Wahyu 5 - Perjanjian Baru Bahasa Melayu Maluku Utara

Tulisan di dalam kitab yang talém deng Tuhan Allah pe tuju segel

¹ Abis itu, kita lia pa Dia yang dudu di kursi raja itu pe tangan kanan, ada kitab satu yang tagulung. Di kitab itu pe bagian dalam deng bagian luar ada tulisan, kong ada tagulung, turus talém deng Tuhan Allah pe tuju segel.

² Turus kita lia lagi ada malaekat satu yang kuat. Dia tanya deng suara kuat bagini, “Sapa yang pantas buka Tuhan Allah pe tuju segel yang ada kase talém di kitab tagulung itu la bisa buka kitab itu?”

³ Tapi tara ada satu orang yang pantas buka kitab yang talém itu, bae itu yang ada di sorga, di dunia ini, atau yang ada di tampa orang mati.

⁴ Jadi kita sedi skali kong manangis kuat-kuat, karna tara ada satu orang yang pantas mo buka kitab yang tagulung itu atau mo lia kitab itu pe isi.

⁵ Turus ada satu dari dua pulu ampa pemimpin itu bilang pa kita bagini, “Ngana tara usa manangis suda. Perhatikan bae-bae! Ada yang bole buka tuju segel di kitab tagulung itu. Orang itu yang Tuhan Allah janji dari dulu mo kase slamat pa manusia. Dia dari raja Daud pe turunan, yang orang sebut Singa dari suku Yehuda yang so menang dari pengaru jahat.”

⁶ Abis itu, kita lia Anak Domba satu badiri di pinggir Tuhan Allah pe kursi raja. Kong ampa binatang luar biasa itu, deng samua dua pulu ampa pemimpin itu kuliling pa Dia. Anak Domba itu dapa lia sama deng so perna dapa bunu, tapi so hidup ulang. Dia pe tandu ada tuju deng mata tuju. Mata tuju itu pe arti, tuju Roh yang Tuhan Allah utus di seluru dunia ini.

⁷ Turus Anak Domba itu pigi di kursi raja, kong ambe kitab yang tagulung itu dari Tuhan Allah pe tangan kanan.

⁸ Waktu Anak Domba ambe kitab yang tagulung itu, ampa binatang yang luar biasa itu deng dua pulu ampa pemimpin itu berlutut semba pa Dia sampe dong pe muka kanal di tana. Dorang masing-masing ada pegang kecapi satu deng mangko mas satu. Mangko mas itu ada isi kemenyan yang kalu bakar dia pe bobou sadap. Bobou sadap itu pe arti, doa-doa dari orang-orang yang so jadi Tuhan Allah pe umat.

⁹ Kong dorang manyanyi puji pa Anak Domba itu deng lagu baru bagini: “Anak Domba ini yang pantas tarima kitab tagulung itu, deng yang pantas buka tuju segel yang talém di kitab itu. Barang, Anak Domba ini so perna dapa bunu, kong Dia pe dara so tatumpa untuk hapus orang-orang pe dosa dari tiap fam, suku, bahasa deng bangsa supaya dorang jadi Dia pe umat.

¹⁰ Anak Domba ini so biking dorang jadi Tuhan Allah pe umat yang Dia berkuasa sebagai Raja pa dorang pe hidup, deng Dia biking lagi dorang samua jadi sama deng imam-imam yang pe tugas kusus untuk semba deng puji pa Tuhan Allah. Kong dorang mo berkuasa sebagai raja di dunia.”

¹¹ Abis itu, kita lia deng dengar malaekat banya skali pe suara. Dorang itu pe banya deng ribu-ribu sampe juta-juta. Malaekat-malaekat itu badiri kuliling Tuhan Allah pe kursi raja itu, sama-sama deng ampa binatang luar biasa itu deng dua pulu ampa pemimpin.

¹² Dorang manyanyi kuat-kuat bagini, “Dia ini Anak Domba yang so perna dapa bunu. Dia yang pantas tarima kuasa, kekayaan, deng pikiran bae untuk ator samua. Dia me pantas tarima kekuatan, puji deng hormat, deng Dia lagi luar biasa.”

¹³ Abis itu, kita dengar samua orang deng samua binatang yang ada di sorga, di dunia, di tampa orang mati, deng di dalam laut, bilang bagini, “Torang puji deng hormat pa Tuhan Allah yang dudu di kursi raja, deng pa Anak Domba. Tuhan Allah deng Anak Domba itu luar biasa deng berkuasa sampe slama-lamanya.”

¹⁴ Kong ampa binatang luar biasa itu sama-sama bilang, “Amin!” Turus, dua pulu ampa pemimpin itu berlutut semba pa Tuhan Allah sampe dong pe muka kanal di tana.