Wahyu 21 - Perjanjian Baru Bahasa Melayu Maluku Utara

Langit deng bumi yang baru

¹ Abis itu, kita lia langit deng bumi yang baru, karna langit deng bumi yang pertama so tarada. Bagitu lagi deng laut.

² Kita lia lagi Tuhan Allah pe kota yang kudus, Yerusalem Baru itu, turung dari sorga, dari Tuhan Allah. Kota itu bagus skali sama deng pengantin parampuang yang barias untuk dia pe pengantin laki-laki.

³ Kong kita dengar suara yang kuat skali dari sekitar Tuhan Allah pe kursi raja itu bilang bagini, “Perhatikan bae-bae! Tuhan Allah pe tampa tinggal so ada di tenga-tenga manusia, deng Dia akan tinggal sama-sama deng manusia. Dorang akan jadi Dia pe umat, deng Dia sandiri akan ada sama-sama deng dorang jadi dorang pe Tuhan Allah.

⁴ Dia akan hapus dorang samua pe aer mata. So tarada lagi yang mo mati, so tarada lagi yang mo rasa sedi atau manangis, deng so tarada lagi yang mo rasa saki. Barang, samua yang lama itu so tarada.”

⁵ Tuhan Allah yang dudu di kursi raja itu bilang bagini, “Perhatikan bae-bae, Kita biking samua jadi baru!” Kong Dia bilang pa kita, “Tulis suda samua ini! Karna samua kata-kata ini butul deng orang bisa percaya.”

⁶ Dia bilang lagi pa kita, “Samua itu so selesai. Kita ini Alfa deng Omega, yang pe arti, mulai dari pertama dunia ini bolong ada, Kita so ada, deng sampe dunia abis, Kita tetap ada. Sapa yang aus, Kita mo kase aer minum deng cuma-cuma pa dia. Aer itu dari mata aer yang biking orang hidup deng Tuhan Allah slama-lamanya.

⁷ Sapa yang menang dari pengaru jahat, dia mo dapa samua yang Kita bilang tadi. Deng Kita mo jadi dia pe Tuhan Allah, kong dia mo jadi Kita pe ana.

⁸ Tapi ada orang-orang yang dapa hukum, dorang itu: orang yang stenga-stenga hati iko pa Tuhan, yang tara percaya, yang jaga biking hal-hal tara bae, yang jaga bunu orang, yang baseks sabarang, yang pake tiop-tiop, yang jaga semba pa dong pe puji-puji, deng samua orang yang pangbafoya. Dorang samua akan dapa hukum, dapa buang di api belerang yang luas deng mamanyala. Itu dia pe nama kematian yang kedua.”

Yerusalem baru

⁹ Abis itu, kita lia malaekat satu dari tuju malaekat yang perna bawa tuju mangko yang pe isi cilaka terahir itu. Malaekat itu bilang pa kita bagini, “Mari suda! Kita mo kase tunju pengantin parampuang itu deng Anak Domba.”

¹⁰ Turus, Tuhan Allah pe Roh kuasai pa kita kong malaekat itu bawa pa kita di gunung basar satu yang tinggi pe puncak. Kong dia kase tunju pa kita, Yerusalem, Tuhan Allah pe kota yang kudus. Kita lia kota itu turung dari sorga, dari Tuhan Allah.

¹¹ Kita lia kota itu basinar karna Tuhan Allah pe cahaya yang luar biasa kanal di kota itu. Kota itu basinar sama deng batu mangkilat yang mahal, sama deng permata yaspis. Kong dia pe jerni sama deng kristal yang paling bagus.

¹² Kota itu ada kuliling deng pagar tembok yang basar deng tinggi. Dia pe pintu gerbang ada dua blas. Di tiap pintu itu ada satu malaekat yang bajaga. Kong di pintu-pintu itu, ada tatulis dua blas suku Israel pe nama.

¹³ Tiga pintu gerbang mangada matahari nae, tiga pintu gerbang lagi mangada matahari maso, kong tiga pintu gerbang mangada sabla utara, deng tiga pintu gerbang lagi mangada sabla selatan.

¹⁴ Pagar tembok di kota itu ada kase badiri di atas dua blas batu fandasi basar. Di tiap batu itu, masing-masing ada tatulis Anak Domba itu pe dua blas rasul pe nama-nama.

¹⁵ Malaekat yang bicara pa kita itu, dia ada tongkat mas untuk pake baukur. Dia pake tongkat itu untuk ukur kota itu, kota itu pe pintu-pintu gerbang deng pagar tembok yang kuliling kota itu.

¹⁶ Kota itu pe model segi ampa, kong dia pe panjang deng lebar sama. Malaekat itu ukur kota itu pe panjang dua ribu ampa ratus kilo, dia pe lebar deng tinggi me sama.

¹⁷ Abis itu, dia ukur lagi pagar tembok yang kuliling kota itu. Dia pe tabal kira-kira anam pulu anam meter. Ukuran yang malaekat itu pake, sama deng ukuran yang manusia pake.

¹⁸ Pagar tembok itu ada biking dari permata yaspis. Turus kota itu ada biking dari mas asli yang mangkilat sama deng kaca.

¹⁹ Kota itu pe fandasi untuk pagar tembok, ada biking dari macam-macam permata. Yang pertama batu jerni pe nama yaspis, kedua batu biru pe nama nilam, ketiga batu puti pe nama mirah, keempat batu ijo pe nama zamrud.

²⁰ Fandasi kelima dari batu yang bagaris-garis mera puti pe nama unam, keanam batu mera tua pe nama sardis, ketuju batu kuning pe nama ratna cempaka, kedelapan batu ijo babiru pe nama beril, kesembilan batu kuning mangkilat pe nama krisolit, kespulu batu ijo bakuning pe nama krisopras, keseblas batu biru tua pe nama lasuardi, deng fandasi yang keduablas batu ungu pe nama kecubung.

²¹ Kota itu pe pintu gerbang ada biking dari dua blas mutiara. Tiap-tiap pintu, satu mutiara. Kong kota itu pe jalang-jalang ada biking dari mas asli yang mangkilat sama deng kaca.

²² Tapi kita tara lia ruma ibada di dalam kota itu. Barang, ruma ibada itu, itu Tuhan Allah suda, Tuhan Allah Yang Paling Berkuasa, deng itu lagi Anak Domba.

²³ Kota itu tara perlu sinar matahari deng bulan untuk kase tarang, karna Tuhan Allah pe cahaya yang luar biasa yang kase tarang kota itu, deng Anak Domba itu yang so jadi sama deng lampu yang manyala.

²⁴ Orang dari samua suku bangsa akan bajalang di tarang itu, deng raja-raja di bumi me bawa dong pe kekayaan di kota itu untuk puji deng hormat pa Tuhan Allah deng pa Anak Domba.

²⁵ Di situ so tarada malam, jadi kota itu pe pintu gerbang dong tara tutu-tutu.

²⁶ Kong samua suku bangsa mo kase maso dong pe kekayaan di kota itu untuk puji deng hormat pa Tuhan Allah deng pa Anak Domba.

²⁷ Tapi samua yang jahat, atau orang yang jaga biking hal-hal yang cafarune atau yang jaga kase foya orang, dorang tara akan maso di kota itu. Yang bisa maso di kota itu cuma orang-orang yang dong pe nama ada tatulis di Anak Domba pe buku kehidupan. Di buku itu ada tulis orang-orang pe nama yang dapa hidup deng Tuhan Allah slama-lamanya.