Génesis 7 - Beibel na Papiamentu Koriente 2013

Diluvio

¹ Despues SEÑOR a bisa: ‘Drenta e arka ku henter bo famia, pasobra Mi a mira ku t'abo so ta hustu den e generashon akí.

² Kohe di tur bestia puru shete par, esta shete bia un machu i un embra, pero di e bestianan ku no ta puru un par so, esta un machu i un embra.

³ Tambe bo ta kohe di kada sorto di para shete par, esta shete bia un machu i un embra pa asina sigurá ku kada sorto ta keda riba mundu.

⁴ Pasobra aki shete dia lo Mi manda kuarenta dia i kuarenta anochi largu áwaseru riba mundu i riba tur loke ta eksistí. Lo Mi bari tur loke Mi a krea for di riba mundu.’

⁵ Noe a hasi manera SEÑOR a mand'é.

⁶ Tempu diluvio a kuminsá, Noe tabatin 600 aña.

⁷ Pa protegé nan mes kontra e diluvio, Noe, su kasá i su yu hòmbernan ku nan kasá a drenta e arka.

⁸ E bestianan puru, e bestianan impuru, e paranan i tur bestia ku ta lastra abou riba suela

⁹ a drenta den arka serka Noe. Nan a drenta par par, machu i embra, manera Dios a ordená Noe.

¹⁰ Shete dia despues diluvio a kuminsá.

¹¹ E tempu ei Noe tabatin 600 aña. Tabata e di diesshete dia di e di dos luna, nèt riba e dia ei e laman di awa bou di tera a fòrsa kaminda bini ariba i den shelu damnan a habri.

¹² Kuarenta dia i kuarenta nochi largu awa a yobe riba mundu.

¹³ Riba e mesun dia ei Noe a drenta arka ku su kasá i ku su yu hòmbernan Sèm, Ham i Yafèt, i nan kasá.

¹⁴ Huntu ku nan a drenta tur e diferente sortonan di bestia di mondi i di bestia di kria, tur sorto di para i tur sorto di bestia ku ta lastra abou riba suela.

¹⁵ Tur bestia ku ta eksistí a bini serka Noe i nan a drenta par par.

¹⁶ A drenta un machu i un embra di kada sorto, manera Dios a ordená Noe; despues SEÑOR a sera e porta tras di Noe.

¹⁷ Kuarenta dia largu awa a keda basha riba mundu. Awa a subi i lanta e arka for di tera.

¹⁸ Awa a keda subi te ku e arka a kuminsá drif.

¹⁹ Mas i mas awa a yena te ku el a tapa e serunan di mas altu di mundu.

²⁰ Al fin e awa a subi shete meter i mei mas altu ku e serunan.

²¹ Asina tur loke tabatin bida, ku tabata move riba tera, a muri, esta para, bestia di kria, bestia di mondi, tur bestia ku ta lastra abou riba suela, i tambe tur hende.

²² Tur loke tabata biba riba tera i ku tabatin rosea a muri.

²³ Asina Dios a kaba ku tur loke tabata eksistí riba tera; ku hende, bestia di kria, bestia ku ta lastra abou riba suela i ku para den laria; nan tur El a bari for di riba mundu. Solamente Noe i tur ku tabata huntu kuné den arka a skapa.

²⁴ Shentisinkuenta dia largu mundu a keda tapá bou di awa.