Echonan 15 - Beibel na Papiamentu Koriente 2013

Asamblea na Herusalèm

¹ Algun hòmber a bini Antiokia for di Hudea. Nan tabata siña e rumannan lo siguiente: ‘Si boso no laga sirkunsidá boso segun regla di Moises, boso no por haña salbashon.’

² Pablo i Barnabas tabatin opheshon fuerte i nan a ataká loke e hendenan ei tabata bisa. E ora ei a apuntá Pablo, Barnabas i algun otro hende di e grupo pa bai Herusalèm serka e apòstelnan i e ansianonan i presentá e punto di diskushon akí na nan.

³ E iglesia di Antiokia a tuma despedida di nan; nan a pasa Fenisia i Samaria, kaminda nan tabata konta na plaka chikí kon e no hudiunan a kombertí. Tur e rumannan a bira mashá kontentu ku e notisia.

⁴ Ora nan a yega Herusalèm, e iglesia di aya, e apòstelnan i e ansianonan a yama nan bonbiní i nan a konta na plaka chikí kiko Dios a hasi pa medio di nan.

⁵ Ma algun hende prosedente di e partido di fariseo ku a aseptá fe, a lanta para bisa: ‘Mester sirkunsidá nan i bisa nan obedesé lei di Moises.’

⁶ E apòstelnan i e ansianonan a reuní pa konsiderá e asuntu.

⁷ Despues di hopi diskushon Pedro a lanta bisa nan: ‘Rumannan, boso sa kon hopi tempu pasá Dios a skohe ami entre boso, pa via di mi e pueblonan no hudiu tende e bon notisia i kere.

⁸ Dios, ku konosé kurason di hende, a mustra su aprobashon dor di duna nan Spiritu Santu manera El a duna nos.

⁹ E no a hasi niun distinshon entre nan ku nos, pasobra El a deklará ku nan ta puru pa medio di nan fe.

¹⁰ Awor, ta pakiko boso ke pone Dios na prueba i pone un karga pisá riba lomba di e disipelnan? Un karga ku ni nos ni nos antepasadonan no por a karga!

¹¹ Nò, nos ta kere ku ta pa medio di grasia di Señor Hesus tantu nos komo nan ta haña salbashon.’

¹² Tur hende na e asamblea a keda ketu. E ora ei Barnabas i Pablo a konta na plaka chikí kon pa medio di nan Señor a hasi hopi señal milagroso serka esnan no hudiu.

¹³ Despues ku nan a kaba di papia, Hakobo a tuma palabra i bisa: ‘Rumannan, skucha mi!

¹⁴ Simeon a splika kon Señor un bia kaba a sòru pa esnan ku no ta hudiu i a skohe for di nan un pueblo pa E mes.

¹⁵ Loke tin skibí den e profetanan ta kuadra ku esaki, pasobra Skritura ta bisa:

¹⁶ “Den futuro lo Mi regresá, Señor ta bisa, i lo Mi lanta e kas di David ku a kai den otro. Lo Mi restourá e ruinanan i drech'é atrobe.

¹⁷ Asina restu di humanidat lo buska Señor, tur e nashonnan ku Mi a deklará mi propiedat.

¹⁸ Asina Señor ta bisa, Señor ku a hasi e kosnan akí konosí for di hopi tempu pasá.” ’

¹⁹ Hakobo a sigui bisa: ‘P'esei mi ta di opinion ku no mester imponé un karga difísil riba esnan no hudiu ku aseptá Señor.

²⁰ Ma nos mester skibi nan un karta bisa nan pa keda leu di karni kontaminá pa sakrifisio na dios falsu, di matrimonio prohibí pa Lei, di karni ku sanger aden i di sanger mes.

²¹ Pasobra fo'i mashá tempu ta lesa Lei di Moises tur sabat den snoa pa e hendenan tende i den kada siudat tin hende ku ta predik'é.’

Asamblea ta manda un karta pa e kristiannan no hudiu

²² E ora ei e apòstelnan i e ansianonan, ku aprobashon di henter iglesia, a disidí di skohe algun hende di nan grupo i manda nan Antiokia huntu ku Pablo i Barnabas. Nan a skohe Hudas, tambe yamá Barsabas, i Silas, dos hòmber respetá pa e rumannan.

²³ Iglesia a duna e siguiente karta bai kuné: ‘E apòstelnan i e ansianonan ta kumindá nan rumannan no hudiu di Antiokia, Siria i Silisia.

²⁴ Nos a tende ku algun di nos hendenan, sin niun instrukshon di nos parti, a sali bai bruha boso i kita boso pas.

²⁵ P'esei unánimemente nos a disidí di skohe algun hende i manda nan serka boso huntu ku nos kerido Pablo i Barnabas,

²⁶ hòmbernan ku a riska nan bida pa e kousa di nos Señor Hesu-Kristu.

²⁷ Nos a manda Hudas i Silas, ku lo bisa boso e mesun kosnan ku ta pará den e karta akí en persona.

²⁸ Spiritu Santu i nos a disidí ku no mester imponé niun karga mas pisá riba boso ku no ta e siguiente reglanan nesesario akí.

²⁹ Keda leu di karni kontaminá pa sakrifisio na dios falsu, di kasamentu entre hende di mes famia, di karni ku sanger aden i di sanger mes tambe. Lo bai bon ku boso, si boso evitá tur e kosnan akí. Pasa bon!’

³⁰ E mensaheronan a tuma despedida i bai Antiokia. Aya nan a reuní ku e iglesia i entregá e karta.

³¹ Ora e hendenan a les'é nan a keda kontentu ku e palabra di kurashamentu.

³² Hudas i Silas, ku tabata profeta, tambe a kurashá i fortalesé e rumannan ku un diskurso largu.

³³ Despues di a keda un tempu ei, e rumannan a laga nan bai ku un saludo di pas pa esnan ku a manda nan. [

³⁴ Ma Silas a disidí di keda ei.]

³⁵ Pablo i Barnabas a keda un tempu na Antiokia. Huntu ku hopi otro hende nan tabata instruí i prediká palabra di Señor.

Pablo i Barnabas ta kita for di otro

³⁶ Algun tempu despues Pablo a bisa Barnabas: ‘Ban bèk, ban bishitá e rumannan den kada siudat kaminda nos a prediká palabra di Señor pa nos mira kon kos ta bai ku nan.’

³⁷ Barnabas ker a bai ku Huan Marko.

³⁸ Ma Pablo no ker a bai ku un hende ku fo'i Pamfilia kaba a laga nan na kaya sin a terminá e mishon huntu ku nan.

³⁹ A lanta un pleitu asina fuerte entre nan, ku Pablo i Barnabas a kita for di otro. Barnabas a kohe Marko bai kuné i a nabegá bai Chipre.

⁴⁰ Pablo na su turno a skohe Silas i sali bai, despues ku e rumannan a konfi'é na grasia di Señor.

⁴¹ El a pasa rònt Siria i Silisia kaminda e tabata fortalesé e iglesianan.