Echonan 28 - Beibel na Papiamentu Koriente 2013

Na Malta

¹ Ora nos a yega kantu sano i salvo, nos a deskubrí ku e isla tabata yama Malta.

² E habitantenan a demostrá un kariño ekstraordinario. Komo áwaseru tabata kai i tabata hasi friu, nan a sende un kandela i laga nos tur djòin nan.

³ Pablo a kohe un bòshi di palu seku i tir'é riba e kandela. Un kolebra venenoso a kore sali pa motibu di e kayente i a morde su man keda ten'é.

⁴ Ora e hendenan lokal a mira e kolebra kologá na Pablo su man, nan a komentá ku otro: ‘Sigur e hòmber ei ta un asesino; kaba el a kaba di skapa for di laman, tòg hustisia dibino no ke lag'é biba!’

⁵ Ma Pablo a sakudí e kolebra for di su kurpa i tir'é den kandela, sin ku nada malu a pasa e mes.

⁶ E hendenan a keda spera ku lo el a hincha òf dal abou muri diripiente. Despues di warda un tempu largu i mira ku nada straño no a pas'é, nan a kambia di idea i bisa: ‘Ta un dios e hòmber ei ta!’

⁷ No muchu leu fo'i djei banda tabatin e kunukunan di Publio, kabesante di e isla. El a risibí nos ku mashá kariño i nos a keda tres dia den su kas.

⁸ A sosodé ku su tata tabata malu na kama ku keintura i disenteria. Pablo a bai den e tata su kamber, resa, pone man riba dje i kur'é.

⁹ Despues ku esei a sosodé tur otro hende malu riba e isla a bini i nan tambe a haña kura.

¹⁰ Nan a rekompensá nos ku hopi regalo i ora nos tabata bai nabegá, nan a proveé nos loke nos tabatin mester pa e biahe.

Pablo ta yega Roma

¹¹ Despues di tres luna nos a sali ku un barku di Alexandria. E barku a pasa wenter na e isla; e tabatin emblema di e diosnan ohochi riba dje.

¹² Nos a yega siudat di Sirakusa i a keda aya tres dia.

¹³ Fo'i djei nos a sigui nabegá na kosta pa yega e siudat Regium. Siguiente dia a lanta un bientu fo'i zùit. Asin'ei nos a yega e siudat Puteoli den dos dia.

¹⁴ Aya nos a topa algun ruman ku a pidi nos keda un siman serka nan. E ora ei nos a sigui via tera pa Roma.

¹⁵ E kreyentenan di aya tambe a tende di nos yegada. Nan a bini te Foro Api i Tres Taberna pa kontra ku nos. Ora Pablo a mira nan, el a gradisí Dios i haña kurashi.

Ta prediká e bon notisia na Roma

¹⁶ Ora nos a yega Roma, Pablo a haña pèrmit pa biba riba su mes, pero ku un sòldá pa vigil'é.

¹⁷ Despues di tres dia Pablo a invitá e lidernan hudiu pa bini huntu. Ora nan a reuní, el a bisa nan: ‘Rumannan hudiu, ounke mi no a hasi nada kontra nos pueblo òf kontra kustumber di nos antepasadonan, for di Herusalèm nan a entregá mi komo prezu den man di e romanonan.

¹⁸ Despues di a interogá mi e romanonan ker a laga mi bai, pasobra nan no a haña ku mi a hasi nada ku a meresé kastigu di morto.

¹⁹ Pero komo e hudiunan a bai kontra esei, mi a haña mi obligá ta hasi un apelashon na emperador. Sinembargo esei no ke men sí ku awor akí mi ta bai entregá un keho kontra mi mes pueblo!

²⁰ Ta p'esei mi ker a mira boso i kombersá ku boso: ta pa motibu di speransa ku Israel mes ta karga, mi ta di bui asin'akí!’

²¹ Nan a bis'é: ‘Nos no a haña niun karta di Hudea tokante bo ni niun ruman no a bini djei pa raportá òf bisa algu malu di bo.

²² Ma nos tin gana sí di tende bo ideanan. Pasobra nos sa ku tur kaminda hende ta papia kontra e sekta ku bo ta pertenesé n'e!’

²³ Nan a palabrá un dia ku Pablo i un kantidat grandi di nan a bai kaminda e tabata keda. For di mainta trempan te anochi lat e tabata duna nan splikashon, testiguá di reino di Dios i tabata purba di gana nan pa Kristu a base di Lei di Moises i buki di e profetanan.

²⁴ El a konvensé sierto di nan, ma e otronan no ker a kere.

²⁵ E hudiunan a kita bai den desakuerdo ku otro; esei a pone Pablo añadí: ‘Esta korekto Spiritu Santu a papia ku boso antepasadonan, pa medio di profeta Isaías:

²⁶ “Bai antó i bisa e pueblo akí: Skucha, sigui skucha numa, tòg boso lo no komprondé; mira, sigui mira numa, tòg boso lo no rekonosé.

²⁷ Pasobra kurason di e pueblo akí a bira duru, nan a tapa nan orea, plak nan wowo sera, pa nan wowo no mira, ni nan orea no tende, ni nan mente no komprondé, pa nan no kombertí. Lo Mi a kura nan e ora ei?” ’

²⁸ Pablo a sigui bisa: ‘Sa anto ku Dios a manda e mensahe di salbashon akí pa esnan no hudiu. Nan sí lo skucha!’ [

²⁹ Ora el a bisa asina, e hudiunan a kita bai; nan tabatin un diskushon fuerte entre nan.]

³⁰ Pablo a keda biba dos aña kompleto einan, den un lugá ku e mes tabata hür. Tur hende tabata bonbiní serka dje.

³¹ E tabata prediká reino di Dios i siña e hendenan tokante Señor Hesu-Kristu públikamente, den tur libertat.