Marko 3 - Beibel na Papiamentu Koriente 2013

Hesus ta kura hende riba dia di sabat

¹ Hesus a bolbe bai snoa i aya tabatin un hòmber ku un man mankaron.

² E fariseonan tabata blo wak Hesus pa mira si E ta kura e hòmber riba dia di sabat, pa nan por a haña algu pa nan akus'É di dje.

³ Hesus a bisa e hòmber: ‘Lanta bai para meimei.’

⁴ El a puntra e hendenan: ‘Kiko ta pèrmití riba dia di sabat? Hasi bon òf hasi malu? Salba bida di un hende òf akaso mata un hende?’ Nan a keda ketu.

⁵ Hesus a drei wak rabiá, ma na e mes momento E tabata sintiÉ tristu komo nan kurason tabata duru. El a bisa e hòmber ku e man mankaron: ‘Rèk bo man.’ E hòmber a rèk su man i su man a bira bon atrobe.

⁶ E fariseonan a sali pafó i mesora nan a bai traha plan ku e hendenan di Heródes pa wak kon por a kaba ku Hesus.

Hesus kantu di lago di Galilea

⁷ Hesus a retirá huntu ku su disipelnan bai kantu di lago di Galilea. Un kantidat grandi di hende for di Galilea a siguiÉ.

⁸ Ora nan a tende di e kosnan ku Hesus tabata hasi, hopi hende di e region di Hudea, di Herusalèm, di Idumea, di e teritorio na otro banda di Yordan, i di e region den bisindario di e siudatnan Tiro i Sidon, a bini serka djE.

⁹ El a bisa su disipelnan pa tene un boto kla p'E, en kaso ku E kore peliger ku e multitut basha bini riba djE.

¹⁰ Komo El a kura asina hopi hende, e hende malunan tabata pusha bini dilanti pa nan mishi kunÉ.

¹¹ Ki ora ku e mal spiritunan mir'É, nan tabata benta nan kurpa abou na suela i grita: ‘Abo ta e Yu di Dios.’

¹² Hesus tabata ordená nan severamente pa nan no propagá su nòmber.

Hesus ta skohe diesdos disipel

¹³ Hesus a subi seru i a yama esnan ku E tabata ke i nan a bini serka djE.

¹⁴ Asina El a forma un grupo di diesdos ku El a yama ‘apòstel’. El a skohe nan pa nan kompañ'É i pa manda nan prediká,

¹⁵ ku poder pa saka demoño.

¹⁶ E diesdosnan tabata: Simon, ku El a yama Pedro,

¹⁷ Hakobo yu di Zebedeo i su ruman Huan; nan dos El a yama ‘Boanerges’, loke ta nifiká: yunan di bos; ademas

¹⁸ Andreas, Filipo, Bartolomeo, Mateo, Tomas, Hakobo yu di Alfeo, Tadeo, Simon e Zeloso

¹⁹ i Hudas Iskariot, esun ku a traishoná Hesus.

Hesus i Belzebul

²⁰ Hesus a bai kas. E bia akí atrobe hopi hende a bini huntu serka djE di manera ku Hesus i su disipelnan ni sikiera a haña chèns di kome pida pan.

²¹ Ora su hendenan a tende kiko tabata pasa, nan a bin busk'É pa nan bai kunÉ, pasobra nan a bisa: ‘Su kabes no ta bon.’

²² Algun dòktor di lei, ku a baha bini for di Herusalèm, a bisa: ‘E ta poseé pa Belzebul; ta ku yudansa di hefe di demoño e ta saka demoño.’

²³ Hesus a yama nan serka djE i kontestá nan ku un komparashon: ‘Ta kon satanas por saka satanas for di un hende?

²⁴ Si tin divishon den un reino, e reino ei ta kaba na nada.

²⁵ Si un kas di famia ta dividí, e no por keda eksistí.

²⁶ Si satanas lanta kontra su mes, su reino ta dividí i e no por keda para. Ta su fin!

²⁷ Niun hende no por drenta kas di un hòmber fuerte i kohe su kosnan sin ku e mar'é promé. Ta asin'ei so e por kohe e kosnan.

²⁸ Mi ta sigurá boso ku hende por haña pordon pa tur piká ku e hasi i tur kos malu ku e papia.

²⁹ Ma esun ku blasfemá Spiritu Santu lo no haña pordon nunka mas; lo e keda kulpabel pa semper.’

³⁰ Hesus a bisa asina pasobra nan a bisa ku E tabata poseé pa mal spiritu.

Mama i e rumannan di Hesus

³¹ Miéntras Hesus tabata papia ku e dòktornan di lei, su mama ku su rumannan a bini; nan a keda para pafó i manda yam'É.

³² Tabatin un grupo grandi di hende sintá rònt di Hesus. Nan a bis'É: ‘Bo mama i bo rumannan ta pará pafó, i nan ta puntra pa Bo.’

³³ Hesus a kontestá nan: ‘Ken ta mi mama? Ken ta mi rumannan?’

³⁴ El a drei wak e hendenan sintá abou rònt di djE i a bisa: ‘Ata mi mama i mi rumannan akí!

³⁵ Ken ku hasi boluntat di Dios ta mi ruman hòmber, mi ruman muhé, mi mama.’