Génesis 11 - Beibel na Papiamentu Koriente 2013

Toren di Bábel

¹ Den e tempu ei tur hende tabata papia e mesun lenga.

² Ora nan tabata bai den direkshon ost, nan a haña un sabana den e pais Shinar, kaminda nan a keda biba.

³ Un dia nan a bisa otro: ‘Ban traha klenku i hòrna nan bon.’ Nan a usa e klenkunan pa blòki i breu pa pega e blòkinan na otro.

⁴ Despues nan a bisa: ‘Ban lanta un siudat ku un toren ku ta yega te na shelu. Asin'ei nos lo bira famoso i nos lo no haña nos plamá riba henter mundu.’

⁵ Ora SEÑOR a baha pa mira e stat ku e toren ku e hendenan tabata trahando,

⁶ El a pensa: ‘Mira, e hendenan akí ta ún pueblo, i nan tur ta papia e mesun lenga. Esaki ta djis e kuminsamentu di loke nan ke logra. Aworó nada riba mundu lo no ta imposibel pa nan.

⁷ Laga Nos baha anto i bruha nan lenga, ya nan no ta komprondé otro mas.’

⁸ Asina SEÑOR a hasi ku nan a plama riba henter mundu. Nan mester a laga trahamentu di e stat para.

⁹ Einan SEÑOR a bruha lenga di henter humanidat. For di einan El a pone nan plama riba henter mundu. P'esei e siudat yama Bábel.

Desendientenan di Sèm

¹⁰ Aki ta sigui lista di e desendientenan di Sèm. Dos aña despues di diluvio, tempu Sèm tabatin 100 aña, su yu hòmber Arpakshad a nase.

¹¹ Despues Sèm a biba 500 aña mas, i e tabatin mas yu hòmber i mas yu muhé.

¹² Tempu Arpakshad tabatin 35 aña, su yu Shèlag a nase.

¹³ Despues Arpakshad a biba 403 aña, i e tabatin mas yu hòmber i mas yu muhé.

¹⁴ Tempu Shèlag tabatin 30 aña, su yu Ebèr a nase.

¹⁵ Despues Shèlag a biba 403 aña mas, i e tabatin mas yu hòmber i mas yu muhé.

¹⁶ Tempu Ebèr tabatin 34 aña, su yu Pèlèg a nase.

¹⁷ Despues Ebèr a biba 430 aña mas, i e tabatin mas yu hòmber i mas yu muhé.

¹⁸ Tempu Pèlèg tabatin 30 aña, su yu Reú a nase.

¹⁹ Despues ku Reú a nase, Pèlèg a biba 209 aña mas, i e tabatin mas yu hòmber i mas yu muhé.

²⁰ Tempu Reú tabatin 32 aña, su yu Serug a nase.

²¹ Despues ku Serug a nase, Reú a biba 207 aña mas, i e tabatin mas yu hòmber i mas yu muhé.

²² Tempu Serug tabatin 30 aña, su yu Nahor a nase.

²³ Despues Serug a biba 200 aña mas, i e tabatin mas yu hòmber i mas yu muhé.

²⁴ Tempu Nahor tabatin 29 aña, su yu Tèrag a nase.

²⁵ Despues Nahor a biba 119 aña mas, i e tabatin mas yu hòmber i mas yu muhé.

²⁶ Tempu Tèrag tabatin 70 aña, su yunan Abram, Nahor i Haran a nase.

Desendientenan di Tèrag

²⁷ Aki ta sigui e desendientenan di Tèrag. Tèrag tabatin tres yu hòmber: Abram, Nahor i Haran. Haran tabata tata di Lòt.

²⁸ Haran a muri na Ur di Kaldea, kaminda el a nase. E tempu ei su tata Tèrag tabata na bida ainda.

²⁹ Abram a kasa ku Sarai, i Nahor ku Milka. Milka tabata yu muhé di Haran i ruman di Yiska.

³⁰ Sarai no tabatin yu, pasobra e no por a haña yu.

³¹ Tèrag a sali for di Ur di Kaldea pa bai e pais Kanaan. El a bai ku su yu Abram, su ñetu Lòt i su suegra Sarai. Ma ora nan a yega e stat Haran nan a keda biba einan.

³² Tèrag a muri na Haran ku 205 aña.