Hebreonan 10 - Beibel na Papiamentu Koriente 2013

¹ Lei di Moises ta laga mira únikamente un sombra di e benefisionan ku lo bini, no e benefisionan mes. P'esei nunka lei lo no por hasi e hendenan ku aña aden aña afó ta ofresé e mesun sakrifisio, perfekto pa medio di e sakrifisionan akí.

² Si nan a keda purifiká un bia i pa semper di nan pikánan, nan lo no a sinti nan mes kulpabel mas i nan lo a stòp di ofresé sakrifisio.

³ Pero en realidat e sakrifisionan akí ta sirbi pa rekordá hende nan pikánan aña aden aña afó.

⁴ Pasobra ta imposibel ku sanger di toro i chubatu por kita piká.

⁵ P'esei Kristu ta bisa na e momento ku E ta bai mundu: ‘Bo no tabata ke ni sakrifisio ni ofrenda, sino Bo a duna Mi un kurpa.

⁶ Bo no gusta bestia kimá riba altá ni sakrifisio di pordon.

⁷ E ora ei Mi a bisa: “At'Ami aki manera ta skibí den bo buki tokante Mi: pa hasi bo boluntat, o mi Dios.” ’

⁸ Promé E ta bisa: ‘Bo no tabata ke ni gusta sakrifisio ni ofrenda, ni bestia kimá riba altá ni sakrifisio di pordon,’ ounke lei ta preskribí nan.

⁹ Despues E ta bisa: ‘At'Ami aki pa hasi bo boluntat.’ Ke men, Dios ta abolí e sakrifisio bieunan i remplasá nan pa Kristu su sakrifisio.

¹⁰ Dios a konsagrá nos n'E, pasobra Kristu a kumpli ku boluntat di Dios i a ofresé su mes kurpa un bia i pa semper komo sakrifisio.

¹¹ Kada saserdote hudiu diariamente ta para hasi su trabou saserdotal; kada be atrobe e ta ofresé e mesun sakrifisionan, ku no por kita piká.

¹² Kristu sinembargo a ofresé un solo sakrifisio pa piká i despues a kai sinta pa semper na man drechi di Dios.

¹³ Einan E ta keda warda te ora Dios lo a hasi su enemigunan un banki pa su pia sosegá.

¹⁴ Pa medio di un solo sakrifisio El a hasi esnan ku ta keda konsagrá na Dios, pa semper perfekto.

¹⁵ Spiritu Santu ta konfirmá esei. Promé E ta bisa:

¹⁶ ‘E aliansa nobo ku Mi ta bai sera ku pueblo di Israel lo ta asin'akí,’ Señor ta bisa, ‘Mi ta bai pone mi leinan den nan kurason i graba nan den nan mente.’

¹⁷ Despues E ta añadí: ‘Lo Mi pordoná nan maldatnan i no kòrda mas riba nan pikánan.’

¹⁸ Awor ku eseinan ta pordoná, no tin nesesidat mas di un sakrifisio pa piká.

Stimulashon pa perseverá

¹⁹ Asina ta, rumannan, ku pa medio di sanger ku Kristu a drama nos tin entrada liber pa e santuario.

²⁰ El a habri un kaminda nobo pa nos, un kaminda ku ta hiba na bida, un kaminda ku ta pasa dor di e kortina dilanti di e lugá santísimo; El a hasié ofresiendo su mes kurpa.

²¹ Awor ku nos tin un gransaserdote ku ta para na kabes di Dios su kas,

²² laga nos aserká Dios ku un kurason sinsero i un fe firme, ku un kurason purifiká di un mal konsenshi i ku un kurpa labá ku awa puru.

²³ Nos mester tene duru na loke nos ta spera i konfesá, pasobra Dios ku a hasi nos e promesanan ei, lo kumpli.

²⁴ Laga nos paga tinu na otro i stimulá otro pa demostrá amor i hasi bon obra.

²⁵ Nos no mester hasi un kustumber di keda sin bai nos reunionnan, manera tin hende ta hasi. Nos mester kurashá otro, i esei mas tantu ainda, segun boso ta mira dia di Señor ta aserká.

²⁶ Si nos a siña konosé e bèrdat, i deliberadamente keda hasi piká, no tin ningun sakrifisio mas ku por kita nos pikánan.

²⁷ Pa nos ta keda e ora ei solamente un perspektiva horibel di huisio i di e kandela ardiente ku lo devorá enemigu di Dios.

²⁸ Si un hende violá lei di Moises, i dos òf tres testigu konfirmá esaki, ta mat'é sin tene mizerikòrdia.

²⁹ Kiko lo sosodé antó ku esun ku ta despresiá Yu di Dios? Ku ta menospresiá sanger di e aliansa ku Dios a santifik'é kuné? Ku ta ofendé Spiritu ku a dun'é grasia? Boso no ta kere ku lo e haña un kastigu muchu mas pisá?

³⁰ Nos sa tòg ken a bisa: ‘Ami lo tuma vengansa, Ami lo paga bèk.’ I tambe: ‘Señor lo husga su pueblo.’

³¹ Ta algu teribel pa kai den man di Dios bibu!

³² Kòrda promé aya, tempu boso a haña lus di Dios i mester a sufri tantu asina. Pero boso a sobrebibí e lucha.

³³ Tin bia a ofendé i oprimí boso mes públikamente, tin bia boso a sostené otro ku tabata haña e trato ei.

³⁴ Boso a sinti ku esnan ku nan a kohe prezu i boso a soportá kontentu, ora a hòrta boso kosnan. Boso tabata sa ku boso tabata poseé algu mihó i permanente.

³⁵ No pèrdè konfiansa antó, pasobra Dios lo rekompens'é rikamente.

³⁶ Pa kumpli ku boluntat di Dios i pa haña loke E ta primintí, boso mester di perseveransia. Pasobra Skritura ta bisa:

³⁷ ‘Ainda un korto, korto tempu mas, i Esun ku mester bini, lo bini i no warda mas.

³⁸ Mi hende hustu lo keda na bida pa medio di fe. Pero si e no perseverá e no por agradá Mi mas.’

³⁹ Pero nos no ta pertenesé na esnan ku ta hala atras i ta bai pèrdí, pero na esnan ku tin fe i p'esei ta keda biba.