1 Timoteo 3 - Beibel na Papiamentu Koriente 2013

Esnan ku por guia iglesia

¹ E palabranan ku ta sigui ta konfiabel: Si un hende ta anhelá pa bira lider di iglesia, ta un bon tarea e ta deseá.

² P'esei un lider di iglesia mester ta ireprochabel: e mester ta fiel na su kasá i hiba un bida moderá; e mester ta huisioso, ku bon manera, hospitalario i kapas pa siña otro hende.

³ E no mester ta buraché òf buskadó di pleitu, pero un hende amabel i pasífiko, ku no ta stima plaka.

⁴ E mester por manehá su kas bon i kria su yunan pa nan ta obedesidu i mustra rèspèt den tur situashon.

⁵ Pasobra si un hòmber no sa kon manehá su kas di famia, ta kon e por kuida iglesia di Dios?

⁶ Esun ku ke bira lider no mester ta un hende resien kombertí tampoko, pa e no hincha di orguyo i haña e mesun kondena ku diabel.

⁷ Ademas e mester ta un hende respetá serka esnan ku no ta pertenesé na iglesia, pa e no pasa bèrgwensa i kai den trampa di diabel.

Esnan ku por sirbi komo diákono

⁸ Diákono tambe mester hiba un bida digno di rèspèt i nan no mester ta kuchú di dos banda; nan no mester ta bisiá na biña, ni hende ku ta kore tras di ganashi deshonesto.

⁹ Nan mester atené nan na e bèrdat revelá ku nos a kere aden, ku un konsenshi limpi.

¹⁰ Ademas nan mester pasa un periodo di prueba promé i si nan proba di ta ireprochabel, laga nan sirbi komo diákono.

¹¹ Meskos tambe e hende muhénan diákono mester hiba un bida digno di rèspèt, no di redashi, pero moderá i fiel den tur kos.

¹² Diákono mester ta fiel na nan kasá i nan mester por manehá nan mes kas i nan yunan bon.

¹³ Pasobra esnan ku ta hasi nan tarea di sirbishi bon ta gana un bon nòmber pa nan mes i tin derechi di papia libremente di fe den Kristu-Hesus.

E bèrdat revelá ku nos a kere aden

¹⁴ Mi ta skibi e instrukshonnan akí pa bo, ku speransa di mira bo pronto.

¹⁵ Pero si mi tarda, e karta akí ta pa bo sa kon hende mester komportá nan komo miembro di e famia di Dios, esta den iglesia di e Dios bibu, e iglesia ku ta pilá i sosten di bèrdat.

¹⁶ No tin duda ku e bèrdat revelá di nos fe ta impreshonante: Kristu-Hesus a bini den mundu, débil manera hende, deklará den shelu di ta vensedor, dor di Spiritu Santu, mirá pa angel, i proklamá na tur nashon, aseptá ku fe pa hende rònt mundu i tumá den gloria di shelu.