Éksodo 36 - Beibel na Papiamentu Koriente 2013

¹ Besalel i Oholiab mester traha huntu ku tur e hòmbernan ku Dios a duna sabiduria i konosementu den e trabounan akí, ku tin komprondementu di e trabou ku mester hasi pa e santuario. Nan mester ehekut'é manera SEÑOR a ordená.’

² E ora ei Moises a yama Besalel i Oholiab i tur hende di fishi ku SEÑOR a duna sabiduria i ku a ofresé nan mes boluntariamente pa hasi e trabou ei.

³ El a entregá nan tur loke e israelitanan a duna pa kuminsá ku konstrukshon di e santuario. E hendenan a sigui trese nan donashon boluntario tur mainta

⁴ te dia e trahadónan a para trabou un ratu pa bai bisa Moises:

⁵ ‘E pueblo ta dunando mas di loke mester pa hasi e trabou ku SEÑOR a ordená.’

⁶ E ora ei Moises a laga plama òrdu tur kaminda den kampamentu: ‘Ningun hòmber ni ningun muhé no tin mester mas di hasi donashon pa santuario.’ Asina a stòp e pueblo di hasi mas donashon.

⁷ Tabatin basta material pa hasi tur e trabou, asta tabatin di mas.

Konstrukshon di e tènt di enkuentro

⁸ Esnan mas artístiko den e trahadónan a traha e tènt sagrado di dies pida paña di lenen fini, trahá di hilu trosé den otro i di lana blou, kòrá püs i kòrá bibu; tabatin figura di kerubin trahá aden.

⁹ E pida pañanan tabata mes pareu: kada pida tabata dieskuater meter largu i dos meter hanchu.

¹⁰ A pega nan sinku sinku na otro hasi dos paña di nan.

^11-12 Na un banda di kada di e dos pañanan a traha sinkuenta las di lana blou. A traha nan di tal manera ku nan tabata keda enfrente di otro.

¹³ Despues a traha sinkuenta hak di oro i a pega e dos pidanan na otro di manera ku e tènt a bira un hinté.

¹⁴ Riba e tènt di enkuentro a traha un otro tènt ku tabata konsistí di diesun pida paña trahá di lana di kabritu.

¹⁵ E diesun pidanan tabata mes pareu: diessinku meter largu i dos meter hanchu.

¹⁶ A pega nan na otro hasi dos paña di nan, un di sinku pida i un di seis pida.

¹⁷ Despues a traha na un banda di e dos pañanan sinkuenta las

¹⁸ i a hak nan ku sinkuenta hak di bròns na otro, di manera ku e dos pañanan a bira un hinté.

¹⁹ A tapa e tènt promé ku kueru di chubatu di karné tinzjí kòrá i despues ku kueru fini.

²⁰ A traha e murayanan di e tènt di tabla di palu di akasia i a pone nan pará.

²¹ E tablanan tabata sinku meter largu i setentisinku sèntimeter hanchu.

²² Kada tabla tabatin dos pènchi pa por a pega nan na otro.

²³ Pa banda zùit a traha binti tabla

²⁴ i a pone kuarenta pia di plata bou di nan. Bou di kada tabla tabatin dos pia kaminda e pènchinan por a drenta.

²⁵ Pa e otro banda tambe, banda nort, a traha binti tabla

²⁶ ku kuarenta pia di plata. Dos pia bou di kada tabla.

²⁷ Pa e banda patras, esta banda wèst di santuario, a traha seis tabla

²⁸ i pa e skinanan parti patras dos tabla mas.

²⁹ E dos tablanan akí tabata kore presis pareu di abou te ariba na e promé renchi.

³⁰ Henter e muraya parti patras tabata konsistí antó di ocho tabla ku diesseis pia di plata, dos bou di kada tabla.

^31-32 A traha balki di palu di akasia pa tene e tablanan na otro. A pone e balkinan duars riba e tres murayanan di tabla: sinku balki na banda nort, sinku na banda zùit i sinku patras na parti wèst.

³³ A pone e balki meimei di kada muraya presis na mitar altura di e tablanan. E balki akí tabata hinté.

³⁴ Despues a traha renchi di oro pa pasa e balkinan i a fura e tablanan i balkinan ku oro.

³⁵ Pa separá un parti di e tènt a usa un kortina di lana blou, kòrá püs, kòrá bibu i di lenen fini, trahá di hilu trosé den otro; un eksperto a traha figura di kerubin den e kortina.

³⁶ Despues a pasa e kortina ei na e haknan di oro ku tabatin na kuater pilá. E pilánan tabata trahá di palu di akasia i furá ku oro. Nan tabatin pianan di plata.

³⁷ Na entrada di tènt a kologá un kortina di lana blou püs, kòrá püs, kòrá bibu i di lenen fini, bunita bòrdá ku hilu di diferente koló.

³⁸ A pega e kortina ku hak na sinku pilá ku tabata furá parti ariba ku oro. Tambe a fura e balkinan ku oro. Nan pianan tabata di bròns.