Yohanes 13 - Perjanjian Baru Bahasa Melayu Maluku Utara

Yesus cuci Dia pe murit-murit pe kaki

¹ Tinggal satu hari lagi orang agama Yahudi pe hari raya Paska so mo mulai. Hari raya itu dorang inga waktu Tuhan Allah kase bebas pa dorang pe orang tua dulu-dulu yang dapa jaja dari bangsa Mesir. Kong Yesus tau, so tara lama lagi Dia mo kase tinggal dunia ini la mo pigi pa Dia pe Bapa di sorga. Dia sayang pa orang-orang di dunia yang so jadi Dia pe umat, kong skarang Dia mo kase tunju, Dia salalu sayang pa dorang sampe Dia pe ahir hidup.

² Yesus deng Dia pe murit-murit sementara makang malam sama-sama. Waktu dorang bolong makang, Iblis, setang-setang pe raja so taru pikiran jahat pa Yudas pe hati. Yudas itu Simon Iskariot pe ana. Iblis pengaru pa dia supaya bahianat pa Yesus.

³ Yesus tau Dia pe Bapa so kase samua kuasa pa Dia. Dia me tau Dia itu datang dari Tuhan Allah, Dia pe Bapa, kong Dia lagi nanti mo bale ulang pa Tuhan Allah.

⁴ Jadi waktu dorang makang sama-sama itu, Yesus badiri kong buka Dia pe juba. Turus Dia ambe kaeng kong kase ika pa Dia pe pinggang.

⁵ Abis itu, Dia saleng aer di loyang satu kong Dia mulai cuci Dia pe murit-murit pe kaki. Turus, Dia lap dorang pe kaki deng kaeng yang Dia ada kase ika pa Dia pe pinggang itu.

⁶ Kong waktu Yesus sampe pa Simon Petrus la mo cuci Petrus pe kaki, Petrus bilang pa Yesus, “Tuhan, masa Tuhan mo cuci kita pe kaki?”

⁷ Yesus bilang pa Petrus, “Apa yang Kita biking ini, ngana bolong mangarti skarang. Tapi satu hari nanti ngana akan mangarti.”

⁸ Petrus bilang lagi, “Tuhan, biar sampe tempo apa lagi kita tara kase biar Tuhan mo cuci kita pe kaki.” Tapi Yesus jawab pa Petrus, “Kalu Kita tara cuci ngana pe kaki, ngana tara ada hubungan deng Kita.”

⁹ Kong Simon Petrus bilang, “Tuhan, kalu bagitu, jang cuma kita pe kaki saja, tapi deng kita pe tangan deng kapala lagi!”

¹⁰ Yesus bilang pa dia, “Orang yang so mandi, dia pe badan itu so bersi samua. Cuma dia pe kaki saja yang kotor jadi musti mo cuci ulang. Ngoni so bersi, tapi bolong samua ngoni yang bersi.”

¹¹ Yesus bilang bagitu, karna Dia so tau, sapa yang mo bahianat pa Dia. Itu dia pe sebab sampe Dia bilang, “Tara samua dari ngoni itu yang bersi.”

¹² Waktu Yesus so abis cuci dorang samua pe kaki, Dia pake ulang Dia pe juba turus Dia bale dudu ulang pa Dia pe tampa dudu yang tadi. Kong Dia tanya pa dorang, “Ngoni mangarti ka tarada yang Kita biking tadi pa ngoni?”

¹³ Ngoni pangge pa Kita ‘Guru’ deng ‘Tuhan’, kong memang itu butul skali, Kita ini ngoni pe Guru deng ngoni pe Tuhan.

¹⁴ Jadi, kalu Kita yang jadi ngoni pe Tuhan deng ngoni pe Guru saja biking diri sama deng pembantu untuk cuci ngoni pe kaki, ngoni lagi musti biking ngoni pe diri sama deng pembantu untuk cuci ngoni pe kaki satu deng yang laeng.

¹⁵ Kita so kase conto pa ngoni, jadi ngoni lagi musti biking sama deng yang Kita so biking pa ngoni.

¹⁶ Inga bae-bae conto ini. Orang karja tara lebe penting dari dia pe tuang, bagitu lagi deng orang yang dapa utus, tara lebe penting dari orang yang utus pa dia.

¹⁷ Skarang ini, ngoni so tau yang Kita so kase ajar pa ngoni, jadi ngoni lagi musti iko Kita pe conto untuk layani orang supaya ngoni butul-butul sanang.

¹⁸ Tapi tara samua ngoni yang mo butul-butul sanang. Memang Kita yang pili pa ngoni samua, jadi Kita lagi tau ada satu dari ngoni yang mo bahianat pa Kita. Tapi Kita pili pa dia, supaya apa yang Tuhan Allah so bilang di Kitab Suci dulu itu mo jadi. Ini yang Dia bilang, ‘Sapa yang makang Kita pe roti, nanti dia itu yang mo bahianat pa Kita.’

¹⁹ Kita bilang skarang itu pa ngoni sebelum dia bahianat, supaya kalu itu mo jadi, ngoni percaya Kita ini suda Dia yang Tuhan Allah janji mo datang untuk kase slamat pa manusia.

²⁰ Inga bae-bae yang Kita bilang ini. Sapa saja yang tarima pa orang-orang yang Kita utus, itu berarti dia so tarima lagi pa Kita. Kong sapa saja yang tarima pa Kita, itu berarti orang itu so tarima pa Bapa yang utus pa Kita.

Yesus kase tau tentang Yudas yang mo bahianat pa Dia

²¹ Abis Yesus bilang bagitu, Dia pe hati jadi sedi skali kong Dia kase tau pa Dia pe murit-murit, “Inga bae-bae yang Kita bilang ini, ada satu orang dari ngoni yang akan mo bahianat pa Kita.”

²² Kong Dia pe murit-murit baku haga. Dorang jadi bingung, barang dorang tara tau yang Yesus maksut itu sapa.

²³ Di situ, ada murit satu yang Yesus paling sayang. Murit itu ada dudu dekat skali deng Yesus.

²⁴ Simon Petrus bakode pa murit itu supaya murit itu tanya pa Yesus, sapa yang mo bahianat pa Yesus.

²⁵ Kong murit itu badekat pa Yesus untuk tanya pa Dia, “Tuhan, yang Tuhan pe maksut itu sapa?”

²⁶ Yesus jawab, “Nanti kalu Kita mo colo roti di dalam mangko satu kong Kita kase pa satu orang, dia itu suda yang Kita maksut itu.” Pe abis bilang bagitu, Yesus ambe roti kong colo, turus Dia kase pa Yudas. Yudas itu Simon Iskariot pe ana.

²⁷ Abis Yudas tarima roti itu, Iblis maso kong kuasai pa dia. Turus Yesus bilang pa dia, “Apa yang ngana mo biking, biking suda capat.”

²⁸ Tapi tara ada satu dari dorang yang dudu makang itu mangarti, bikiapa kong Yesus bilang bagitu pa Yudas.

²⁹ Tapi karna Yudas yang pegang doi kas, ada babarapa murit yang pikir kaapa Yesus suru dia pigi bili apa-apa untuk dorang pe keperluan hari raya. Dorang pikir lagi Yudas mo kase sumbangan pa orang-orang miskin.

³⁰ Waktu Yudas so tarima roti itu dari Yesus, dia langsung pigi kaluar. Waktu itu so malam.

Yesus pe parenta baru pa Dia pe murit-murit

³¹ Waktu Yudas so pigi, Yesus bilang, “Ada yang mo jadi skarang yang biking Anak Manusia yang dari sorga mo dapa puji deng hormat, kong deng bagitu Tuhan Allah me mo dapa puji deng hormat.

³² Kong kalu orang lia Tuhan Allah dapa puji deng hormat bagitu, Tuhan Allah lagi mo biking orang-orang mo puji deng hormat pa Anak Manusia, kong so tara lama lagi samua itu mo jadi.

³³ Ee, Kita pe ana-ana, so tara lama lagi Kita so tara sama-sama deng ngoni. Ngoni ini mo cari pa Kita, tapi sama deng tempo hari Kita so bilang pa pemimpin-pemimpin agama Yahudi, Kita bilang itu lagi pa ngoni, ‘Di tampa yang Kita mo pigi, ngoni tara akan bisa mo pigi di situ.’

³⁴ Skarang, Kita mo kase parenta yang baru pa ngoni, bagini: ngoni ini musti baku sayang. Ngoni musti baku sayang sama deng Kita so sayang pa ngoni.

³⁵ Kalu ngoni baku sayang, ngoni so biking apa yang Kita so kase ajar, jadi samua orang bole tau, ngoni ini butul-butul Kita pe murit-murit.”

Yesus kase tau kamuka, Petrus mo manyangkal bilang tara kanal pa Yesus

³⁶ Simon Petrus bilang pa Yesus, “Tuhan, Tuhan mo pigi ka mana kong?” Yesus jawab pa dia, “Kita mo pigi di tampa yang skarang ini ngana bolong bole iko. Tapi nanti baru ngana mo iko pa Kita ka sana.”

³⁷ Petrus bilang pa Yesus, “Tuhan, bikiapa kong skarang kita bolong bole mo iko pa Tuhan? Kita so siap mati untuk Tuhan.”

³⁸ Turus Yesus jawab bagini, “Ngana bilang, ngana siap mati untuk Kita? Inga bae-bae yang Kita bilang ini. Malam ini sebelum ayam bakuku, ngana so manyangkal tiga kali, bilang ngana tara kanal pa Kita.”