Éksodo 27 - Beibel na Papiamentu Koriente 2013

E altá di sakrifisio di kandela

¹ Traha e altá firkant. Trah'é di palu di akasia. E mester ta dos meter i mei hanchu, dos meter i mei largu i un meter i mei altu.

² Traha un kachu na e kuater skinanan, tur na un ku e altá i fura e altá ku bròns.

³ Traha di bròns tur e ophetonan ku ta nesesario na altá: e bakinan pa pone shinishi, e skalchinan di ofrenda, e skèpnan, e fòrkinan i e panchinan di kandela.

^4-5 Traha un hèkwèrk fini di bròns ku un renchi di bròns na e kuater skinanan. Pega e hèkwèrk ei rònt di e parti abou di e altá, di manera ku e ta yega te na e leshi ku tin na mitar altura rònt di e altá.

⁶ Traha bara di palu di akasia i fura nan ku bròns.

⁷ Pasa e baranan den e renchinan na kada banda di e altá ora ta transport'é.

⁸ Traha e altá di tabla, lag'é keda hòl parti paden, segun e modelo ku Mi a mustra bo aki riba seru.

E plenchi di santuario

⁹ Rondó di e santuario mester bini un plenchi. Sera e plenchi na banda zùit ku un kortina di sinkuenta meter largu. E mester ta di lenen fini, trahá di hilu trosé den otro.

¹⁰ Pa e kortina mester tin binti pilá di palu i binti pia di bròns; ku hak i bara di plata.

¹¹ Meskos na parti nort: sinkuenta meter di kortina, binti pilá i binti pia di bròns; ku hak i bara di plata.

¹² Pa e hanchura di e plenchi na parti wèst mester di 25 meter di kortina, dies pilá i dies pia.

¹³ E parti ost tambe ta 25 meter hanchu.

^14-15 Usa pa kada banda di e entrada shete meter i mei di kortina ku tres pilá i tres pia.

¹⁶ Pa e entrada di e plenchi mester di un kortina di dies meter. E mester ta trahá di lana blou, kòrá püs i kòrá bibu ku lenen fini bunita bòrdá ku hilu di diferente koló. Pa e kortina akí mester di kuater pilá i kuater pia.

¹⁷ Bara di plata ta konektá pilá rònt di e plenchi ku otro. E renchinan tambe mester ta di plata, pero e pianan di bròns.

¹⁸ E plenchi mester ta sinkuenta meter largu i 25 meter hanchu. E kortinanan mester ta dos meter i mei altu, di lenen fini, trahá di hilu trosé den otro. E pianan mester ta di bròns,

¹⁹ meskos ku tur loke ta usa pa sirbishi den santuario. E pènchinan di e tènt i di e kortinanan, tambe mester ta di bròns.

Lus pa e tènt di enkuentro

^20-21 Ordená e israelitanan pa nan trese zeta puru pa bo, e mihó zeta di oleifi, pa iluminashon den e tènt di enkuentro. E ora ei kontinuamente e lampinan por ta sendé dilanti di e kortina ku ta tene e lugá kaminda e arka di aliansa ta, for di bista. Aaron i su yunan ta keda responsabel pa e lampinan akí keda sendé henter anochi Mi dilanti. Esaki ta un regla ku ta konta pa tur generashon di e israelitanan.