianonan a reuní pa plania morto di Hesus.

² Despues nan a laga bui Hesus i entreg'É na Pilato, e gobernador romano.

Morto di Hudas

³ Ora Hudas, ku a traishoná Hesus, a haña sa ku nan a konden'É, el a haña duele di loke el a hasi i el a hiba e trinta monedanan di plata bèk pa e saserdotenan importante i e ansianonan.

⁴ El a bisa nan: ‘Mi a entregá un hòmber inosente na morto; mi a hasi piká.’ Nan a kontest'é: ‘Kiko esei tin di aber ku nos? Esei ta bo problema!’

⁵ Hudas a tira e monedanan di plata den tèmpel, i sali bai horka su kurpa.

⁶ E saserdotenan importante a kohe e monedanan i bisa: ‘Esaki ta plaka manchá ku sanger; ta kontra nos lei pa pon'é den kamber di tesoro di tèmpel.’

⁷ Despues di a yega na un akuerdo, nan a usa e sèn pa kumpra kunuku di e trahadó di wea di rikla pa dera strañero.

⁸ P'esei te dia djawe e tereno a keda ku e nòmber ‘tereno di sanger’.

⁹ Asin'ei e palabranan akí di profeta Yeremías a keda kumplí: ‘Nan a kohe e trinta monedanan di plata, e suma ku algun hende di Israel a palabrá pa paga p'e

¹⁰ i a usa e plaka ei pa kumpra e tereno di e trahadó di wea di rikla, manera Señor a manda mi.’

Pilato ta interogá Hesus

¹¹ Awor Hesus tabata pará dilanti di e gobernador romano. El a puntra Hesus: ‘T'abo ta rei di hudiu?’ Hesus a kontest'é: ‘Manera bo di.’

¹² Tanten e saserdotenan importante i e ansianonan tabata akus'É, E no a kontestá nada.

¹³ Pilato a bis'É: ‘Bo no ta tende kuantu kos nan ta akusá bo di dje?’

¹⁴ I pa su gran asombro, Hesus no a kontestá niun pia di palabra.

Nan ta kondená Hesus na morto

¹⁵ Tabata kustumber ku tur fiesta di Pésag gobernador romano tabata duna un prezu, ku e pueblo skohe, libertat.

¹⁶ Tabatin un hòmber di mal reputashon, yamá Hesus-Bárabas, será den prizòn.

¹⁷ Ora e multitut a bini huntu, Pilato a puntra nan: ‘Ken boso ke mi pone den libertat Hesus-Bárabas òf Hesus yamá Mesias?’

¹⁸ Pilato tabata sa mashá bon ku ta pa yalurs e lidernan a entreg'é Hesus.

¹⁹ Segun Pilato tabata sintá den sala di hustisia pa dikta sentensia, su kasá a manda e rospondi akí p'e: ‘Sòru pa bo no tin nada di aber ku e hòmber inosente ei, ayera nochi mi a sufri hopi durante un soño pa su motibu.’

²⁰ Ma e saserdotenan importante i e ansianonan a instigá e multitut pa pidi libertat pa Bárabas i pa laga mata Hesus.

²¹ E gobernador a bolbe puntra: ‘Ken boso ke pa mi duna libertat antó?’ E hendenan a kontestá: ‘Bárabas!’

²² ‘Kiko boso ke antó pa mi hasi ku esun ku nan ta yama Mesias?’ Nan tur a grita komo kontesta: ‘Krusifik'é!’

²³ Pilato ta puntra: ‘Ta ki delito el a kometé antó?’ Pueblo a grita mas duru ainda: ‘Krusifik'é!’

²⁴ Pilato a mira ku e no tabata logra nada; al kontrario e bochincha tabata pió. P'esei el a kohe poko awa, laba su man dilanti di e multitut i bisa: ‘Mi no ta karga responsabilidat pa dramamentu di sanger di e hòmber akí. Awor ta boso problema!’

²⁵ Tur hende a grita: ‘Laga pa su sanger kai riba nos i riba nos yunan!’

²⁶ E ora ei Pilato a laga Bárabas liber i despues di laga bati Hesus ku karbachi, el a entreg'É pa nan krusifik'É.

Nan ta hasi bofon di Hesus

²⁷ Sòldánan di gobernador a hiba Hesus den palasio di gobernador i a reuní ku e otro sòldánan di e grupo.

²⁸ Nan a kita Hesus su paña i bistiÉ un mantel, koló kòrá kimá.

²⁹ Nan a flèktu un korona di sumpiña pone riba su kabes i a dun'É un pida palu tene den su man drechi. Despues nan a hinka rudia pa Hesus, hasi bofon di djE i bisa: ‘Biba rei di hudiu!’

³⁰ Nan a skupiÉ den su kara, kohe e pida palu dal E riba su kabes.

³¹ Despues di hasi bofon di djE asin'ei, nan a kita e mantel, bistiÉ su mes pañanan i a bai kunÉ pa krusifik'É.

Nan ta krusifiká Hesus

³² Ora nan tabata sali for di siudat, nan a topa un hòmber di Sirene ku yama Simon, i e sòldánan a oblig'é karga e krus di Hesus.

³³ Nan a yega na un lugá yamá Gólgota, loke ta nifiká: ‘fèlt di karpachi’.

³⁴ Ei nan a duna Hesus bebe biña bruhá ku un supstansia marga, ma ora El a purb'é, e no ker a beb'é.

³⁵ Despues ku nan a krusifik'É, nan a parti su pañanan. Nan a tira dou pa wak kiko kada un ta haña di djE, [pa asina keda kumplí loke e profeta a bisa: Nan a parti mi paña entre nan i a tira dou pa mi mantel.]

³⁶ Sintá eibou nan tabata vigil'É.

³⁷ Riba su kabes nan a pone un bòrchi ku e motibu di su kondena; e bòrchi tabata bisa: ‘Esaki ta Hesus, rei di hudiu’.

³⁸ Despues nan a krusifiká dos ladron banda di Hesus; un na su man drechi, un na su man robes.

³⁹ E hendenan ku tabata pasa eibanda tabata sakudí kabes i zundr'É;

⁴⁰ nan tabata bisa: ‘Abo ku ker a destruí tèmpel i konstruyé den tres dia, salba bo mes, si bo ta Yu di Dios, i baha for di krus!’

⁴¹ Meskos asina e saserdotenan importante tambe tabata hasi bofon di djE huntu ku e dòktornan di lei i e ansianonan; nan tabata bisa:

⁴² ‘Otro hende e por a salba, ma e mes e no por salba! Laga e rei di Israel ei baha awor akí for di e krus ei, no! E ora ei sí nos ta kere den dje!

⁴³ E ta konfia den Dios; wèl laga Dios salb'é awor, si Dios ke. E no a bisa: “Mi ta Yu di Dios?”’

⁴⁴ E ladronnan ku tabata krusifiká banda di djE tambe tabata insult'É.

Hesus ta muri na krus

⁴⁵ For di diesdos or te tres or, skuridat a tapa henter e pais.

⁴⁶ Banda di e di nuebe ora, Hesus a dal un gritu duru: ‘Eli, Eli, lama sabagtani?’ Esei ta nifiká: ‘Mi Dios, mi Dios, pakiko Bo a bandoná Mi?’

⁴⁷ Algun hende pará einan ku a skuch'É, a bisa: ‘Tend'é ei! At'é ta yama Elías!’

⁴⁸ Mesora un di nan a kore bai kohe un spòns, dòp e den biña zür barata, pon'é na un pida palu i a duna Hesus bebe.

⁴⁹ E otronan a bisa: ‘Ban mira awor si Elías ta bin salb'É!’

⁵⁰ Hesus a bolbe dal un gritu duru, i a entregá su spiritu.

⁵¹ Mesora e kortina den tèmpel a sker na dos, di ariba te abou. Tera a sakudí i baranka a sker.

⁵² Graf a habri i hopi kreyente ku a muri a biba bèk.

⁵³ Nan a sali for di e grafnan i despues ku Hesus a lanta for di morto, nan a drenta Herusalèm, e siudat santu, i a aparesé na hopi hende.

⁵⁴ Ora e kapitan romano i esnan ku tabata vigilá Hesus huntu kuné a sinti e temblor i a mira loke a pasa, nan tabata morto spantá i nan a bisa: ‘Enberdat e hòmber akí ta Yu di Dios!’

⁵⁵ Tabatin hopi muhé ku djaleu tabata para wak kiko tabata pasa. Nan tabata sigui Hesus for di Galilea pa nan sòru p'E.

⁵⁶ Maria Magdalena, Maria, mama di Hakobo i Hosé, i mama di e yunan di Zebedeo tambe tabata den e grupo.

Nan ta dera Hesus

⁵⁷ Ora nochi a sera, un hòmber riku di Arimatea, yamá Hosé, ku tambe tabata un disipel di Hesus, a yega.

⁵⁸ El a bai pidi Pilato kurpa di Hesus. E ora ei Pilato a duna òrdu pa nan entregá Hosé e kurpa.

⁵⁹ Hosé a kohe e kurpa, lor'é den un paña nobo di lenen

⁶⁰ i pon'é den su mes graf. Tabata un graf nobo, ku el a laga koba den baranka. Despues el a lora un barank'i piedra pone na boka di e graf i bai.

⁶¹ Maria Magdalena i e otro Maria tabata sintá einan, ku kara p'e graf.

E guardia dilanti di graf di Hesus

⁶² Su siguiente dia, esta e dia despues di preparashon pa sabat, e saserdotenan importante i e fariseonan a bai huntu serka Pilato.

⁶³ Nan a bis'é: ‘Señor, nos ta kòrda kon dia e gañadó ei tabata na bida, el a bisa: “Riba e di tres dia, lo mi lanta for di morto”.

⁶⁴ Duna òrdu pa tuma medida di seguridat te e di tres dia. Pa su disipelnan no bin hòrta e kurpa i bisa ku el a lanta for di morto! E último mentira akí lo ta pió ku esun promé.’

⁶⁵ E ora ei Pilato a bisa nan: ‘Bai ku un grupo di sòldá pa tene warda; tuma boso medida di seguridat manera boso ta haña ta bon.’

⁶⁶ Nan a bai i despues di a seya e graf, nan a laga e sòldánan pa vigilá.