Wahyu 6 - Perjanjian Baru Bahasa Melayu Maluku Utara

Anak Domba buka anam segel

¹ Turus, kita lia Anak Domba buka segel yang pertama yang talém di kitab tagulung itu. Kong kita dengar binatang yang pertama dari ampa binatang luar biasa itu bicara kuat-kuat sama deng guntur pe babunyi. Dia bilang, “Mari suda!”

² Turus kita lia ada kuda puti satu ekor. Di atas kuda itu ada satu orang yang dudu pegang pana, kong pa orang itu ada kase pake makota. Turus dia pigi mo kase kala dia pe musu-musu.

³ Abis itu, Anak Domba itu buka segel yang kedua, turus kita dengar binatang luar biasa yang kedua bilang, “Mari suda!”

⁴ Kong kuda satu ekor yang laeng lagi datang. Kuda itu pe warna mera sama deng api. Turus orang yang nae di atas kuda itu tarima parang basar satu. Tuhan Allah kase pa dia kuasa untuk ambe dame yang di dunia, supaya di dunia so tarada dame kong orang-orang baku bunu turus.

⁵ Turus Anak Domba itu buka segel yang ketiga. Waktu itu, kita dengar binatang luar biasa yang ketiga bilang bagini, “Mari suda!” Turus kita lia ada kuda itam satu ekor. Di atas kuda itu ada satu orang yang dudu, kong pa dia pe tangan ada timbangan gantong satu.

⁶ Turus kita dengar macam deng suara yang datang dari ampa binatang yang luar biasa itu pe tenga-tenga. Suara itu bilang bagini, “Nanti waktu kelaparan, orang pe gaji rata-rata satu hari cuma dapa bili baras tiga cupa; kalu baras bagus cuma dapa satu cupa. Tapi pohong-pohong zaitun deng pohong anggur jang kase rusak.”

⁷ Turus Anak Domba itu buka segel yang keempat. Waktu itu, kita dengar binatang luar biasa yang keempat bilang bagini, “Mari suda!”

⁸ Kong kita lia kuda satu yang pe warna puti pucat. Ada orang yang dudu di kuda itu. Orang-orang itu pe nama ‘Mati’. Turus pa dia pe balakang, ada orang yang iko, dia pe nama ‘Tampa Orang-Orang Mati’. Dorang ini dapa kuasa untuk kase mati banya orang. Kalu mo bagi orang-orang di dunia ini jadi ampa bagian, yang dong kase mati itu satu bagian. Dorang yang mati ini, ada yang mati karna parang, mati karna lapar, mati karna macam-macam panyake deng mati karna binatang-binatang jahat gigi.

⁹ Turus Anak Domba itu buka segel yang kelima. Waktu itu, kita lia di bawa tampa bakar korban persembahan, ada banya skali jiwa. Jiwa-jiwa itu dari orang yang dapa bunu karna kase tau Tuhan Allah pe firman deng karna bacarita Tuhan Yesus pe bae di mana-mana.

¹⁰ Kong jiwa-jiwa itu bicara kuat-kuat bagini, “Tuhan, Tuhan itu yang suci deng yang butul! Barapa lama lagi baru Tuhan adili pa orang-orang di dunia deng mo hukum pa orang-orang yang bunu pa torang?”

¹¹ Abis itu, samua orang mati itu pe roh masing-masing tarima dong pe juba puti, kong ada yang bilang pa dorang, supaya tunggu sadiki karna dong pe jumla bolong genap. Barang, masi ada lagi dong pe sudara-sudara yang percaya, deng orang laeng yang jaga biking apa yang Tuhan suru yang nanti mo mati dapa bunu sama deng dorang itu. Waktu itu, baru dong pe jumla jadi genap, kong Tuhan mo hukum pa orang-orang di dunia.

¹² Turus kita lia lagi Anak Domba buka segel yang keanam. Waktu itu suda, ada tana goyang kuat skali. Matahari jadi itam sama deng kaeng itam. Kong bulan jadi mera sama deng dara.

¹³ Bintang-bintang di langit jatu di bumi, sama deng bua ara yang masi manta yang jatu dari pohong waktu angin ribut tiop.

¹⁴ Turus langit tabalá jadi dua kong tagulung sama deng kartas sampe ilang. Gunung-gunung deng pulo-pulo samua tagoyang sampe ilang dari dia pe tampa.

¹⁵ Waktu itu, samua orang berusaha basambunyi di goa-goa atau di antara batu-batu di gunung, mulai dari raja-raja di bumi, pejabat-pejabat, komandan-komandan, orang-orang kaya, orang-orang yang berkuasa, sampe pa samua orang karja yang dia pe tuang so bili, deng orang-orang bebas lagi.

¹⁶ Dorang bilang pa gunung-gunung deng batu-batu, “Tutu suda pa torang la tong tasambunyi dari Dia yang dudu di kursi raja, deng dari Anak Domba yang kase hukuman barát pa torang.”

¹⁷ Barang, waktu yang Tuhan Allah deng Anak Domba mo adili samua orang so sampe, kong tarada satu orang yang bisa tahang mo mangada hukuman yang barát itu.