Éksodo 12 - Beibel na Papiamentu Koriente 2013

Fiesta di Pésag

¹ SEÑOR a bisa Moises i Aaron aya na Egipto:

² ‘For di awe e luna akí ta pa boso e promé luna di aña.

³ Duna henter pueblo di Israel e siguiente instrukshon: Dia dies di e luna akí kada hende mester skohe un karné òf kabritu pa su famia.

⁴ Si e famia tin muchu tiki hende pa kome un bestia henter, den e i su bisiña mas pegá nan mester kome un bestia huntu. Mester tene kuenta ku e kantidat di persona i kuantu kada hende por kome.

⁵ Por kohe un karné òf un kabritu di un aña, basta e bestia ta machu i sin ningun defekto.

⁶ Mester ward'é te dia 14 di e luna akí. Riba e dia ei, ora nochi ta bai sera, henter e komunidat di Israel mester mata e bestia.

⁷ Despues mester hunta e sanger na kozein di e porta di kas kaminda ta kome e bestia.

⁸ E mes anochi ei mester kome e bestia, hasá na kandela, ku pan sin zürdeg i ku yerba marga.

⁹ No mag di kom'é kurú, ni herebé den awa; mester hasa e bestia kompleto na kandela, ku kabes, pata i shirishiri.

¹⁰ No laga nada keda te su manisé. Si sobra algu mester kim'é.

¹¹ Boso mester kom'é di e manera akí: kla bistí pa biaha, kos na pia i bastòn den man. Kom'é purá. Ta fiesta di Pésag na honor di SEÑOR.

¹² Awe nochi mes Mi ta pasa den Egipto. Mi ta mata tur promé yu hòmber na Egipto i e promé yu machu di tur bestia di kria. Mi ta kastigá tur e diosnan di Egipto. Ami, SEÑOR, ta hasi esei.

¹³ E sanger ta sirbi pa indiká boso kasnan. Asina ora Mi kastigá Egipto ku morto, ningun di boso lo no muri, pasobra Mi ta weta e sanger i pasa boso kas bai.

¹⁴ E dia akí boso mester keda kòrda i boso mester selebr'é komo un fiesta grandi na mi honor. Keda selebr'é di generashon pa generashon; ta un dekreto pa semper.

Fiesta di pan sin zürdeg

¹⁵ Shete dia boso mester kome pan sin zürdeg. E promé dia boso mester saka tur zürdeg for di e kasnan, pasobra ta saka ken ku kome algu trahá ku zürdeg for di komunidat di Israel.

¹⁶ Riba e promé i di shete dia boso mester bini huntu na mi honor. Riba e dianan ei boso no mag traha, solamente e kuminda dje dia ei boso mag prepará.

¹⁷ Selebrá fiesta di pan sin zürdeg pa boso rekordá ku riba e dia ei Mi a saka boso, ku ta mi ehérsito, for di Egipto. Tur generashon benidero mester sigui selebrá e fiesta akí na mi honor, ta un dekreto pa semper.

¹⁸ Ke men den e promé luna boso mester kome pan sin zürdeg for di dia 14, ora nochi sera, te dia 21 anochi.

¹⁹ Shete dia largu no mester tin zürdeg den boso kas, pasobra mester saka ken ku kome algu ku zürdeg for di komunidat di Israel, sea ku e ta strañero òf yu di tera.

²⁰ Asina ta no kome nada ku tin zürdeg. Kome pan sin zürdeg unda ku boso por ta biba.’

Preparashon pa fiesta di Pésag

²¹ E ora ei Moises a yama tur ansiano di Israel i bisa: ‘Mata un karné òf kabritu pa selebrá fiesta di Pésag ku boso famia.

²² Pone e sanger den un kòmchi, dòp poko taki di hisopo den dje i hunta e kozein di porta di e kasnan kuné. Tur hende mester keda den kas te su manisé.

²³ Pasobra SEÑOR ta pasa kastigá den Egipto. Pero ora E weta un kozein di porta huntá ku sanger, E ta pas'é bai. E no ta laga esun ku ta destruí drenta boso kas.

²⁴ Atené boso na e instrukshonnan akí. Nan ta konta pa semper, tambe pa boso yunan.

²⁵ Ora boso yega e pais ku SEÑOR a primintí, boso mester sigui ku e kustumber sagrado akí.

²⁶ I ora boso yunan puntra boso kiko e kustumber akí ta nifiká,

²⁷ kontestá nan: “Ta un sakrifisio di Pésag na honor di SEÑOR, pasobra tempu El a kastigá e egipsionan ku morto, El a pasa kas di e israelitanan ku tabata biba na Egipto bai. Asina El a spar nos famianan.” ’ E ora ei e israelitanan a hinka rudia i a adorá SEÑOR.

²⁸ Despues di esei nan a bai hasi tur loke SEÑOR a ordená Moises i Aaron.

Di dies plaga: morto di e promé yu hòmbernan

²⁹ Meimei di anochi SEÑOR a mata tur yu hòmber mayó na Egipto. For di e yu hòmber mayó di fárao, su susesor, te ku e yu hòmber mayó di e prezu. Tur promé yu di e bestianan tambe a muri.

³⁰ Fárao, su funshonarionan i tur e egipsionan a lanta den e anochi ei; tabatin un lamento grandi na Egipto, pasobra no tabatin un kas sin morto.

³¹ E anochi ei mes fárao a manda yama Moises i Aaron i bisa: ‘Bai umbe for di mi pais, boso ku tur israelita! Bai adorá SEÑOR. Tòg n' ta esei boso ke hasi?

³² Bai ku boso karné-, kabritu- i bakanan tambe, bai! Anto pidi boso Dios pa E bendishoná mi tambe.’

³³ E egipsionan di nan parti tambe a roga e pueblo pa sali mas pronto posibel for di nan pais. ‘Sino nos tur ta muri,’ nan a bisa.

³⁴ E israelitanan a yena nan bakinan ku mansa sin zürdeg ainda, lora nan den nan pañanan, ku nan ta bai kuné, i pone nan riba skouder.

³⁵ Tambe nan a pidi e egipsionan opheto di plata i oro i paña di bisti manera Moises a ordená nan.

³⁶ Dios a perkurá pa e egipsionan tabata generoso ku nan i a kumpli ku nan petishon. Asina e israelitanan a probechá di kita kos for di e egipsionan.

E israelitanan ta sali for di Egipto

³⁷ E israelitanan a sali di Ramses pa Sukot na pia. Nan tabata mas o ménos 600.000 hende, sin konta hende muhé i mucha.

³⁸ Un grupo grandi di tur sorto di hende a bai huntu ku nan i un kantidat hopi grandi di karné, kabritu i baka.

³⁹ Di e mansa ku nan a bai kuné for di Egipto nan a traha pan. Den e pan no tabatin zürdeg. Komo nan mester a bandoná Egipto purá, nan no a haña tempu pa prepará kuminda pa kaminda.

⁴⁰ E israelitanan a biba 430 aña na Egipto.

⁴¹ Despues di presis 430 aña, sin kita sin pone un dia, e israelitanan, e ehérsito di SEÑOR, a sali for di Egipto.

⁴² E anochi ei SEÑOR a keda lantá pa guia i saka nan for di pais. P'esei tur generashon di Israel benidero mester pasa kada aña e anochi ei lantá na honor di SEÑOR.

Regla pa fiesta di Pésag

⁴³ SEÑOR a bisa Moises i Aaron: ‘Esaki ta e reglanan pa selebrá fiesta di Pésag. No ta pèrmití ningun strañero tuma parti na e komementu di Pésag.

⁴⁴ Un katibu ku bo a kumpra sí por tuma parti, basta bo a lag'é risibí sirkunsishon.

⁴⁵ Pero un strañero ku ta biba serka bo òf un hende ku ta traha pa bo kontra pago no por.

⁴⁶ Kome e kuminda den e kas ku e ta prepará. No sali ku e karni pafó di kas ni kibra wesu di e bestia.

⁴⁷ Henter komunidat di Israel mester selebrá e fiesta akí.

⁴⁸ Si un strañero ku ta biba serka boso ke selebrá e fiesta di Pésag na honor di SEÑOR, e i tur miembro maskulino di su famia mester risibí sirkunsishon promé. E ora ei ta konsider'é yu di tera i e por tuma parti na e selebrashon. Pero un hende ku no a risibí sirkunsishon no mag hasié.

⁴⁹ E mesun lei ta konta pa e israelita di nasementu i pa e strañero ku ta biba serka boso.’

⁵⁰ E israelitanan a hasi manera SEÑOR a ordená Moises i Aaron.

⁵¹ E mes dia ei SEÑOR a guia e israelitanan manera un ehérsito for di Egipto.