Yakobus 4 - Perjanjian Baru Bahasa Melayu Maluku Utara

Serakan diri pa Tuhan, jang iko dunia pe mau

¹ Bikiapa kong ngoni baku malawang deng bakalae? Itu karna di ngoni pe hati ada keinginan-keinginan yang tara bae. Keinginan-keinginan yang tara bae itu baku malawang di ngoni pe hati untuk kontrol ngoni pe diri sampe ngoni biking barang yang jahat.

² Ngoni suka satu barang tapi tara dapa itu, jadi ngoni bunu orang. Ngoni mangiri karna ngoni tara dapa apa yang ngoni suka. Kong ngoni baku malawang deng bakalae. Ngoni tara dapa apa-apa, barang ngoni tara berdoa minta pa Tuhan.

³ Atau, ngoni memang ada berdoa tapi ngoni pe tujuan itu sala, jadi ngoni tara dapa apa-apa. Barang, yang ngoni minta itu cuma untuk mo kase sanang ngoni pe diri sandiri saja.

⁴ Ee, ngoni orang-orang yang tara setia pa Tuhan! Ngoni pasti tau, kalu ngoni cuma iko dunia pe mau, itu ngoni so baku musu deng Tuhan Allah. Sapa yang suka batamang deng dunia ini pe sanang, dia sandiri yang biking dia pe diri baku musu deng Tuhan Allah.

⁵ Jang ngoni kira kata tarada arti deng apa yang tatulis di Kitab Suci ini, “Tuhan Allah pe Roh yang Dia taru di torang pe hati, Roh itu mau torang pe sayang cuma untuk Tuhan Allah saja. Dia cemburu kalu torang iko dunia pe mau.”

⁶ Tapi untung bae Tuhan Allah kase Dia pe bae pa torang lebe basar. Jadi Dia bilang bagini, “Tuhan Allah tara suka deng orang yang sombong, tapi Dia kase Dia pe bae pa orang yang tara sombong.”

⁷ Jadi serakan suda ngoni pe diri pa Tuhan Allah kong iko pa Dia. Ngoni lawan suda pa Iblis, setang-setang pe raja supaya dia akan lari dari ngoni.

⁸ Berusaha suda hidup dekat deng Tuhan Allah, supaya Dia badekat deng ngoni. Ee, ngoni orang-orang yang berdosa, kase bersi suda ngoni pe tangan yang jaga biking dosa! Deng ngoni yang masi tara tau mo iko yang mana: Tuhan Allah pe mau ka, dunia pe mau ka, ngoni musti kase bersi ngoni pe hati.

⁹ Ngoni pe dosa itu banya, jadi berenti suda tatawa deng basanang-sanang, tapi ngoni ganti itu deng rasa manyasal deng manangis.

¹⁰ Ngoni musti hidup sama deng orang yang tara arti apa-apa pa Tuhan Allah pe muka, kong deng bagitu, Dia mo biking ngoni jadi orang yang penting pa Dia pe muka.

Jang kase busu orang pe nama

¹¹ Sudara-sudara, jang ngoni baku biking busu ngoni pe sudara pe nama. Sapa yang biking busu dia pe sudara pe nama atau tudu dia pe sudara itu sala, itu sama deng dia so biking busu deng kase sala Tuhan Allah pe aturan. Kong kalu ngoni kase sala Tuhan Allah pe aturan, ngoni itu tara iko aturan itu, tapi ngoni biking ngoni pe diri jadi hakim untuk kase sala aturan itu.

¹² Tuhan pe aturan itu Tuhan sandiri yang biking. Deng cuma Dia yang bole jadi hakim. Dia yang berkuasa kase slamat pa torang deng Dia me bole kase hukum pa torang tapisa deng Tuhan Allah slama-lamanya. Tapi ngoni ini sapa sampe mo tudu orang laeng sala? Jang ngoni bagitu.

Jang bicara sombong

¹³ Ee, ngoni yang bilang, “Hari ini atau beso torang mo pigi di kota laeng. Torang mo tinggal satu taong di situ, kong bajual la dapa untung.”

¹⁴ Ngoni bilang bagitu, padahal ngoni tara tau apa yang mo jadi beso. Torang pe hidup ini sama deng uap yang muncul, tara lama kong ilang.

¹⁵ Sebenarnya yang ngoni musti bilang itu bagini, “Kalu Tuhan kase ijin, torang bole hidup kong torang bisa biking ini atau itu.”

¹⁶ Tapi yang ngoni bicara itu cuma untuk puji ngoni pe diri sandiri saja. Samua itu sala basar.

¹⁷ Jadi kalu ada orang tau hal yang bae yang musti dia biking, kong dia tara biking, itu dia so berdosa.