Wahyu 7 - Perjanjian Baru Bahasa Melayu Maluku Utara

Tuhan jaga pa orang-orang yang biking apa yang Dia suru

¹ Abis itu, kita lia ada malaekat ampa, dorang badiri satu-satu di masing-masing ara mata angin di dunia ini. Dorang tahang angin di ampa mata angin supaya angin itu jang batiop di darat, laut, atau di pohong-pohong.

² Malaekat ampa itu so dapa kuasa untuk kase rusak tana deng laut. Tapi kita lia lagi ada malaekat laeng muncul dari timur, tampa matahari nae. Malaekat itu ada bawa Tuhan Allah yang hidup pe cap, kong cap itu untuk orang yang jadi Tuhan Allah pe umat. Malaekat itu bicara kuat-kuat pa malaekat ampa yang laeng itu bagini,

³ “Tunggu dulu, jang dulu ngoni kase rusak darat, laut atau pohong-pohong! Torang mo kase cap pa orang-orang yang jaga biking apa yang Tuhan Allah suru. Cap itu torang kase di dorang pe testa la jadi tanda supaya dorang tara dapa cilaka.”

⁴ Abis itu, kita dengar orang-orang yang dapa tanda deng Tuhan Allah pe cap di testa itu, dong pe jumla ada saratus ampa pulu ampa ribu orang. Dorang itu dari dua blas suku Israel:

⁵ Dari suku Yehuda, Ruben deng Gad, masing-masing suku ada dua blas ribu orang yang dapa cap.

⁶ Dari suku Asyer, Naftali, deng Manasye, masing-masing suku itu ada dua blas ribu orang yang dapa cap.

⁷ Dari suku Simeon, Lewi deng Isakhar, masing-masing suku itu ada dua blas ribu orang yang dapa cap.

⁸ Kong dari suku Zebulon, Yusuf deng Benyamin, masing-masing suku itu lagi ada dua blas ribu orang yang dapa cap.

Orang banya skali puji pa Tuhan Allah deng pa Anak Domba

⁹ Abis itu, kita lia ada orang pe banya skali, sampe tara mampo mo rekeng pa dorang. Dorang itu dari samua bangsa, suku bangsa, fam deng bahasa. Dorang samua badiri di muka Tuhan Allah pe kursi raja deng di muka Anak Domba itu. Dorang pake juba puti deng masing-masing orang ada pegang daong-daong palem.

¹⁰ Turus, deng suara kuat dorang bilang bagini, “Yang kase slamat pa torang, itu Tuhan Allah yang dudu di kursi raja, deng Anak Domba lagi.”

¹¹ Waktu itu, samua malaekat badiri kong kuliling pa Tuhan Allah pe kursi raja itu, deng kuliling pa pemimpin-pemimpin deng binatang ampa yang luar biasa itu. Dorang samua berlutut di muka kursi raja itu kong semba pa Tuhan Allah sampe dong pe muka kanal di tana.

¹² Dorang bilang bagini, “Amin! Mari torang puji pa Tuhan Allah. Dia pe kuasa yang luar biasa deng Dia yang paling tau samua. Torang me bilang tarimakasi, deng hormati pa Dia. Dia itu torang pe Tuhan Allah yang berkuasa deng kuat sampe slama-lamanya! Amin.”

¹³ Kong satu orang dari pemimpin-pemimpin itu batanya pa kita, “Orang-orang yang pake juba puti itu, ngana tau dorang itu sapa? Kong dorang itu dari mana?”

¹⁴ Kita jawab, “Bapa saja yang tau sapa dorang itu.” Kong dia bilang pa kita, “Dorang itu orang-orang yang so bebas dari sengsara yang hebat skali. Dorang pe baju so jadi puti bersi, itu pe arti, dorang pe dosa-dosa so dapa tebus, karna Anak Domba so mati untuk dorang.

¹⁵ Karna itu, dorang itu ada di muka Tuhan Allah pe kursi raja kong semba pa Dia siang malam di Dia pe Ruang Paling Suci. Kong Tuhan Allah yang dudu di atas kursi raja itu akan ada di tenga-tenga pa dorang untuk jaga pa dorang, sama deng Dia kase badiri sabua la kase sombar pa dorang.

¹⁶ Dorang itu so tara akan menderita karna lapar deng aus lagi. Kong panas matahari tara akan biking siksa pa dorang lagi.

¹⁷ Karna Anak Domba yang ada di tenga-tenga kursi raja pe muka itu, Dia mo jadi dorang pe Gembala. Dia mo bawa pa dorang minum di mata aer yang biking dorang hidup, kong Tuhan Allah mo hapus dorang samua pe aer mata.”