Yohanes 10 - Perjanjian Baru Bahasa Melayu Maluku Utara

Umpama tentang gembala yang bae deng dia pe domba-domba

¹ Yesus bicara pake umpama satu, “Inga bae-bae yang Kita bilang ini. Sapa yang maso di kandang domba kong tara iko pintu, tapi nae iko pagar, dia itu papancuri deng tukang rampok.

² Tapi sapa yang maso di kandang iko pintu, dia itu suda domba pe tuang yang siang malam jaga dia pe domba bae-bae. Dia itu orang jaga bilang gembala.

³ Kalu gembala itu mo maso di kandang, orang yang jaga pintu kandang akan buka pintu pa dia. Turus, gembala itu pangge pa dia pe domba-domba, iko dong pe nama masing-masing, kong bawa pa dorang kaluar dari kandang itu. Domba-domba itu iko pa dorang pe gembala, barang dong kanal gembala itu pe suara.

⁴ Kalu dia pe domba samua so kaluar, dia bajalang di domba-domba itu pe muka kong dorang iko pa dia dari balakang, barang dong kanal dia pe suara.

⁵ Tapi kalu orang yang bukang dong pe tuang datang, dorang tara akan iko pa dia, mala dorang lari, barang dong tara kanal orang itu pe suara.”

⁶ Umpama itu yang Yesus bilang pa orang-orang Yahudi dari aliran Farisi itu, tapi dorang tara mangarti apa Yesus pe maksut bilang bagitu.

⁷ Jadi, Yesus bilang satu kali lagi, “Inga bae-bae yang Kita bilang ini. Kita ini suda yang bole kase sama deng pintu di kandang domba.

⁸ Samua orang yang so datang lebe kamuka dari Kita kong mangaku kata, dia itu gembala, dorang itu bole kase sama deng papancuri deng tukang rampok. Tapi Kita pe umat yang percaya pa Kita, tara dengar pa dorang, sama deng domba-domba yang tara badengar pa papancuri.

⁹ Kita ini pintu. Sapa yang iko pa Kita, dia itu akan slamat. Dia bole kase sama deng domba yang kaluar maso kandang la dapa makanang.

¹⁰ Papancuri datang cuma untuk pancuri, untuk bunu orang deng biking rusak orang pe hidup. Tapi Kita datang, supaya orang dapa hidup talebe-lebe dari Tuhan, kong deng hidup bagitu, dorang mo rasa sanang yang tara mo abis-abis itu.

¹¹ Kita ini bole kase sama deng gembala yang bae yang jaga bae-bae dia pe domba. Gembala yang bae siap mati asal dia pe domba-domba bole slamat.

¹² Tapi orang yang bukang domba pe gembala, dia dapa bayar untuk jaga domba-domba itu. Domba-domba itu bukang dia punya, jadi waktu dia lia anjing utang datang, dia lari kase tinggal domba-domba itu sampe anjing utang datang serang domba-domba itu, kong domba-domba laeng jadi tako kong lari takaruang.

¹³ Orang itu lari, barang dia karja cuma untuk dapa doi saja. Dia tara mau bapusing deng domba-domba itu.

¹⁴ Kita ini suda sama deng gembala yang bae yang jaga bae-bae Kita pe domba, deng Kita kanal Kita pe domba-domba, kong Kita pe domba-domba kanal lagi pa Kita.

¹⁵ Itu sama deng Bapa kanal pa Kita deng Kita lagi kanal pa Bapa. Kong Kita siap mati asal Kita pe domba-domba itu bole hidup.

¹⁶ Tapi pa Kita lagi ada domba-domba laeng, yang bukang dari kandang ini. Domba-domba itu musti Kita bawa lagi kong dorang mo dengar Kita pe suara. Dorang itu mo jadi satu kelompok deng Kita pe domba-domba yang ada di kandang ini, kong Kita jadi dorang samua pe gembala.

¹⁷ Kita pe Bapa sayang pa Kita, karna Kita siap mati supaya nanti Kita bole hidup ulang.

¹⁸ Tarada orang yang bole ambe Kita pe hidup dari Kita, tapi Kita mo kase Kita pe hidup, iko Kita pe mau sandiri. Kita ada kuasa mo kase Kita pe diri untuk mati, deng Kita lagi ada kuasa mo ambe itu ulang. Barang samua parenta itu Kita so tarima dari Kita pe Bapa.”

¹⁹ Pe dengar Yesus bilang bagitu, orang-orang agama Yahudi mulai baku malawang, dorang deng dorang. Banya dari dorang yang bilang,

²⁰ “Bikiapa kong ngoni dengar pa Dia? Dia itu so kemasukan setang, deng so gila.”

²¹ Kong yang laeng babilang, “Itu bukang orang yang kemasukan setang pe kata-kata, karna kalu Dia kemasukan, bikiapa kong Dia bisa biking orang buta bisa dapa lia?”

Pemimpin-pemimpin agama Yahudi tara tarima pa Yesus

²² So tara lama lagi orang-orang agama Yahudi mo biking dong pe hari raya untuk inga waktu dorang tabis Ruma Ibada Pusat di Yerusalem. Waktu itu musim dingin.

²³ Kong Yesus babajalang di Ruma Ibada Pusat pe kompleks, di teras satu yang orang sebut Teras Salomo.

²⁴ Turus, pemimpin-pemimpin agama Yahudi, dong bakumpul pa Yesus, turus bilang, “Guru, so lama skali torang tunggu Guru mo kase tau pa torang, Guru ini sapa sebenarnya. Kalu memang Guru ini Mesias, Raja yang Tuhan Allah janji mo kase slamat pa manusia, bilang suda turus tarang pa torang.”

²⁵ Kong Yesus bilang, “Kita so kase tau pa ngoni, tapi ngoni tara percaya. Kong Kita so biking banya mujizat pake Kita pe Bapa pe kuasa, itu suda yang kase tau deng jelas Kita ini sapa.

²⁶ Tapi ngoni tara percaya, karna ngoni bukang Kita pe umat, sama deng domba yang bukang dia pe gembala punya.

²⁷ Barang, Kita pe umat dengar Kita pe suara kong Kita kanal pa dorang, turus dong iko pa Kita, sama deng domba iko dia pe gembala.

²⁸ Kong Kita mo biking dorang hidup deng Tuhan Allah slama-lamanya deng dong pasti tara akan mati sampe slama-lamanya. Deng tarada satu orang yang bisa rampas pa dorang dari Kita pe tangan.

²⁹ Kita pe Bapa yang kase dorang la jadi Kita punya, Dia pe kuasa lebe basar dari sapa saja. Tarada satu orang yang bisa rampas pa dorang dari Kita pe Bapa pe tangan.

³⁰ Kita deng Kita pe Bapa itu satu.”

³¹ Pe dengar Yesus bilang bagitu, orang-orang Yahudi ambe batu lagi mo lempar kase mati pa Dia.

³² Tapi Yesus bilang pa dorang, “Ngoni so lia Kita biking banya hal yang bae yang Kita pe Bapa suru Kita biking. Kong, mana yang biking sampe ngoni mo lempar pa Kita deng batu?”

³³ Kong dorang jawab, “Torang mo lempar pa Ngana bukang karna Ngana biking hal yang bae, tapi karna Ngana kase tara bae Tuhan Allah pe nama. Ngana ini manusia biasa saja, tapi Ngana biking diri sama deng Tuhan Allah.”

³⁴ Turus, Yesus bilang pa dorang, “Di lima kitab Musa yang ngoni pegang kuat itu, so tatulis yang Tuhan Allah bilang dulu itu bagini, ‘Ngoni itu sama deng allah’.

³⁵ Torang tau apa yang tatulis di lima kitab Musa tara bole kase batal, jadi kalu Tuhan Allah sandiri bilang ‘allah’ pa orang-orang yang so tarima Dia pe firman,

³⁶ bikiapa kong ngoni bilang Kita so kase tara bae Tuhan Allah pe nama gara-gara Kita bilang Kita ini Anak Allah? Barang, Tuhan Allah sandiri yang so pili deng utus pa Kita untuk datang di dunia ini.

³⁷ Kalu Kita tara biking yang Kita pe Bapa suru, ngoni bole tara percaya pa Kita.

³⁸ Tapi Kita ini jaga biking yang Kita pe Bapa suru. Jadi, biar ngoni tara mau percaya pa Kita, tapi paling tarada ngoni musti percaya mujizat-mujizat yang Kita so biking. Deng bagitu, ngoni akan jadi tau deng mangarti, Kita pe Bapa deng Kita itu satu.”

³⁹ Abis Yesus bilang bagitu, dorang coba lagi tangka pa Yesus, tapi dong tara dapa tangka pa Dia.

⁴⁰ Kong Yesus pigi lagi di kali Yordan pe sabla, di tampa yang dulu Yohanes jaga baptis orang, kong Dia tinggal di situ.

⁴¹ Banya orang yang datang pa Yesus, kong dorang baku bilang, “Yohanes memang tara perna biking mujizat, tapi samua yang Yohanes bilang tentang Orang ini, itu butul.”

⁴² Kong banya orang yang ada di situ jadi percaya pa Yesus.