Huan 21 - Beibel na Papiamentu Koriente 2013

Hesus ta aparesé na shete disipel

¹ Despues Hesus a aparesé un bia mas na su disipelnan na lago di Tiberias. Esaki a tuma lugá di siguiente manera.

² Simon Pedro, Tomas, yamá tambe ‘Ohochi’, Natanaèl di Kana na Galilea, e yunan di Zebedeo i dos otro disipel di Hesus tabata huntu.

³ Simon Pedro a bisa e otronan: ‘Mi ta bai piska.’ Nan a bis'é: ‘Nos tambe ta bai piska huntu ku bo.’ E ora ei nan a bai den nan boto, pero henter anochi nan no a kohe nada.

⁴ Den kibrá di mainta, Hesus tabata pará na kantu, ma e disipelnan no tabata sa ku t'E.

⁵ El a bisa nan: ‘Mi yunan, boso no a kohe nada di kome, no?’ Nan a kontestá: ‘Nada!’

⁶ E ora ei El a bisa nan: ‘Tira boso reda na banda drechi di e boto i boso lo kohe piská.’ Nan a tira nan reda i nan no por a hal'é aden mas, asina hopi piská tabatin den dje!

⁷ E ora ei e disipel stimá di Hesus a bisa Pedro: ‘Ta Señor!’ Ora Pedro a tende ku ta Señor, el a shorotá su paña djariba, pasobra e no tabatin nada otro bistí i a bula na awa.

⁸ E otro disipelnan a bai kantu ku e boto i nan a lastra e reda bini kuné. Nan tabata un shen meter asina for di tera, ke men no muchu leu.

⁹ Ora nan a baha na tera, nan a mira un kandela di karbon ku un piská riba dje, i tambe tabatin pan.

¹⁰ Hesus a bisa nan: ‘Trese algun piská ku boso a kohe.’

¹¹ Simon Pedro a subi den e boto, lastra e reda yen di piská grandi, trese kantu. Tabatin 153 piská, ma tòg e reda no a sker.

¹² Hesus a bisa nan: ‘Bin desayuná!’ Niun di nan no a tribi interogá Hesus mas aleu pa sa ken E ta, pasobra nan tabata sa ku ta Señor.

¹³ Hesus a kohe e pan duna nan, meskos tambe El a hasi ku e piská.

¹⁴ Esei tabata e di tres bia ku Hesus a aparesé na su disipelnan, despues ku El a lanta for di morto.

Hesus i Pedro

¹⁵ Despues ku nan a desayuná, Hesus a puntra Simon Pedro: ‘Simon, yu di Huan, bo ta stima Mi mas ku tur e otronan akí ta stima Mi?’ Pedro a rospond'É: ‘Sí, Señor, Bo sa ku mi ta stima Bo.’ Hesus a sigui bis'é: ‘Duna mi lamchinan di kome!’

¹⁶ Hesus a puntr'é pa di dos bia: ‘Simon, yu di Huan, bo ta stima Mi?’ Pedro a kontestá: ‘Sí, Señor, Bo sa ku mi ta stima Bo.’ E ora ei Hesus a sigui bis'é: ‘Kuida mi karnénan!’

¹⁷ Despues Hesus a puntr'é pa di tres bia: ‘Simon, yu di Huan, bo ta stima Mi?’ Pedro a bira tristu, pasobra Hesus a puntr'é esei pa di tres bia. El a kontestá: ‘Señor, Bo sa tur kos; Bo sa ku mi ta stima Bo.’ Hesus a sigui bis'é: ‘Duna mi karnénan di kome!

¹⁸ Mi ta sigurá bo: tempu bo tabata hóben, bo tabata drecha bo paña bai kaminda bo tabata ke. Ma ora bo bira bieu, lo bo rèk man laga otro hende drecha bo paña pa bo i hiba bo kaminda bo no ke.’

¹⁹ Hesus a bisa asina pa indiká ki tipo di morto Pedro lo a muri pa duna Dios gloria. Despues El a bisa Pedro: ‘Sigui Mi!’

Hesus i e disipel stimá

²⁰ Pedro a bira wak i mira e disipel stimá di Hesus ta bini nan tras. Ta e mesun disipel ei a lèn patras, hala mas serka di Hesus durante e sena i puntr'É: ‘Señor, ken ta bai traishoná Bo?’

²¹ Ora Pedro a mir'é, el a puntra Hesus: ‘Señor, ke tal di esun ei?’

²² Hesus a bis'é: ‘Si Mi ke lag'é keda na bida te ora Mi bini bèk, esei no tin nada di aber ku bo! Sòru pa abo sigui Mi!’

²³ P'esei e notisia ku e disipel ei lo no muri a plama serka e rumannan. Ma Hesus no a bisa asina; El a bisa: ‘Si Mi ke lag'é keda na bida te ora Mi bini, esei no tin nada di aber ku bo!’

²⁴ Ta e disipel ei mes ta testiguá tokante tur e kosnan akí; ta e mes tambe a skibi nan. I nos sa ku su testimonio ta kuadra ku bèrdat.

Konklushon

²⁵ Tin hopi otro kos mas ku Hesus a hasi. Si mester a bai skibi nan tur un pa un, mi ta suponé ku lo no tabatin sufisiente lugá den henter mundu pa pone e bukinan ei!