Mateo 10 - Beibel na Papiamentu Koriente 2013

Hesus ta skohe diesdos disipel

¹ Hesus a yama su diesdos disipelnan i duna nan poder pa saka spiritu malu i kura tur malesa i enfermedat.

² Esaki ta nòmber di e diesdos apòstelnan: promé ta Simon, yamá Pedro, i su ruman Andreas; Hakobo yu di Zebedeo i su ruman Huan;

³ Filipo i Bartolomeo; Tomas i Mateo e kobradó di belasting; Hakobo yu di Alfeo i Tadeo;

⁴ Simon e Zeloso i Hudas Iskariot, ku a traishoná Hesus.

Hesus ta manda su disipelnan bai prediká

⁵ Hesus a manda e diesdos hòmbernan akí sali bai ku e siguiente instrukshon: ‘No kohe kaminda di esnan ku no ta hudiu ni drenta siudat di e samaritanonan.

⁶ Mihó boso bai serka e karnénan pèrdí di pueblo di Israel.

⁷ Anunsiá durante boso biahe: “Reino di shelu ta serka!”

⁸ Kura esnan ku ta malu; lanta morto; kura esnan ku tin lepra i saka demoño for di esnan poseé. Pòrnada boso a risibí, pues duna pòrnada tambe.

⁹ No biaha ku plaka, sea ta moneda di oro, di plata òf di bròns, den boso saku.

¹⁰ No bai ku saku di biahe pa kaminda, ni ku paña èkstra, ni ku sandalia, ni ku garoti. Pasobra un trahadó ta meresé su pan di kada dia.

¹¹ Ora boso drenta kualke siudat òf pueblo, investigá ken einan ta digno di risibí boso i keda serka dje te ora boso bai for di e lugá ei.

¹² Ora boso drenta e kas, kumindá e hendenan ku e saludo di pas.

¹³ Si e hendenan di e kas ta digno, laga e pas ku boso a deseá nan, baha riba nan i si e hendenan di e kas no ta digno, hala boso palabranan di pas atras.

¹⁴ I si kualke kas òf siudat nenga di risibí òf skucha boso, bandoná e lugá ei i sakudí boso pia kita stòf.

¹⁵ Mi ta sigurá boso: dia di huisio e kastigu pa e hendenan di Sódoma i Gomora lo ta ménos pisá ku e kastigu pa e hendenan di e siudat ei.

Lo bini kontratempu

¹⁶ Tende! Mi ta manda boso manera karné meimei di lobo; p'esei antó sea sabí manera kolebra i inosente manera palomba.

¹⁷ Tene kuidou ku hende. Nan lo kohe boso prezu i entregá boso na tribunal i bati boso ku karbachi den nan snoanan.

¹⁸ Nan lo hiba boso dilanti di gobernante i dilanti di rei pa mi motibu, pa asina boso ta un testimonio pa nan i pa e paganonan.

¹⁹ Ora nan entregá boso na tribunal, no preokupá di antemano kiko bisa òf kon papia. Ora e momento yega, boso lo risibí loke boso mester bisa.

²⁰ Pasobra no ta boso ta bisa nada e momento ei, ma ta Spiritu di boso Tata ta papia dor di boso.

²¹ Un ruman lo entregá otro ruman na outoridat pa nan mat'é. Tata lo hasi meskos ku nan yu. Yu lo rebeldiá kontra nan mayornan i laga mata nan.

²² Tur hende lo odia boso pa mi motibu, ma esun ku perseverá te na final lo keda salbá!

²³ Ora nan persiguí boso den un siudat, hui bai un otro. Mi ta sigurá boso: boso lo no pasa tur e siudatnan di Israel promé ku e Yu di hende bini bèk.

²⁴ Un disipel no ta riba su maestro ni un kriá no ta riba su shon!

²⁵ Pa un disipel mester ta sufisiente si e bira manera su maestro i pa e kriá si e bira manera su shon. Si kabes di kas mes nan a yama Belzebul, ki ta para pa su hendenan di kas?

No tene miedu

²⁶ P'esei no tene miedu di hende. Lo deskubrí tur loke ta tapá; lo saka tur sekreto pone na kla.

²⁷ Loke Mi bisa boso den skuridat, proklam'é di dia kla; loke bisa boso ketu ketu, grit'é na bos altu for di riba dak!

²⁸ No tene miedu di esnan ku por mata kurpa di hende, ma no por mata su alma sí; mas bien tene miedu di Dios ku tin poder pa destruí kurpa i alma den fièrnu.

²⁹ Dos para chikí ta kosta dos plaka, tòg? Ma niun di nan no ta kai na suela sin boso Tata ke.

³⁰ Pa loke ta trata boso, asta tur boso drachinan di kabei ta kontá.

³¹ P'esei no tene miedu, pasobra boso ta bal mas ku hopi para!

Konfesá Kristu dilanti di hende

³² Si kualke hende deklará públikamente ku e ta na mi banda, Mi tambe lo deklará dilanti di mi Tata ku ta den shelu, ku Mi ta na su banda.

³³ Ma ken ku nenga públikamente ku nan konosé Mi, Mi tambe lo nenga ku Mi konosé nan dilanti di mi Tata ku ta den shelu.

Konsekuensia di Hesus su binida

³⁴ No pensa ku Mi a bini riba mundu pa trese pas. Mi no a bin trese pas, ma guera.

³⁵ Pasobra Mi a bini pa laga: yu hòmber lanta kontra tata, yu muhé kontra mama i suegra kontra suegra grandi.

³⁶ Sí, hende su mes famia lo bira su enemigu.

³⁷ Esun ku stima su mama òf su tata mas ku Mi, no ta digno di pertenesé na Mi; esun ku stima su yu hòmber òf su yu muhé mas ku Ami, no ta digno di pertenesé na Mi.

³⁸ Esun ku no hisa su krus sigui Mi, no ta digno di pertenesé na Mi.

³⁹ Esun ku purba gana su bida, lo pèrd'é i esun ku pèrdè su bida pa mi motibu, lo hañ'é.

Rekompensa

⁴⁰ Esun ku risibí boso, ta risibí Mi i esun ku risibí Mi, ta risibí esun ku a manda Mi.

⁴¹ Esun ku risibí un profeta, pasobra e ta profeta, lo haña rekompensa di un profeta i esun ku risibí un hòmber hustu, lo haña rekompensa di un hòmber hustu.

⁴² Mi ta sigurá boso: ken ku duna maske ta un glas di awa friu na un di mi disipelnan mas chikí pasobra e ta mi disipel, lo no keda sin haña su rekompensa.’