Éksodo 25 - Beibel na Papiamentu Koriente 2013

Donashon pa e tènt sagrado

¹ SEÑOR a bisa Moises:

² ‘Bisa e israelitanan pa nan hasi un donashon na Mi. Tuma loke kada un ke duna di kurason.

³ Tuma e kosnan akí: oro, plata, koper;

⁴ tela blou, tela kòrá püs i kòrá bibu, lenen fini, lana di kabritu;

⁵ kueru di chubatu di karné tinzjí kòrá, kueru fini i palu di akasia;

⁶ zeta pa lampi, speserei pa traha zeta di konsagrashon i sensia di holó dushi;

⁷ óniks i otro piedra presioso pa e frèskòt saserdotal i pechero.

⁸ Laga nan traha un santuario pa Mi bin biba meimei di nan.

⁹ Traha e tènt i tur loke mester bini aden presis manera e modelo ku Mi ta laga bo mira.

E arka di aliansa

¹⁰ Laga nan traha un kaha di palu di akasia. E mester ta un meter bintisinku largu, setentisinku sèntimeter hanchu i setentisinku sèntimeter altu.

¹¹ Fur'é paden i pafó ku oro puru i traha un leshi di oro rònt di dje.

¹² Traha tambe kuater renchi di oro i pega nan na e kuater pianan, dos na kada banda di e kaha.

¹³ Traha bara di palu di akasia i fura nan ku oro.

¹⁴ Pasa e baranan den e renchinan na kada banda di e arka, pa por karga e arka.

¹⁵ E baranan mester keda den e renchinan, no saka nan.

¹⁶ Pone e dokumento di aliansa ku lo Mi duna bo, den e kaha.

¹⁷ Traha un tapa di oro puru, un meter bintisinku largu i setentisinku sèntimeter hanchu.

¹⁸ Traha na rant di kada banda kòrtiku un kerubin di oro batí.

¹⁹ E tapa i e kerubinnan mester ta tur na un.

²⁰ E kerubinnan mester ta ku kara pa otro den direkshon di e tapa i nan mester protegé e tapa ku nan alanan habrí.

²¹ Pone e dokumento di aliansa ku Mi duna bo den e kaha i pone e tapa ariba.

²² Ei lo Mi topa ku bo; riba e tapa di e arka di aliansa, meimei di e dos kerubinnan lo Mi laga bo sa loke Mi ta deseá di e israelitanan.

E mesa pa pan konsagrá

²³ Traha un mesa di palu di akasia di un meter largu, sinkuenta sèntimeter hanchu i setentisinku sèntimeter altu.

²⁴ Fur'é ku oro puru i traha un leshi di oro rònt di dje.

²⁵ Traha un rant, hanchura di un man, na e mesa, trah'é ku un leshi di oro.

²⁶ Traha kuater renchi di oro i pega nan na e skinanan na e kuater pianan.

²⁷ E renchinan mester ta serka di e rant pa por pasa e baranan di karga e mesa.

²⁸ Traha e baranan di palu di akasia i fura nan ku oro.

²⁹ E skòternan i e skalchinan mester ta trahá di oro puru, tambe e kanikanan i e kòmchinan pa e sakrifisio di biña.

³⁰ Sòru pa Mi dilanti tin semper pan konsagrá riba e mesa.

E kandelar

³¹ Traha un kandelar di oro puru. Su pia, bara i adornonan, esta e kèlki, kònòpi i blachinan, mester ta tur na un.

³² For di e bara mester sali seis brasa. Tres na kada banda.

³³ Na kada un di e seis brasanan mester tin tres kèlki den forma di flor di mangel ku tantu nan kònòpinan komo nan blachinan

³⁴ i na e bara di e kandelar kuater kèlki, tambe den forma di flor di mangel ku kònòpi i blachi.

³⁵ Bou di kada par di brasa ku ta sali for di e bara mester tin un kònòpi di flor.

³⁶ Tur kònòpi i brasa mester ta trahá na un ku e kandelar: ún pida di oro batí.

³⁷ Traha shete lampi di zeta i pone nan riba e kandelar, asina ku e lus ta tira pa parti dilanti.

³⁸ E bakinan di lampi i e snùiternan tambe mester ta di oro puru.

³⁹ Traha e kandelar kompleto i tur loke ta pertenesé n'e di trinta kilo di oro puru.

⁴⁰ Sòru di traha tur kos meskos ku e modelo ku Mi a mustra bo riba seru.