Éksodo 8 - Beibel na Papiamentu Koriente 2013

Di dos plaga: sapu

¹ Despues SEÑOR a bisa Moises: ‘Bai serka fárao i bis'é: “SEÑOR ta bisa: Laga mi pueblo bai pa nan adorá Mi.

² Si bo nenga, Mi ta laga un plaga di sapu tormentá henter bo pais.

³ Nilo lo ta yen yen di sapu; nan lo sali for di riu i penetrá den bo palasio i te den bo kamber i nan lo subi asta riba bo kama. Nan lo drenta kas di bo funshonarionan i di bo pueblo. Asta den fòrnu i den baki di traha pan.

⁴ Nan lo bula riba bo, riba bo pueblo i riba bo funshonarionan.” ’

⁵ SEÑOR a sigui bisa Moises: ‘Bisa Aaron rèk su man ku e bastòn riba tur riu, tur kanal i tur plas di awa, pa sapu sali i plama tur kaminda den Egipto.’

⁶ E ora ei Aaron a rèk su man riba e awanan di Egipto. Sapu a sali i henter Egipto tabata pèstá di sapu.

⁷ Pero e magonan, ku nan práktika di magia, a hasi meskos; nan tambe a laga sapu sali na Egipto.

⁸ Fárao a yama Moises i Aaron i a bisa nan: ‘Resa na SEÑOR pa E libra mi i mi pueblo di e sapunan. E ora ei mi ta laga e pueblo bai pa nan ofresé sakrifisio na SEÑOR.’

⁹ Moises a kontestá: ‘Mi ta na fárao su òrdu. Bo ke bisa mi ki dia mi resa pa bo, bo funshonarionan i bo pueblo pa e sapunan bai for di boso kas? Den riu Nilo so lo keda sapu.’

¹⁰ Fárao a kontestá: ‘Mañan mes.’ Moises a bisa: ‘Asina lo sosodé, pa bo sa ku ningun dios no ta mes grandi ku SEÑOR, nos Dios.

¹¹ Abo, bo funshonarionan i bo pueblo lo skapa di e sapunan. Nan lo sali for di boso kas i solamente den Nilo lo keda sapu.’

¹² E ora ei Moises i Aaron a bai for di palasio di fárao i Moises a resa pidi SEÑOR pa libra Egipto di e plaga di sapu.

¹³ SEÑOR a skucha Moises su orashon i tur sapu ku tabatin den kas, den patio i den kunuku, a muri.

¹⁴ Nan a hala e sapunan pone na bòshi i tur kaminda tabata hole stinki.

¹⁵ Pero ora fárao a mira ku a bin alivio, el a keda tèrko i e no a pèrmití nan bai, manera SEÑOR a bisa.

Di tres plaga: sangura

¹⁶ SEÑOR a bisa Moises: ‘Bisa Aaron rèk su man ku e bastòn i dal riba suela. Den henter Egipto e stòf di suela lo kambia bira sangura.’

¹⁷ Nan a hasi asina. Aaron a kohe e bastòn, i a dal riba suela kuné. Sangura a ataká hende i bestia. Den henter Egipto stòf di suela a kambia bira sangura.

¹⁸ E magonan a praktiká magia pa nan tambe trese sangura, pero nan no a logra. Sangura a ataká hende i bestia.

¹⁹ E ora ei e magonan a bisa fárao: ‘Aki sí ta man di Dios!’ Pero fárao a keda tèrko i e no ker a tende, manera SEÑOR a bisa.

Di kuater plaga: muskita pikadó

²⁰ SEÑOR a bisa Moises: ‘Lanta mainta trempan i bai serka fárao, pasobra e tin kustumber di bai baña den riu. Bis'é: “SEÑOR ta bisa: Laga mi pueblo bai pa nan adorá Mi.

²¹ Si bo nenga, Mi ta manda un plaga di muskita pikadó riba bo, bo funshonarionan i bo pueblo. Boso kasnan i asta suela lo ta tapá bou di e muskitanan akí.

²² Pero pa Goshen, kaminda mi pueblo ta biba, Mi ta hasi un eksepshon. Lo no tin ni un muskita pikadó einan, pa bo sa ku t'Ami, SEÑOR, ta den e pais akí.

²³ Pasobra Mi ta hasi distinshon entre mi pueblo i bo pueblo. Mañan e milager akí ta sosodé.” ’

²⁴ Asina a sosodé: SEÑOR a manda trupanan di muskita pikadó. Nan a drenta palasio di fárao, kas di su funshonarionan i tur kaminda. Nan tabata terorisá e pais.

²⁵ E ora ei fárao a manda yama Moises i Aaron i el a bisa nan: ‘Bai for di aki! Ofresé sakrifisio na boso Dios pero aki den e pais mes.’

²⁶ Moises a bis'é: ‘Esei no ta bon, pasobra e sakrifisionan ku nos ta hasi na SEÑOR, nos Dios, ta repugná e egipsionan. Ora nan weta nos ofres'é sakrifisio ku nan tin asko di dje, nan lo bati nos mata ku piedra.

²⁷ Nos ke bai tres dia leu den desierto, pa ofresé sakrifisio na SEÑOR, nos Dios, manera El a bisa nos.’

²⁸ E ora ei fárao a bisa: ‘Mi ta laga boso bai den desierto pa ofresé sakrifisio na SEÑOR, boso Dios, pero no bai muchu leu sí. Kòrda resa pa mi.’

²⁹ Moises a kontestá: ‘Mi ta bai resa na SEÑOR i mañan abo, bo funshonarionan i bo pueblo, lo ta librá di e muskitanan. Ma sòru pa fárao no bolbe gaña nos i stroba e pueblo di bai ofresé sakrifisio na SEÑOR.’

³⁰ Moises a bai for di palasio di fárao i el a resa na SEÑOR.

³¹ SEÑOR a skucha su orashon: tantu fárao komo su funshonarionan i e pueblo, a keda librá di e muskitanan. Ni un muskita no a keda.

³² Pero un bia mas fárao a keda tèrko; e no a laga e pueblo bai.