Génesis 9 - Beibel na Papiamentu Koriente 2013

Dios ta sera un aliansa ku Noe

¹ Dios a bendishoná Noe i su yu hòmbernan bisando: ‘Yena mundu ku hopi desendiente.

² Tur bestia na mundu lo tembla di miedu pa boso. Tur bestia den laria, riba tera i den laman lo ta den boso man.

³ Boso mag kome karni di tur bestia meskos ku boso mag kome bèrdura. Tur bestia Mi ta duna boso komo kuminda.

⁴ Pero tin ún kos ku boso no mag kome: karni ku sanger aden, pasobra ta den e sanger bida ta.

⁵ Ken ku mata un otro hende, Mi ta pon'é responsabel. Ta kastig'é ku morto. E bestia ku mata un hende tambe mester muri.

⁶ Esun ku drama sanger di un hende, un otro hende lo drama di dje, pasobra hende ta trahá segun Dios su imágen.

⁷ I boso, haña hopi yu, yena mundu ku hopi desendiente!’

⁸ Dios a bisa Noe ku su yu hòmbernan:

⁹ ‘Awor Mi ta sera mi aliansa ku boso, ku boso desendientenan,

¹⁰ i ku tur e bestianan, ku a sali huntu ku boso for di e arka: para, bestia di kria, bestia di mondi, tur bestia na mundu.

¹¹ Mi ta primintí boso ku nunka mas lo Mi hasi uso di un diluvio pa destruí hende i bestia; lo no bini diluvio mas pa destruí mundu.’

¹² Tambe Dios a bisa: ‘Esaki ta e señal di e aliansa ku Mi ta sera ku boso i ku tur bestia ku ta huntu ku boso, pa tur generashon benidero:

¹³ Mi ta pone mi regenbog den nubia pa e ta e señal di e aliansa entre Ami i mundu.

¹⁴ Ora Mi laga e nubianan aparesé na shelu i e regenbog sali den nan,

¹⁵ lo Mi kòrda riba e aliansa ku Mi a sera ku boso i ku tur bestia. Nunka mas lo no bini un diluvio pa destruí tur hende i bestia.

¹⁶ Ora e regenbog aparesé den nubia, Mi ta mir'é i kòrda riba e aliansa ku Mi a sera pa semper ku tur hende i ku tur bestia na mundu.’

¹⁷ ‘E regenbog ta señal di e aliansa ku Mi a sera ku tur hende i ku tur bestia na mundu.’ Asina Dios a bisa Noe.

Noe ku su yunan

¹⁸ E yunan di Noe ku a sali for di e arka tabata Sèm, Ham — tata di Kanaan — i Yafèt.

¹⁹ Ta di e tres yu hòmbernan akí di Noe tur hende na mundu ta desendé.

²⁰ Noe a bira kunukero i el a planta wendrùif.

²¹ Un dia Noe a bebe biña bira fuma, el a kita su pañanan i a kai drumi sunú den su tènt.

²² Ora Ham — tata di Kanaan — a mira su tata sunú, el a bai konta su dos rumannan ku tabata pará pafó.

²³ E ora ei Sèm i Yafèt a kohe un mantel. Nan a tir'é riba nan skouder i a kana ku lomba drenta e tènt. Nan a kita kara pa nan no mira e tata sunú i a tap'é ku e mantel.

²⁴ Ora Noe su kañá a kita, ku el a lanta i a tende kiko su yu hòmber di mas chikí a hasi kuné,

²⁵ el a bisa: ‘Malditu sea Kanaan! Lo e ta pió ku katibu di su rumannan!’

²⁶ Despues el a bisa: ‘Alabá sea SEÑOR e Dios di Sèm, i laga Kanaan ta katibu di Sèm.

²⁷ Dios hasi Yafèt grandi i lag'é biba den e tèntnan di Sèm, i laga Kanaan ta Yafèt su katibu.’

²⁸ Despues di diluvio Noe a biba 350 aña mas.

²⁹ Dia el a muri e tabatin 950 aña.