Yohanes 2 - Perjanjian Baru Bahasa Melayu Maluku Utara

Yesus biking mujizat waktu ada pesta kawing di Kana

¹ Dia pe lusa, ada pesta kawing di kampong Kana di daera Galilea. Yesus pe mama ada di pesta itu.

² Yesus deng Dia pe murit-murit dapa undang maso di pesta kawing itu.

³ Waktu pesta masi bajalang, dorang pe minuman anggur abis. Turus Yesus pe mama bilang pa Yesus, “Dorang pe anggur so tara cukup.”

⁴ Kong Yesus bilang pa Dia pe mama, “Mama, jang bilang bagitu pa Kita. Bolong sampe dia pe waktu untuk Kita kase tunju Kita pe kuasa.”

⁵ Tapi Yesus pe mama suru pa orang-orang karja, “Ngoni biking apa saja yang Dia bilang pa ngoni.”

⁶ Di situ ada anam tampayang yang ada biking dari batu. Tampayang-tampayang itu kalu isi aer, satu tampayang dia pe banya kira-kira saratus liter. Tampayang-tampayang itu dong jaga taru untuk biking bersi tamu pe tangan iko agama Yahudi pe aturan, la jang jadi najis.

⁷ Yesus bilang pa orang-orang karja itu, “Isi suda tampayang-tampayang itu kase ponong deng aer.” Kong dorang isi sampe ponong.

⁸ Abis itu, Yesus bilang pa dorang, “Skarang falo suda sadiki aer itu di galas kong kase pa tuang pesta.” Kong dorang falo aer itu kong dong bawa pa tuang pesta.

⁹ Sampe di sana, tuang pesta rasa aer yang so jadi anggur itu tapi dia tara tau dari mana dong dapa anggur itu. Cuma orang-orang karja itu yang tau anggur itu dari mana. Turus tuang pesta itu pangge pa pengantin laki-laki,

¹⁰ kong bilang pa dia, “Biasa kalu orang biking pesta, dorang kase anggur yang paling bagus kamuka. Nanti kalu tamu so puas minum, baru kase kaluar anggur biasa. Tapi yang ngana biking ini laeng. Nanti so terahir baru ngana kase kaluar anggur yang paling bagus ini.”

¹¹ Mujizat yang Yesus biking di Kana di daera Galilea, itu jadi Yesus pe mujizat yang pertama. Deng mujizat itu, Yesus so kase tunju Dia pe kuasa yang hebat sampe Dia pe murit-murit jadi percaya pa Dia.

¹² Abis pesta kawing itu, Yesus pigi di kota Kapernaum sama-sama deng Dia pe mama, Dia pe sudara-sudara deng Dia pe murit-murit lagi. Dorang tinggal di sana babarapa hari.

Yesus user pa orang-orang yang bajual di Ruma Ibada Pusat pe kompleks

¹³ Waktu itu, agama Yahudi pe hari raya Paska so dekat. Di hari raya itu, dorang inga waktu Tuhan Allah kase bebas pa dorang pe orang tua dulu-dulu yang dapa jaja dari bangsa Mesir. Kong Yesus pigi di Yerusalem.

¹⁴ Di Ruma Ibada Pusat pe kompleks, Yesus lia ada orang-orang yang bajual sapi, domba deng burung pombo untuk orang bili kong kase di imam la bakar jadi dong pe korban persembahan di Ruma Ibada Pusat itu. Di situ ada lagi orang yang dong pe karja tukar doi supaya orang asing yang datang bole biking dong pe persembahan pa Tuhan Allah deng bole babayar dong pe tanggung jawab.

¹⁵ Kong Yesus ambe tali panjang kong biking cambok, turus Dia pake la user pa samua orang di situ deng dorang pe sapi deng domba. Kong Dia kase tabale meja-meja dari orang-orang yang kase tukar doi sampe dong pe doi me tataambur.

¹⁶ Kong Dia bilang pa orang-orang yang jaga bajual burung pombo bagini, “Bawa kaluar samua ini dari sini. Jang ngoni biking Kita pe Bapa pe ruma jadi tampa bajual!”

¹⁷ Waktu Yesus pe murit-murit lia Yesus user orang di Ruma Ibada Pusat pe kompleks, dorang dapa inga di kitab Mazmur. Di kitab Mazmur itu Tuhan Allah bajanji, nanti ada Orang yang Dia utus akan bilang bagini, “Kita cinta Tuhan Allah pe Ruma. Kita pe cinta itu tabakar sama deng api di Kita pe hati.”

¹⁸ Pe lia Yesus user orang-orang di Ruma Ibada Pusat itu, pemimpin-pemimpin agama Yahudi datang kong bilang pa Yesus, “Kalu memang Bapa ada hak biking bagitu, coba Bapa biking mujizat satu la tong tau!”

¹⁹ Yesus jawab, “Kita tara kase mujizat, tapi ini yang Kita mo biking supaya ngoni tau kita ada hak: coba kase rubu Ruma Ibada Pusat ini. Dia pe tiga hari, Kita akan kase badiri ulang.”

²⁰ Kong pemimpin-pemimpin agama Yahudi itu bilang lagi pa Yesus, “Apa? Orang ada kase badiri Ruma Ibada Pusat ini ampa pulu anam taong, kong Bapa bilang cuma dalam tiga hari mo kase badiri ini lagi?”

²¹ Tapi Yesus pe maksut deng bilang Ruma Ibada Pusat itu, bukang Ruma Ibada Pusat yang di Yerusalem itu, tapi Dia pe badan sandiri.

²² Jadi nanti, abis Dia mati deng hidup ulang, Dia pe murit-murit dapa inga yang Dia perna bilang ini, kong dorang lagi percaya Kitab Suci deng kata-kata yang Yesus so bilang.

Yesus tau manusia pe hati

²³ Waktu Yesus masi di Yerusalem iko agama Yahudi pe hari raya Paska itu, ada banya orang yang percaya pa Dia, karna dorang lia mujizat-mujizat yang Dia biking.

²⁴ Tapi Yesus sandiri tara percaya pa dorang, karna Dia tau samua manusia pe hati.

²⁵ Kong tara perlu lagi orang kase tau pa Dia tentang manusia, karna Dia tau manusia pe dalam hati.