Yohanes 11 - Perjanjian Baru Bahasa Melayu Maluku Utara

Lazarus mati

¹ Ada laki-laki satu yang saki barát. Dia pe nama Lazarus. Dia tinggal di kampong Betania, sama-sama deng dia pe kaka parampuang dua. Dorang dua pe nama, Maria deng Marta.

² Maria itu yang siram minya wangi pa Tuhan Yesus pe kaki kong goso pake dia pe rambu.

³ Kong karna Lazarus saki barát, Lazarus pe sudara parampuang dua itu suru orang pigi kase kabar pa Yesus, bilang, “Tuhan, Tuhan pe tamang yang Tuhan sayang itu, ada saki barát.”

⁴ Waktu Yesus dengar kabar itu, Dia bilang, “Lazarus pe panyake itu tara akan biking dia mati. Tapi dia saki bagitu supaya nanti orang bole lia Tuhan Allah pe kuasa yang hebat. Kong deng dia pe saki itu, orang mo puji deng hormat pa Anak Allah.”

⁵ Yesus memang sayang pa Marta, Maria deng Lazarus.

⁶ Tapi waktu Yesus dengar Lazarus saki, Dia sangaja balama di tampa yang Dia ada tinggal itu selama dua hari.

⁷ Pe lewat dua hari itu, baru Dia bilang pa Dia pe murit-murit, “Mari suda torang bale ulang di daera Yudea.”

⁸ Tapi dorang bilang pa Dia, “Guru, bolong lama ini orang-orang Yahudi di sana mo lempar pa Guru deng batu la mo kase mati to? Kong bikiapa skarang Guru masi mo bale lagi ka sana?”

⁹ Turus, Yesus jawab pa dorang pake umpama satu bagini, “Jang ngoni tako. Kalu siang itu ada dua blas jam to? Jadi sapa yang bajalang siang-siang, dia pe kaki tara akan tagate, barang dia lia yang kase tarang dunia ini.

¹⁰ Tapi kalu orang bajalang malam-malam, dia pe kaki pasti tagate, barang pa dia tara ada tarang.”

¹¹ Abis Yesus bilang bagitu, Dia kase turus Dia pe bicara pa dorang, “Torang pe tamang Lazarus itu so tidor, tapi Kita mo ka sana kase bangun pa dia.”

¹² Kong Yesus pe murit-murit bilang pa Dia, “Tuhan, kalu memang Lazarus ada tidor, dia pasti mo sembu.”

¹³ Padahal, waktu Yesus bilang Lazarus tidor itu, sebenarnya Yesus pe maksut Lazarus itu so mati. Tapi murit-murit kira kata, Lazarus ada tidor biasa saja.

¹⁴ Jadi, Yesus bilang pa dorang deng turus tarang bagini, “Sebenarnya Lazarus so mati.

¹⁵ Tapi Kita sanang Kita tara ada di situ waktu dia mati, karna itu ada dia pe untung untuk ngoni. Barang, apa yang mo jadi nanti, akan biking ngoni lebe percaya pa Kita. Mari suda torang pigi pa Lazarus skarang.”

¹⁶ Kong ada murit satu yang pe nama Tomas, yang orang jaga pangge ‘Kambar’ itu. Dia bilang pa murit-murit yang laeng, “Mari suda torang pigi deng Guru di daera Yudea, supaya torang mati sama-sama deng Dia.”

Yesus itu yang kase hidup ulang orang mati

¹⁷ Waktu Yesus deng Dia pe murit-murit so dekat kampong Betania, Yesus dapa tau, Lazarus pe mayat so ampa hari dapa kubur.

¹⁸ Kampong Betania itu tara jao dari kota Yerusalem, dia pe jao kira-kira tiga kilo.

¹⁹ Jadi banya orang agama Yahudi dari Yerusalem so datang pa Marta deng Maria untuk hibur pa dorang, barang dong dua pe sudara Lazarus so mati.

²⁰ Waktu Marta dapa dengar Yesus ada datang, dia kaluar pigi baku dapa deng Yesus, tapi Maria tetap tinggal di dalam ruma.

²¹ Bagitu baku dapa deng Yesus, Marta bilang pa Dia, “Tuhan, kalu Tuhan ada di sini, pasti kita pe sudara tara mati.

²² Tapi skarang me kita tau, apa saja yang Tuhan minta pa Tuhan Allah, Dia pasti kase.”

²³ Yesus bilang pa Marta, “Ngana pe ade akan hidup ulang.”

²⁴ Turus Marta bilang pa Yesus, “Kita tau, Lazarus mo hidup ulang, tapi nanti di hari kiamat, waktu samua orang yang mati akan hidup ulang.”

²⁵ Tapi Yesus bilang lagi pa Marta, “Kita ini yang kase hidup ulang pa orang yang so mati, deng yang bole kase orang hidup deng Tuhan Allah slama-lamanya. Jadi, sapa yang percaya pa Kita, biar lagi dia so mati, nanti dia mo hidup ulang.

²⁶ Kong tiap orang yang hidup deng yang percaya pa Kita, dia itu tara akan mati slama-lamanya.” Turus Yesus tanya pa Marta, “Marta, ngana percaya yang Kita bilang ini?”

²⁷ Marta jawab pa Yesus, “Iyo Tuhan. Kita percaya Tuhan itu Anak Allah yang akan datang di dunia ini, deng Tuhan itu lagi Mesias, Raja yang Tuhan Allah janji mo kase slamat pa manusia.”

Yesus manangis

²⁸ Abis Marta bilang bagitu pa Yesus, dia bale di dia pe ruma kong pangge pa dia pe sudara Maria, turus babisi pa Maria, “Guru so datang, kong Dia pangge pa ngana.”

²⁹ Pe dengar itu, Maria langsung badiri kong pigi baku dapa deng Yesus.

³⁰ Tapi waktu itu, Yesus bolong maso di kampong. Dia masi ada di tampa yang Dia ada baku dapa deng Marta tadi.

³¹ Kong di ruma itu, ada banya orang agama Yahudi yang so datang untuk hibur pa Maria. Waktu dorang lia Maria badiri kong pigi kaluar, dong iko pa dia, barang dong kira dia mo pigi di kubur la manangis di sana.

³² Pe sampe di tampa Yesus ada, Maria lia pa Yesus, dia langsung berlutut pa Yesus kong bilang bagini, “Tuhan, kalu tuhari Tuhan ada di sini, pasti kita pe ade tara mati.”

³³ Waktu Yesus lia Maria manangis sedi skali, deng orang-orang agama Yahudi yang datang sama-sama deng Maria, dorang lagi manangis, Yesus pe hati jadi susa skali. Kong deng sedi skali Dia bilang,

³⁴ “Ngoni kubur di mana pa dia?” Dorang bilang pa Yesus, “Mari Tuhan, torang pigi lia.”

³⁵ Kong Yesus manangis.

³⁶ Babarapa orang Yahudi yang ada di situ bilang, “Coba lia, Dia paling sayang pa Lazarus.”

³⁷ Tapi ada yang laeng bilang, “Dia bisa kase sembu orang buta. Masa Dia tara mampo kase sembu pa Lazarus supaya jang dia mati!”

Yesus kase hidup ulang pa Lazarus

³⁸ Waktu Yesus pigi di Lazarus pe kubur itu, Dia pe hati jadi sedi skali. Tampa yang dong kubur pa Lazarus itu ada di goa, kong kubur itu pe pintu dong tutu deng batu basar satu.

³⁹ Sampe di sana, Yesus bilang, “Sorong batu itu.” Tapi Marta, Lazarus pe sudara itu bilang, “Tuhan, so ampa hari ini dia mati, pasti dia so bobou skali.”

⁴⁰ Yesus bilang, “Kita so bilang pa ngana tadi to? Kalu ngana percaya pa Kita, ngana akan lia Tuhan Allah pe kuasa yang hebat.”

⁴¹ Jadi dorang sorong batu itu. Turus Yesus mangada ka atas kong bilang, “Bapa, Kita bilang tarimakasi banya pa Bapa karna Bapa so dengar pa Kita.

⁴² Kita tau, Bapa salalu dengar pa Kita, tapi karna banya orang di sini, jadi Kita bilang deng suara kuat, supaya dorang percaya Bapa yang so utus pa Kita.”

⁴³ Abis Yesus bilang bagitu, Dia pangge pa Lazarus kuat-kuat, “Lazarus, kaluar kamari!”

⁴⁴ Kong Lazarus yang so mati itu kaluar. Dia pe tangan deng kaki masi talingkar deng kaeng puti yang dong biasa pake untuk bungkus orang mati, kong dia pe muka ada tatutu deng kaeng lagi. Turus Yesus bilang pa dorang, “Buka suda kaeng-kaeng itu supaya dia bole bajalang.”

Pemimpin-pemimpin agama Yahudi baku ator mo bunu pa Yesus

⁴⁵ Waktu orang-orang agama Yahudi yang datang hibur pa Maria lia apa yang Yesus biking itu, banya dari dorang yang jadi percaya pa Yesus.

⁴⁶ Tapi ada dari dorang yang pigi balapor pa orang-orang Yahudi dari aliran Farisi, kase carita tentang apa yang Yesus so biking itu.

⁴⁷ Pe dengar itu, orang-orang dari aliran Farisi deng imam-imam kapala, dorang pangge pa pemimpin-pemimpin agama Yahudi pe kumpulan yang paling tinggi yang jaga adili orang. Kumpulan itu pe nama Mahkama Agama. Kong dorang bilang, “Apa yang torang musti biking deng Orang ini? Barang Dia so biking banya mujizat.

⁴⁸ Kalu torang kase biar pa Dia, samua orang Yahudi akan jadi percaya pa Dia, kong dorang mo biking Dia jadi dong pe raja. Dia pe ahir kabawa, pemerinta Roma yang jaja pa torang bangsa Yahudi akan suru dorang pe tentara-tentara datang la kase ancor torang pe Ruma Ibada Pusat deng tong pe bangsa lagi.”

⁴⁹ Tapi ada satu orang dari dorang agama Yahudi pe pemimpin yang pe nama Kayafas. Dia yang jadi imam basar taong itu. Kayafas bilang pa dorang, “Ngoni ini tara tau apa-apa.

⁵⁰ Ngoni tara sadar, supaya torang samua orang bangsa Yahudi tara mati, lebe bae satu orang saja yang mati untuk torang samua.”

⁵¹ Kayafas bilang bagitu, itu bukang dari dia pe pikiran sandiri. Tapi karna Kayafas yang jadi imam basar di taong itu, Tuhan Allah biking dia kase tau Tuhan Allah pe pasáng itu, yang pe arti, Yesus mati untuk orang bangsa Yahudi.

⁵² Kong bukang cuma untuk bangsa Yahudi saja, tapi Dia mati untuk samua orang yang mo jadi Tuhan Allah pe umat, supaya dorang di samua bangsa yang tapisa-pisa bole jadi satu.

⁵³ Mulai hari itu suda, pemimpin-pemimpin agama Yahudi baku ator la mo bunu pa Yesus.

⁵⁴ Jadi, Yesus tara tinggal lagi di orang Yahudi pe daera supaya orang tara dapa lia lagi pa Dia. Dari situ, Dia bajalang pigi di kota satu yang pe nama Efraim. Kota itu dekat deng padang gurun. Di situ, Dia tinggal sama-sama deng Dia pe murit-murit.

⁵⁵ Waktu itu, orang agama Yahudi pe hari raya Paska so dekat. Hari raya itu dong inga waktu Tuhan Allah kase bebas pa dorang pe orang tua dulu-dulu yang dapa jaja dari bangsa Mesir. Jadi sebelum hari raya itu, banya orang agama Yahudi dari daera-daera yang laeng datang di Yerusalem untuk ‘biking bersi diri’ iko dorang pe aturan agama.

⁵⁶ Waktu dorang bakumpul di Ruma Ibada Pusat pe kompleks, dorang cari-cari pa Yesus, kong dong baku bilang, “Kalu menurut ngoni, Yesus mo datang di hari raya ini ka tarada?”

⁵⁷ Dorang baku bilang bagitu, barang orang Yahudi pe imam-imam kapala deng orang-orang dari aliran Farisi so kase parenta pa orang-orang bagini: kalu ada yang tau Yesus ada di mana, musti lapor pa dorang supaya dong tangka pa Dia.