Hebreonan 1 - Beibel na Papiamentu Koriente 2013

Dios a papia pa medio di su Yu

¹ Promé aya Dios a papia hopi bia i na hopi manera ku nos antepasadonan pa medio di e profetanan,

² pero awor, den e delaster dianan, El a papia ku nos pa medio di su Yu. Dios a krea universo pa medio di djE i a dun'É tur kos pa semper den poseshon.

³ Den djE gloria di Dios ta resplandesé, E ta semehansa di Dios su ser. Pa medio di su palabra poderoso E ta mantené tur kos. Despues ku El a hasi posibel ku piká por keda pordoná, El a tuma lugá na man drechi di e Mahestat den shelu.

⁴ E ta alsá riba angelnan i a risibí un título ku tambe ta surpasá esun di nan.

Yu ta superior na e angelnan

⁵ Pasobra nunka Dios a yega di bisa niun angel: ‘Bo ta mi Yu; awe Mi a duna Bo bida,’ ni tampoko: ‘Ami lo ta un Tata p'E i E lo ta un Yu pa Mi.’

⁶ Pero, ora Dios a trese su Yu úniko na mundu, El a bisa: ‘Tur Dios su angelnan mester ador'É.’

⁷ Di e angelnan E ta bisa: ‘E ta hasi su angelnan manera bientu fuerte, su sirbidónan manera vlam di kandela.’

⁸ Pero E ta bisa su Yu: ‘Bo trono, Dios, t'ei pa semper, bo sèpter real ta un sèpter di hustisia.

⁹ Bo stima hustisia i ta odia maldat. P'esei Dios, bo Dios, a konsagrá Bo ku zeta, señal di alegria, mas ku tur bo kompañeronan.’

¹⁰ Tambe E ta bisa: ‘Señor, Bo a funda mundu den prinsipio, shelu ta obra di bo man.

¹¹ Nan lo peresé, ma Abo ta keda, tur lo gasta manera pañ'i bisti.

¹² Lo Bo dobla nan manera un mantel, kambia nan manera paña. Ma Abo ta keda semper meskos, lo no tin fin na bo añanan.’

¹³ Pero E no a yega di bisa niun angel nunka: ‘Sinta Bo aki na mi man drechi, miéntras Mi ta hasi bo enemigunan un banki pa bo pia sosegá.’

¹⁴ Pasobra tur e angelnan ta spiritu den servisio di Dios, ku E ta manda bai sirbi esnan ku lo risibí salbashon.