Yakobus 5 - Perjanjian Baru Bahasa Melayu Maluku Utara

Nasehat untuk orang-orang kaya

¹ Ee orang-orang kaya, lebe bae ngoni manangis deng bataria suda karna ngoni akan menderita skali.

² Nanti di waktu itu, ngoni pe harta so ancor, deng ngoni pe baju, gai so makang.

³ Ngoni pe mas deng perak so bakarat. Dia bakarat itu jadi bukti ngoni skakar pa orang, jadi Tuhan Allah akan hukum kase ancor ngoni pe badan, sama deng api kase angus rumpu. Ngoni so kumpul harta banya-banya, tapi samua itu akan ilang di hari kiamat.

⁴ Ngoni tara kase gaji pa orang-orang karja yang so pete ngoni pe hasil kobong. Coba dengar dorang pe mengelu itu! Dorang bataria karna dorang susa, deng dorang pe keluhan itu Tuhan Allah Yang Paling Berkuasa so dengar.

⁵ Ngoni hidup basanang-sanang deng bafoya-foya di dunia ini. Ngoni so biking puas ngoni pe diri sandiri sampe mo dapa hukum, itu sama deng binatang yang orang piara sampe gode kong tinggal mo potong.

⁶ Ngoni so hukum pa orang-orang yang hidup butul pa Tuhan Allah pe muka, mala sampe ngoni bunu pa dorang, tapi dorang tara bisa malawang pa ngoni.

Sabar waktu dapa susa

⁷ Jadi, sudara-sudara, ngoni musti sabar sampe Tuhan datang ulang untuk adili pa orang-orang. Ambe conto bagini, orang yang bakobong musti sabar sampe ujang turung, baru batanam. Abis itu, dia tunggu sampe tanaman babua. Turus dia sabar sampe dapa hasil yang berharga.

⁸ Bagitu lagi deng ngoni, ngoni musti basabar deng kase kuat ngoni pe hati, karna Tuhan pe waktu mo datang ulang so dekat.

⁹ Sudara-sudara, jang ngoni mengelu deng baku tudu, supaya ngoni tara dapa hukum. Inga e, Tuhan so mo datang ulang. Dia sama deng hakim yang mo adili pa samua orang.

¹⁰ Sudara-sudara, iko yang nabi-nabi so kase conto. Waktu dorang kase turus Tuhan Allah pe pasáng, dorang dapa tantang sampe menderita macam-macam. Tapi biar bagitu, dorang tetap sabar deng tara berenti kase tau Tuhan Allah pe pasáng turus.

¹¹ Inga e, orang-orang yang batahang mangada susa, torang bilang dorang itu yang paling sanang suda. Ngoni so dengar tentang Ayub, to? Dia dapa susa macam-macam tapi dia batahang kong iko turus pa Tuhan. Dia pe ahir kabawa, Tuhan Allah kase berkat pa dia. Tuhan Allah biking bagitu, karna Dia pangsayang skali deng rasa kasiang skali pa samua orang.

Tentang sumpa, deng doa untuk orang saki

¹² Sudara-sudara, yang paling penting itu, waktu ngoni bilang satu barang atau bajanji tentang satu hal, jang ngoni kase kuat ngoni pe kata-kata atau ngoni pe janji itu pake sumpa demi nama Tuhan Allah, demi orang di bumi, atau demi apa saja. Kalu yang ngoni bilang itu butul, ngoni cukup bilang saja “Iyo”. Kalu itu tara butul, bilang saja “Tarada”. Kalu ngoni biking bagitu, Tuhan Allah tara akan hukum pa ngoni.

¹³ Kalu ada dari ngoni yang menderita, lebe bae dia berdoa. Kalu ada yang sanang, lebe bae dia manyanyi puji pa Tuhan.

¹⁴ Kong kalu ada dari ngoni yang saki, lebe bae dia pangge penatua-penatua di jemaat, supaya dorang kase berdoa kong goso pa dia deng minya pake Tuhan pe nama.

¹⁵ Kalu dorang berdoa deng hati yang sunggu-sunggu percaya pa Tuhan, Tuhan akan kase sembu orang itu. Kong kalu dia so biking dosa, Tuhan mo kase ampun pa dia dari dia pe dosa.

¹⁶ Jadi lebe bae ngoni baku mangaku ngoni pe dosa deng baku kase berdoa, supaya ngoni jadi sembu. Orang yang hidup butul pa Tuhan Allah pe muka, dia pe doa ada kuasa basar skali sampe ada dia pe hasil.

¹⁷ Coba ngoni inga nabi Elia. Dia itu manusia biasa sama deng torang, tapi dia sunggu-sunggu berdoa pa Tuhan, dia minta supaya ujang jang turung, kong ujang tara turung selama tiga taong stenga.

¹⁸ Kong dia berdoa ulang minta ujang, baru ujang turung sampe tanaman di tana kase kaluar dia pe hasil.

¹⁹ Sudara-sudara, kalu ada dari ngoni yang dulu percaya pa Tuhan tapi so tara iko lagi Tuhan pe ajaran, lebe bae ada orang yang bantu pa dia supaya dia bale ulang pa Tuhan.

²⁰ Ngoni inga ini e: sapa yang bantu pa orang berdosa kase tinggal dia pe cara hidup yang sala, dia so biking orang itu dapa ampun dari dia pe dosa yang banya skali, kong so kase slamat orang itu dari hukuman tapisa deng Tuhan Allah slama-lamanya.