1 Huan 1 - Beibel na Papiamentu Koriente 2013

Palabra di Bida

¹ Nos ta skibi boso tokante Esun ku ta e Palabra di Bida. Loke tabata eksistí for di prinsipio, nos a tende i nos a mira ku nos mes wowo; nos a kontempl'É i ku nos mes man nos a mishi kunÉ.

² E Bida akí a bira visibel. E Bida eterno ku tabata huntu ku Tata i a keda revelá na nos, nos a mira, nos ta testiguá di djE i ta proklam'É na boso.

³ Ta loke nos a mira i tende nos ta proklamá na boso, pa boso por tin komunion ku nos, meskos ku nos tin komunion ku Tata i ku su Yu Hesu-Kristu.

⁴ Nos ta skibi boso esaki, pa nos alegria por ta kompleto.

Dios ta lus

⁵ Esaki ta e mensahe ku nos a tende di Dios su Yu i ku nos ta anunsiá na boso: Dios ta lus i den djE no tin niun tiki skuridat.

⁶ Si nos ta bisa ku nos tin komunion kunÉ, ma ta biba den skuridat, nos ta gaña i no ta praktiká bèrdat.

⁷ Ma si nos ta biba den lus, manera Dios ta den lus, nos lo tin komunion ku otro, i sanger di Hesus, su Yu, ta purifiká nos di tur piká.

⁸ Si nos ta bisa ku nos no tin piká, ta nos mes nos ta gaña i nos no tin bèrdat den nos.

⁹ Pero si nos atmití nos pikánan abiertamente, Dios ku ta fiel i hustu ta pordoná nos e pikánan ei i purifiká nos di tur tur maldat.

¹⁰ Si nos ta bisa ku nos no a peka, nos ta hasi manera ta Dios ta gañadó i su palabra no ta den nos.