Wahyu 20 - Perjanjian Baru Bahasa Melayu Maluku Utara

Iblis dapa ika selama saribu taong

¹ Abis itu, kita lia malaekat satu turung dari sorga. Malaekat itu ada pegang kunci jurang maut, tampa tahang setang-setang, deng dia me ada pegang rante basar satu.

² Dia tangka pa naga itu kong ika. Naga itu, ular tua yang orang sebut ‘Iblis, setang-setang pe raja’. Dia ika pa naga itu selama saribu taong,

³ kong kase lempar pa dia di tampa tahang setang-setang itu. Dia kunci mati tampa itu supaya naga itu jang kaluar. Deng bagitu, naga itu so tara akan kase sesat pa suku-suku bangsa di dunia selama saribu taong. Abis itu baru malaekat mo kase lapas ulang pa naga itu, tapi dia pe waktu tara lama.

⁴ Turus kita lia ada kursi-kursi raja. Orang-orang yang dudu di kursi raja itu, orang-orang yang dapa kuasa untuk adili pa manusia. Kita me lia roh-roh dari orang-orang yang dulu dapa potong kapala kong mati karna dorang kase tau tentang Yesus deng Tuhan Allah pe firman. Orang-orang itu tara perna semba pa binatang jahat deng dia pe patong, jadi dorang me tara perna dapa binatang itu pe cap di dong pe testa deng di dong pe tangan. Tuhan Allah kase hidup ulang pa dorang, turus dong berkuasa sebagai raja sama-sama deng Yesus Kristus selama saribu taong.

⁵ Dorang itu yang kamuka Tuhan Allah kase hidup ulang. Nanti saribu taong lagi Dia mo kase hidup orang-orang laeng yang so mati.

⁶ Dorang yang pertama dapa hidup ulang, dorang itu paling sanang suda. Dorang itu yang so jadi Tuhan Allah pe umat. Dorang me tara rasa yang dia pe nama kematian yang kedua. Dorang akan jadi imam-imam yang pe tugas layani pa Tuhan Allah deng Yesus Kristus, turus dorang me akan berkuasa sama-sama deng Dia selama saribu taong.

Iblis dapa buang di api belerang yang luas skali

⁷ Bagitu saribu taong itu so abis, malaekat mo kase bebas pa Iblis, setang-setang pe raja dari dia pe tampa dapa tahang.

⁸ Bagitu Iblis so bebas, dia mo pigi kase sesat pa orang-orang dari samua suku bangsa di dunia ini yang ada di mana-mana. Suku-suku bangsa itu yang dong sebut Gog deng Magog. Iblis mo kumpul pa dorang la baku prang. Dorang itu banya skali sama deng paser di pante.

⁹ Dorang pigi di samua tampa di dunia ini kong kepung pa orang-orang yang so jadi Tuhan Allah pe umat deng kota yang Tuhan Allah sayang. Tapi api turung dari langit kong kase angus pa dorang.

¹⁰ Turus, Iblis yang kase sesat pa orang-orang itu dapa lempar di api belerang yang luas skali. Binatang jahat deng nabi palsu so dapa buang kamuka di situ. Kong dorang samua dapa siksa siang deng malam sampe slama-lamanya.

Orang-orang yang so mati dapa adili

¹¹ Abis itu, kita lia kursi raja satu warna puti yang basar, deng kita lia lagi Tuhan Allah ada dudu di atas kursi raja itu. Turus, dari Tuhan Allah pe muka itu, langit deng bumi langsung ilang sampe so tara dapa lia lagi.

¹² Turus kita lia orang-orang yang so mati, biar itu orang-orang penting atau orang-orang biasa, samua so hidup ulang deng badiri di muka kursi raja itu. Waktu itu, ada buku-buku yang tabuka yang ada tulis samua yang manusia biking di dunia ini. Ada satu lagi buku yang tabuka, buku itu dia pe nama buku kehidupan. Di buku kehidupan ini ada tulis nama orang-orang yang mo dapa hidup deng Tuhan Allah slama-lamanya. Jadi dorang samua itu mo dapa adili iko deng yang dorang so biking di dunia yang so tatulis di buku-buku itu.

¹³ Laut serakan orang-orang yang mati yang ada di tampa itu, kuasa yang biking orang mati me serakan orang-orang yang so mati di tampa itu, deng tampa orang mati me serakan orang-orang yang so mati di situ. Dorang samua dapa adili iko deng apa yang dong so biking.

¹⁴ Abis itu, kuasa yang biking orang mati deng tampa orang mati, dapa lempar di api yang luas skali. Hukuman dapa lempar di api itu, dia pe nama kematian yang kedua.

¹⁵ Tiap orang yang dia pe nama tara tatulis di buku kehidupan itu, dia dapa lempar di dalam api yang luas skali itu.