Wahyu 18 - Perjanjian Baru Bahasa Melayu Maluku Utara

Kota Babel mo ancor

¹ Abis itu, kita lia ada malaekat satu yang laeng, turung dari sorga. Dia ada kuasa basar deng dia pe cahaya luar biasa sampe dunia ini jadi tarang.

² Malaekat itu bicara deng suara kuat bagini, “Ancor, so ancor, kota Babel yang basar itu so mo ancor. Kota itu mo jadi tampa tinggal setang-setang deng roh-roh jahat. Kota itu me so mo jadi tampa tinggal burung-burung tukang makang bangke deng binatang-binatang yang orang-orang binci.

³ Kota itu mo ancor karna orang-orang di kota itu pe kalakuang yang tara bae yang pengaru samua suku bangsa biking barang tara bae. Itu sama deng parampuang tara bae so kase minum anggur pa laki-laki, kong dong mabo sampe baseks sabarang. Raja-raja di dunia datang biking kajahatan sama-sama deng orang-orang Babel, sama deng laki-laki yang baku suka deng parampuang tara bae. Orang-orang yang bajual di kota itu so jadi kaya, karna orang-orang Babel pe keinginan mo babili barang-barang mahal talalu tinggi.”

⁴ Abis itu, kita dengar lagi suara laeng dari sorga yang bilang bagini, “Ee ngoni Kita pe umat! Kaluar dari kota itu, supaya ngoni tara tapengaru deng dorang yang jaga biking dosa, supaya hukuman yang dong mo dapa, jang kanal pa ngoni.

⁵ Barang, orang-orang di kota itu pe dosa so paling banya, so talapis-lapis sampe di langit, kong Tuhan Allah tara lupa samua dorang pe kajahatan.

⁶ Jadi kalakuang jahat yang orang-orang Babel biking, balas suda pa dorang sama deng yang dorang perna biking pa orang laeng. Dia pe balasan itu musti dua kali lipa. Dia musti rasa siksa dua kali lebe saki dari yang dia so biking pa orang-orang.

⁷ Orang-orang di kota Babel talalu makang puji deng suka hidup mewa. Jadi dorang musti dapa siksa deng dapa hukuman iko deng dong pe hidup dulu itu. Karna dulu, dorang angka-angka dong pe diri sandiri, dong bilang bagini, ‘Kita ini sama deng raja parampuang yang dudu di kursi raja! Kita akan tara jadi janda! Deng kita me tara akan mamanangis!’

⁸ Karna dong talalu makang puji bagitu, jadi dorang akan dapa cilaka yang jadi hukuman pa dong pe diri. Dalam satu hari saja, dorang dapa saki barát, kelaparan, deng dorang mamanangis karna talalu sengsara. Dorang me akan mati deng api yang kase angus pa dorang. Hukuman yang dong tarima itu dari Tuhan Allah, Dia itu Tuhan yang kuat.”

⁹ Nanti raja-raja di dunia yang so jadi kaya di kota Babel, deng yang so biking dosa sama deng orang yang baku suka deng parampuang tara bae itu, akan manangis deng badodora, karna lia asap dari kota Babel yang tabakar itu.

¹⁰ Dorang akan badiri kong lia-lia dari jao kota itu, karna tako jang sampe dong rasa siksa sama deng orang-orang di kota itu. Turus dorang bilang bagini, “Ado! Kasiang Babel! Kota basar, yang kuat. Cuma satu jam saja, kota itu langsung ancor! Babel so dapa hukum!”

¹¹ Pe dengar kabar itu, orang-orang yang biasa bajual di dunia manangis karna kota itu, barang so tarada orang yang akan bili lagi dorang pe barang-barang.

¹² Tarada lagi yang mo bili dorang pe barang-barang dari mas, perak, permata deng mutiara. So tarada lagi yang mo bili dorang pe baju yang biking dari kaeng yang mahal deng bagus, macam deng kaeng lenan, kaeng ungu, kaeng sutra, deng kaeng mera tua. Tarada lagi yang mo bili dong pe barang-barang dari kayu yang bobou sadap, barang dari gading, barang dari kayu yang mahal, barang dari tembaga, barang dari besi, deng barang dari batu pualam.

¹³ So tarada lagi yang mo bili dorang pe kayu manis, minya wangi, balsem, mur, deng kemenyan. So tarada lagi yang mo bili dong pe anggur, minya zaitun, tarigu deng gandum. So tarada lagi yang mo bili dong pe sapi, domba, kuda, kereta deng orang karja.

¹⁴ Orang-orang yang bajual itu akan manyasal kong bilang bagini, “Ado, orang-orang Babel e! Samua ngoni pe barang yang mahal yang ngoni ingin skali jadi ngoni punya, so tarada lagi. Samua so angus. Samua yang mewa deng yang biking ngana pe hidup sanang, so tarada. Ngoni so tara akan dapa samua itu lagi.”

¹⁵ Orang-orang yang bajual itu so jadi kaya karna orang-orang Babel yang biasa bili dorang pe barang. Dorang ini mo badiri jao-jao, karna tako jang sampe dong lagi dapa hukuman itu. Dorang mo manangis deng badodora karna kota Babel so angus.

¹⁶ Dorang bilang bagini, “Ado, cilaka kota Babel yang hebat. Dulu orang-orang di situ pake baju yang mahal deng bagus. Baju yang dorang pake itu, dong biking dari kaeng lenan, kaeng ungu, deng kaeng mera tua. Dulu, orang-orang di situ jaga pake mas, permata deng mutiara.

¹⁷ Tapi kasiang, cuma deng satu jam saja, samua dong pe kekayaan itu langsung abis.” Kong, kapten-kapten kapal, ana-ana bua kapal, penumpang-penumpang, deng samua orang yang dong pe tampa mancari di laut, tara barani badekat, dong cuma barani lia-lia dari jao saja.

¹⁸ Dorang samua bataria karna lia asap dari api yang bakar kota itu. Dorang bilang, “Ado kasiang! Tarada kota laeng lagi yang hebat sama deng kota Babel.”

¹⁹ Dorang ambur abu di dong pe kapala, tanda dong sedi, deng manangis deng badodora untuk kota Babel. Dorang bilang deng suara yang kuat bagini, “Ado, kasiang Babel e, dapa cilaka basar! Dari kota ini samua orang yang punya kapal jadi kaya. Tapi kasiang, cuma deng satu jam saja, samua dia pe kekayaan langsung abis.”

²⁰ Abis itu, ada suara yang bilang bagini, “Ee ngoni yang hidup di sorga, sanang suda ngoni, barang kota Babel itu Tuhan Allah so hukum. Sanang suda ngoni orang-orang yang so jadi Tuhan Allah pe umat, ngoni Tuhan pe utusan-utusan yang orang sebut rasul-rasul, deng ngoni nabi-nabi yang jaga kase turus Tuhan Allah pe pasáng! Barang, Tuhan Allah so kase hukuman pa kota itu karna samua kajahatan yang orang-orang di kota itu perna biking pa ngoni.”

²¹ Abis itu, kita lia malaekat satu yang kuat. Dia angka batu basar skali, dia pe basar sama deng batu gilingan di tampa bagiling gandum, kong dia buang di laut. Waktu dia buang, dia bilang bagini, “Bagini dia pe cara Tuhan Allah akan buang kuat-kuat kota Babel ka bawa, sampe kota itu so tara akan dapa lia lagi.

²² Di kota itu so tarada lagi orang yang akan maeng musik pake kecapi, suling deng trompet. Deng so tara akan dengar lagi orang manyanyi di situ. Tarada lagi tukang yang karja di dia pe tampa karja lagi. Tarada lagi orang yang bagiling gandum di kota itu.

²³ So tarada lagi cahaya lampu di kota itu, deng so tara dengar orang yang biking pesta kawing lagi di situ. Barang, dulu orang-orang yang bajual di kota itu paling terkenal, kong dorang itu ada pake tiop-tiop la kase pengaru pa samua suku bangsa di dunia supaya iko pa dorang.

²⁴ Kota itu dapa hukum karna orang-orang di situ so bunu pa nabi-nabi yang kase turus Tuhan Allah pe pasáng, deng dong bunu pa orang-orang yang so jadi Tuhan Allah pe umat. Orang-orang di kota itu so sala, karna samua orang yang so mati di dunia waktu itu, dong yang bunu.”