Yudas 1 - Perjanjian Baru Bahasa Melayu Maluku Utara

Yudas pe salam

¹ Sudara-sudara, ngoni yang Tuhan Allah torang pe Bapa so pangge untuk iko pa Dia, yang Dia sayang, deng yang Dia salalu jaga sampe Yesus Kristus datang ulang. Salam dari kita Yudas. Kita ini Yakobus pe sudara, deng kita me yang jaga biking apa yang Yesus Kristus suru.

² Kita minta pa Tuhan Allah supaya Dia kase tunju Dia pe rasa kasiang pa ngoni, Dia biking ngoni pe hati tetap tenang, deng Dia sayang pa ngoni, kong biar samua itu Dia kase talebe-lebe untuk ngoni.

Ati-ati deng orang yang bawa ajaran yang tara butul

³ Sudara-sudara yang kita sayang, sementara kita tulis surat pa ngoni tentang slamat yang torang so tarima, kita rasa ada yang musti kita tulis kamuka, supaya ngoni berusaha butul-butul untuk tetap batahang deng ngoni pe percaya. Kong ngoni pe percaya itu musti iko Tuhan Allah pe ajaran yang Dia so kase satu kali untuk slama-lamanya pa torang yang so jadi Dia pe umat.

⁴ Barang, ada orang-orang yang bawa ajaran yang tara butul yang so maso pa ngoni pe jemaat, tapi ngoni tara sadar. Dorang itu tara iko Tuhan Allah pe mau. Dorang memang so tarima ajaran tentang torang pe Tuhan Allah pe bae, tapi dorang kase putar bale ajaran itu la orang bisa iko dorang pe napsu yang tara bae. Deng dorang me manyangkal, Yesus Kristus yang cuma satu itu saja torang pe Tuhan, yang berkuasa pa samua-samua. Orang-orang model bagini, dari dulu ada tatulis di Kitab Suci, dorang memang akan dapa hukuman.

⁵ Samua yang kita bilang ini ngoni so tau, tapi kita akan kase inga lagi: Tuhan Allah pasti kase hukuman pa orang yang biking jahat. Dulu, Tuhan Allah kase bebas pa orang-orang Israel dari bangsa Mesir yang jaja pa dorang, tapi abis itu, dari dorang ada yang tara percaya lagi pa Tuhan, jadi Dia kase mati pa dorang itu.

⁶ Bagitu lagi deng malaekat-malaekat. Tuhan Allah so kase kuasa pa dorang, tapi ada dia pe batas. Cuma ada dari malaekat-malaekat itu yang tara puas deng dong pe batas kuasa yang Tuhan Allah kase, jadi dorang kaluar kase tinggal dong pe tampa tinggal di sorga. Malaekat-malaekat itu, Tuhan Allah ika pa dorang deng rante yang tara bisa talapas, kong tahang pa dorang di tampa yang paling galap, sampe di waktu Tuhan mo adili pa manusia.

⁷ Bagitu lagi yang jadi di kota Sodom deng Gomora, deng kota-kota laeng yang baku dekat deng dua kota itu. Orang-orang di kota-kota itu jaga baseks sabarang, deng baseks iko napsu yang tara pantas dorang biking. Karna itu, dorang dapa hukuman di api yang tara mati-mati, kong itu jadi conto untuk kase inga pa samua orang, orang jahat pasti mo dapa hukum dari Tuhan.

⁸ Bagitu lagi yang akan jadi pa orang-orang yang bawa ajaran yang tara butul skarang ini. Dorang bilang kata, dong dapa mimpi-mimpi dari Tuhan Allah yang kase bae dorang biking hal-hal kotor deng dorang pe badan, iko dong pe napsu tara bae sandiri. Dorang ini pandang enteng Tuhan Allah pe kuasa, deng dong so bicara tara bae tentang samua yang luar biasa yang ada di sorga.

⁹ Padahal, Mikhael yang jadi pemimpin malaekat di sorga me tara barani sama deng dorang. Waktu dia baku malawang deng Iblis tentang Musa pe mayat, Mikhael tara bicara yang tara bae untuk kase sala pa Iblis, setang-setang pe raja itu. Tapi dia cuma bilang bagini, “Biar suda, nanti Tuhan Allah yang togor pa ngana!”

¹⁰ Tapi orang-orang yang bawa ajaran tara butul itu, dorang bicara tara bae tentang samua ajaran yang dong tara mangarti. Dorang itu pe kalakuang sama deng binatang. Dorang itu tara bapikir, tapi iko saja apa yang dong pe badan pe mau. Itu yang nanti biking dong dapa hukuman tapisa deng Tuhan Allah slama-lamanya.

¹¹ Cilaka suda dorang! Tuhan Allah akan kase hukuman pa dorang nanti karna dorang orang yang jahat macam deng Kain. Dorang me berdosa sama deng Bileam, yang bawa orang Israel biking dosa cuma karna golojo doi. Kong dorang me sama deng Korah yang malawang pa Tuhan Allah, jadi dorang akan dapa hukuman lagi.

¹² Waktu ngoni jemaat bakumpul makang untuk inga Tuhan Allah pe sayang, orang-orang yang bawa ajaran tara butul itu kase rusak ngoni pe acara itu. Itu sama deng dorang jadi noda di acara itu. Waktu itu dorang makang tara malu-malu, golojo lagi, deng cuma pikir diri sandiri. Dorang sama deng awan yang bapinda karna angin tiop kong tara jadi ujang. Dorang me sama deng pohong-pohong yang tara babua di musim babua, yang tacabu sampe dia pe akar-akar kong mati.

¹³ Dorang tara tau malu kase lia dong pe kalakuang yang tara bae, sama deng omba basar yang kase tinggal kotor-kotor di pante. Dorang me sama deng bintang-bintang yang bapinda kasana-kamari. Jadi untuk dorang itu, so tasadia tampa yang paling galap untuk slama-lamanya.

¹⁴ Dulu, Henokh, Adam pe turunan yang ketuju, ada bilang apa yang Tuhan Allah pasáng pa dia bagini, “Perhatikan e, Tuhan mo datang deng Dia pe malaekat-malaekat kudus deng ribu.

¹⁵ Dia datang untuk adili pa samua orang, deng Dia lagi mo hukum pa orang-orang yang tara semba pa Tuhan Allah karna samua dong pe kalakuang yang tara iko Tuhan Allah pe mau deng samua dong pe kata-kata kasar tentang Tuhan.”

¹⁶ Orang-orang itu cuma mengelu-mengelu deng suka kase sala orang laeng. Dorang hidup cuma iko dong pe keinginan tara bae. Dorang pe bicara angka-angka dong pe diri sandiri, kong suka cari muka deng baambe hati di orang la dorang dapa untung.

Orang percaya musti kase kuat dong pe percaya

¹⁷ Tapi ngoni sudara-sudara yang kita sayang, inga apa yang torang pe Tuhan Yesus Kristus pe utusan-utusan so perna bilang.

¹⁸ Dorang bilang, nanti waktu so mo kiamat, akan datang orang-orang yang suka bahina torang pe percaya. Dorang itu akan hidup iko dong pe napsu yang baku lawan deng Tuhan Allah pe mau.

¹⁹ Dorang itu yang jaga biking orang laeng baku-baku malawang sampe jadi tapisa-pisa. Dalam dorang pe diri tara ada Roh Kudus, dong pe hidup cuma iko dong pe keinginan-keinginan yang tara bae.

²⁰ Tapi ngoni sudara-sudara yang kita sayang, kase kuat ngoni pe hati supaya ngoni pe percaya pa Tuhan lebe tamba kuat, karna ajaran yang torang percaya itu butul-butul suci. Kong kase biar Roh Kudus yang pimpin pa ngoni waktu ngoni berdoa.

²¹ Tuhan Allah sayang pa ngoni, jadi ngoni musti tetap yakin Dia pe sayang itu. Ngoni me musti tunggu-tunggu Yesus Kristus torang pe Tuhan datang ulang. Waktu Dia datang ulang, Dia mo kase tunju Dia pe rasa kasiang pa torang supaya torang bole hidup deng Tuhan Allah slama-lamanya.

²² Ngoni me musti kase tunju ngoni pe rasa kasiang, deng bantu pa orang-orang yang masi ragu pa Tuhan.

²³ Ngoni me musti tolong pa orang-orang yang mo dapa hukuman dari Tuhan supaya dorang bole slamat. Ngoni biking bagitu sama deng ngoni so hela pa dorang kaluar dari api. Kase tunju ngoni pe rasa kasiang pa orang-orang berdosa, tapi ngoni musti ati-ati supaya ngoni tara iko biking dosa sama deng dorang. Dosa yang ada pa dong pe diri itu ngoni binci sama deng ngoni tara suka lia pakeang kotor.

Yudas berdoa deng puji pa Tuhan Allah

²⁴ Tuhan Allah ada kuasa untuk jaga pa ngoni supaya ngoni tara taiko biking dosa. Dia me biking ngoni jadi orang yang tara sala apa-apa, kong bawa pa ngoni badiri deng hati yang paling sanang di Dia pe muka yang hebat itu.

²⁵ Jadi puji deng hormat suda pa Tuhan Allah, Dia itu cuma satu. Dia yang kase slamat pa torang dari torang pe dosa karna Yesus Kristus torang pe Tuhan. Tuhan Allah pe kuasa paling basar, tara ada yang bisa lawan, deng Dia yang berkuasa untuk ator samua-samua yang ada di dunia ini. Dia tetap bagitu, mulai dari dunia ini bolong ada, skarang deng sampe slama-lamanya. Amin.