Génesis 19 - Beibel na Papiamentu Koriente 2013

Dios ta destruí Sódoma i Gomora

¹ Ya nochi a kuminsá sera, ora e dos angelnan a yega Sódoma. Lòt tabata sintá na porta di siudat. Ora el a mira e angelnan, el a lanta bai risibí nan. El a bùig te na suela

² i bisa nan: ‘Señornan, sea asina bon di bin pasa nochi na kas di boso sirbidó. Ei boso por laba pia i sigui mañan mainta trempan.’ Pero nan a bis'é: ‘Nò, danki. Nos ta pasa nochi riba e plenchi.’

³ Pasobra Lòt a keda insistí, nan a disidí di bai su kas kuné. Ora nan a yega kas, Lòt a prepará un bon kuminda pa nan i a traha pan sin zürdeg. E bishitantenan a kome.

⁴ Nèt ora nan tabata bai drumi, tur e hòmbernan di Sódoma, for di esun di mas yòn te esun di mas bieu, nan tur, sin niun eksepshon, a rondoná e kas.

⁵ Nan tabata grita: ‘Lòt, unda e hòmbernan ku a bini bo kas awe nochi ta? Bini ku nan pafó pa nos tene relashon ku nan!’

⁶ E ora ei Lòt a sali pafó p'e bai serka nan; pero el a sera e porta su tras.

⁷ El a bisa nan: ‘Por fabor, rumannan, laga maldat.

⁸ Mi tin dos yu muhé ku nunka no a tene relashon ku ningun hòmber; mi ta trese nan pa boso hasi ku nan manera boso haña ta bon. Pero no hasi e hòmbernan akí nada. Mi a invitá nan na mi kas, p'esei mi ta protegé nan.’

⁹ Nan a kontest'é: ‘Hala un banda; esei so falta; un strañero ke bin manda riba nos. Wanta awor, abo, nos ta trata bo pió ku nan!’ Nan a pusha Lòt pa nan haña fòrsa e porta.

¹⁰ Pero e hòmbernan ku tabata di bishita a saka man, ranka Lòt paden i sera e porta.

¹¹ Despues nan a bruha bista di tur e hòmbernan, grandi i chikitu, di manera ku nan no por a haña e porta.

¹² E ora ei e bishitantenan a bisa Lòt: ‘Tin mas hende di bo aki den siudat? Si bo tin un suegu, un yu òf kualke hende di bo, bai ku nan for di aki,

¹³ pasobra nos ta bai destruí e siudat. SEÑOR a tende e akusashonnan pisá ku tin kontra e habitantenan di Sódoma i p'esei El a manda nos bin destruí e siudat.’

¹⁴ E ora ei Lòt a bai serka e yònkumannan ku tabata bai kasa ku su yu muhénan i a bisa nan: ‘Bai for di e lugá akí, pasobra SEÑOR ta bai destruí e siudat.’ Pero nan a kere ku ta wega Lòt tabata hasi.

¹⁵ Ora di dia tabata bai habri e angelnan a bisa Lòt: ‘Ban mira! Bai ku bo esposa i ku bo dos yu muhénan ku t'aki, sino bo ta bira víktima di e maldat ku e siudat akí ta hasi.’

¹⁶ Komo e tabata tete tete e hòmbernan a gara Lòt, su esposa i su yunan na nan man i a hiba nan pafó di e siudat, pasobra SEÑOR ker a spar Lòt su bida.

¹⁷ Asina nan a yega pafó di e siudat un di e angelnan a bisa: ‘Kore pa bo bida! No wak patras, ni para ningun kaminda den e region akí. Bai den e serunan si boso ke skapa di morto.’

¹⁸ Pero Lòt a bisa nan: ‘Ai nò, mi shonnan.

¹⁹ Mi a ripará ku boso ke mi bon i boso a hasi mi un fabor grandi kaba di skapa mi bida. E serunan ta muchu leu. Promé ku mi alkansá nan, mi ta bira víktima di e desaster i mi ta muri.

²⁰ Wak e siudat mas serka ayá, mi por hui bai aya. Ta un siudat chikitu. Laga mi bai aya pa mi skapa.’

²¹ E ora ei un di e angelnan a bisa: ‘Ta bon! Lo mi skucha bo un bia mas i kumpli ku loke bo a pidi. Mi no ta destruí e siudat ei.

²² Hasi lihé hui, bai aya mesora pasobra mi no por hasi nada promé ku bo yega aya.’ P'esei nan a yama e siudat Soar.

²³ Solo a kaba di sali, ora Lòt a yega Soar.

²⁴ E ora ei SEÑOR a laga suafel na kandela yobe riba Sódoma i Gomora

²⁵ i El a destruí tur e dos siudatnan ku tur habitante i henter e region ku tur loke tabata krese ei.

²⁶ Esposa di Lòt ku tabata kana su tras a drei mira patras i mesora el a kambia bira un pilá di salu.

²⁷ Mainta trempan Abraham a bai e lugá kaminda el a para papia ku SEÑOR;

²⁸ el a wak den direkshon di Sódoma, Gomora i henter e region. Tur kaminda tabatin huma ta sali for di suela komo si fuera ta un fòrnu e lugá tabata.

²⁹ Ora Dios a destruí e siudatnan den e region kaminda Lòt tabata biba, El a kòrda riba Abraham i a saka Lòt for di e lugá ku El a destruí.

Lòt i su yu muhénan

³⁰ Lòt tabatin miedu di keda na Soar. P'esei el a bai ku su dos yu muhénan den seru kaminda nan tres a keda biba den un kueba.

³¹ Un dia e yu mayó a bisa esun mas chikitu: ‘Nos tata ta bieu i den e region akí no tin niun hòmber ku por tene relashon ku nos manera ta kustumber tur kaminda.

³² Laga nos hasi nos tata fuma i drumi kuné, ya nos ta haña yu ku nos tata.’

³³ E mes anochi ei nan a duna nan tata biña bebe i e yu mayó a drumi kuné. E tata no tabata sa mes ki ora e yu a kai drumi banda di dje ni ki ora e yu a lanta bai.

³⁴ E siguiente dia e yu mayó a bisa esun mas chikitu: ‘Ayera nochi mi a drumi ku tata. Awe nochi nos ta bolbe hasié fuma pa abo drumi kuné ya nos tur dos ta haña yu ku nos tata.’

³⁵ E anochi ei nan a bolbe duna nan tata biña bebe i e yu mas chikitu a drumi kuné. E tata no tabata sa mes ki ora e yu a kai drumi banda di dje ni ki ora e yu a lanta bai.

³⁶ Asina a sosodé ku e dos yunan di Lòt a sali na estado di nan mes tata.

³⁷ E yu mayó a haña un yu hòmber. El a yam'é Moab. Moab a bira tata di e aktual moabitanan.

³⁸ Esun mas chikitu tambe a haña un yu hòmber. El a yam'é Bèn-Ami. Bèn-Ami a bira tata di e aktual amonitanan.