Marko 13 - Beibel na Papiamentu Koriente 2013

Hesus ta anunsiá destrukshon di tèmpel

¹ Ora Hesus tabata sali for di tèmpel, un di su disipelnan a bis'É: ‘Maestro, mira e piedranan ei; mira e edifisionan ei!’

² Hesus a kontestá: ‘Bo ta para mira e edifisionan grandi ei? Niun piedra lo no keda na su lugá; lo basha tur abou!’

E señalnan ku mester bini promé ku e fin yega

³ Ora Hesus tabata sintá riba Seru di Oleifi, ku kara pa tèmpel i nan tabata nan so, Pedro, Hakobo, Huan i Andreas a puntr'É:

⁴ ‘Bisa nos: ki dia e kosnan akí lo sosodé? Na kua señal nos por mira ku tempu a yega pa tur e kosnan akí tuma lugá?’

⁵ Hesus a kuminsá splika nan: ‘Tene kuidou, no laga niun hende gaña boso.

⁶ Hopi lo bin usa mi nòmber i bisa: “T'ami t'E!”, i nan lo gaña hopi hende.

⁷ No bira sobresaltá ora boso tende di guera i rumor tokante guera; e kosnan akí mester sosodé, ma lo no ta e fin ainda.

⁸ Nashon lo lanta kontra nashon, reino kontra reino; lo tin temblor na diferente lugá i lo tin temporada di mizeria di hamber. E kosnan akí lo ta kuminsamentu di dolónan di parto.

⁹ Boso mes tene kuidou! Nan lo entregá boso den man di outoridatnan i bati boso den snoa. Boso lo mester aparesé dilanti di gobernante i dilanti di rei pa mi motibu, pa asina boso ta un testimonio pa nan.

¹⁰ Pasobra promé ku e fin yega, mester prediká e bon notisia na tur nashon.

¹¹ Ora nan kohe boso prezu i hiba boso dilanti di tribunal, no preokupá boso di antemano kiko boso mester bisa; ora e momento yega, bisa numa loke boso haña pa bisa e ora ei. Pasobra no ta boso ta bisa nada e momento ei, ma ta Spiritu Santu!

¹² Ruman lo laga mata ruman. Tata lo hasi meskos ku nan yu. Yu lo rebeldiá kontra nan mayornan i laga mata nan.

¹³ Tur hende lo odia boso pa mi motibu, ma esun ku perseverá te na final lo keda salbá!

¹⁴ Ora boso mira e “kos repugnante ku ta trese destrukshon” poné kaminda e no mester ta (komprondé bon kiko esaki ke men, lesadó), habitantenan di Hudea, hui e ora ei bai den seru.

¹⁵ Esun ku ta sintá riba su dak di kas, no pèrdè tempu baha bai kohe nada den kas.

¹⁶ Esun ku ta den kunuku, no bira bèk bai kohe paña.

¹⁷ Ai di e muhénan na estado i di e mamanan ku tin yu na lechi den e dianan ei!

¹⁸ Resa pidi Dios pa e huimentu no tuma lugá den wenter, tempu di friu,

¹⁹ pasobra e mizeria grandi di e dianan ei lo ta mas ku mundu a yega di weta, for di e momento ku Dios a krea mundu te awor akí! Un mizeria grandi asina lo no bini hamas atrobe.

²⁰ Si Dios no a hasi e tempu ei mas kòrtiku ningun hende lo no a skapa, ma Dios a hasi e tempu mas kòrtiku pa motibu di esnan ku El a skohe.

²¹ Anto ora un hende bisa boso: “Mira! Ata e Mesias aki!” òf: “Ata e Mesias aya,” no ker'é.

²² Lo lanta hende ku ta pretendé di ta e Mesias i di ta profeta; nan lo mustra señal i nan lo hasi milager pa asina desviá, si ta posibel, asta e eskohidonan di Dios.

²³ Tene kuidou! Mi a konta boso tur kos di antemano!

Binida di e Yu di hende

²⁴ E dianan ei, despues di e gran mizeria, skuridat lo tapa solo, i luna lo no bria mas,

²⁵ streanan lo kai for di shelu, i podernan selestial lo tambaliá.

²⁶ E ora ei lo mira e Yu di hende bini riba nubia, ku gran poder i gloria.

²⁷ Lo E manda angel reuní su eskohidonan for di e kuater skinanan di mundu, for di un ekstremo di mundu te e otro ekstremo.

Siña di e palu di figo

²⁸ Siña lo siguiente di palu di figo. Ora su takinan bira moli i su blachinan kuminsá spreit, boso sa ku zomer ta na kaminda.

²⁹ Sa anto tambe, ku ora e kosnan akí ta pasando, ku e ta djis tras di porta.

³⁰ Mi ta sigurá boso: E kosnan akí lo pasa promé ku e generashon akí pasa bai.

³¹ Shelu i tera lo pasa bai, ma mi palabranan sí lo no pasa bai!

Niun hende no sa e dia ni e ora

³² Niun hende no sa ki dia ta e dia òf ki ora ta e ora, ni angelnan den shelu ni e Yu di hende no sa; Dios Tata so sa esei.

³³ Tene kuidou, sea alerta! Pasobra boso no sa ki dia e ora lo yega.

³⁴ E kos akí ta manera e kaso di un hòmber ku ta bai di biahe laga su kas. E ta laga tur kos den man di su kriánan, ta duna kada un su enkargo i ordená su pòrtir pa keda alerta.

³⁵ Sea alerta antó, pasobra boso no sa ki ora e doño di kas ta yega. E por yega anochi òf meianochi, mardugá òf mainta trempan.

³⁶ Si e doño mester bini diripiente, sòru pa e no haña boso drumí.

³⁷ Loke Mi ta bisa boso, Mi ta bisa tur hende: Sea alerta!’