Wahyu 16 - Perjanjian Baru Bahasa Melayu Maluku Utara

Tuju malaekat biking tuju cilaka di bumi

¹ Abis itu, kita dengar suara yang kuat dari Tuhan Allah pe Ruma di sorga. Suara itu bilang pa tuju malaekat itu bagini, “Mangko tuju yang ngoni pegang itu, dia pe isi Tuhan Allah pe mara, pigi suda kong buang dia pe isi itu di bumi!”

² Pe dengar itu, malaekat yang pertama pigi buang mangko yang dia pegang itu pe isi di bumi. Turus, bisol-bisol timbul pa samua orang yang pake cap dari binatang jahat itu deng yang semba pa binatang itu pe patong. Bisol yang timbul itu saki skali deng banana.

³ Abis itu, malaekat yang kedua buang mangko yang dia pegang itu pe isi di laut. Turus, laut itu jadi dara, sama deng orang mati pe dara yang bawarna mera baitam. Karna itu, samua yang hidup di laut, mati.

⁴ Turus, malaekat yang ketiga buang mangko yang dia pegang itu pe isi di kali-kali deng di mata-mata aer, turus samua aer itu jadi dara.

⁵ Kong kita dengar malaekat yang berkuasa di samua aer itu bilang bagini, “Tuhan, Tuhan Allah yang Kudus, yang so ada dari dulu sampe skarang. Tuhan Allah itu adil, karna Tuhan Allah pe hukuman itu butul, iko deng dong pe sala.

⁶ Barang, orang-orang jahat so bunu pa orang-orang yang so jadi Tuhan Allah pe umat, deng pa nabi-nabi yang kase turus Tuhan Allah pe pasáng, sampe dong pe dara me tatumpa. Jadi Tuhan Allah biking samua aer jadi dara, kong orang-orang jahat itu cuma bisa minum aer yang so jadi dara itu. Itu hukuman yang paling pas untuk orang-orang jahat itu.”

⁷ Kong kita dengar suara dari tampa bakar korban persembahan, bilang bagini, “Ya Tuhan, Tuhan Allah Yang Paling Berkuasa. Hukuman yang Tuhan kase itu samua adil deng butul!”

⁸ Abis itu, malaekat yang keempat buang mangko yang dia pegang itu pe isi di matahari. Turus matahari itu jadi panas skali sampe manusia me tabakar.

⁹ Sinar matahari yang panas skali itu biking sampe manusia pe kuli angus. Tapi, biar bagitu, dorang tetap tara mau bertobat deng dorang tara mau puji deng hormat pa Tuhan Allah. Kong lebe soe lagi, dorang kase tara bae Tuhan Allah pe nama yang ada kuasa biking cilaka-cilaka itu.

¹⁰ Abis itu, malaekat yang kelima buang mangko yang dia pegang itu pe isi pa binatang jahat itu pe kursi raja. Kage-kage galap tutu pa orang-orang yang jaga iko deng semba pa binatang itu, turus dong rasa sengsara skali sampe dorang gigi-gigi dorang pe lida.

¹¹ Dorang kase tara bae Tuhan Allah yang di sorga pe nama karna bisol-bisol yang timbul pa dorang itu, deng karna saki yang dorang rasa itu. Tapi tetap dorang tara mau bertobat dari kalakuang jahat yang dorang biking itu.

¹² Abis itu, malaekat yang keanam buang mangko yang dia pegang itu pe isi di kali Efrat, kali yang basar itu, kong aer di kali itu jadi kiring. Deng bagitu, raja-raja dari sabla timur, dorang bole datang deng dong pe tentara, bajalang iko kali yang so kiring itu.

¹³ Kong kita lia ada setang tiga yang dong pe rupa sama deng kodok. Dari tiga setang itu, satu kaluar dari naga pe mulu, satu kaluar dari binatang jahat pe mulu deng satu lagi kaluar dari nabi palsu pe mulu.

¹⁴ Itu suda tiga setang yang jaga biking mujizat yang biking orang herang. Dorang pigi cari pa raja-raja di seluru dunia, kong kumpul pa dorang la baku prang lawan pa Tuhan Allah Yang Paling Berkuasa. Prang itu nanti jadi di hari basar, hari yang Tuhan Allah Yang Paling Berkuasa so tentukan mo kase kala Dia pe musu-musu.

¹⁵ Tuhan bilang, “Perhatikan bae-bae, tarada yang tau tempo apa Kita mo datang ulang dari sorga. Kita datang tara sangka-sangka, sama deng papancuri datang. Orang yang salalu bajaga-jaga dalam dia pe hidup, dia itu paling sanang. Dia itu sama deng orang yang jaga perhatikan dia pe baju, supaya tara bajalang batalanjang deng tara malu di muka umum.”

¹⁶ Kong tiga setang itu bakumpul pa raja-raja di satu tampa, di tampa yang dalam bahasa Ibrani dapa sebut, Harmagedon.

¹⁷ Abis itu, malaekat yang ketuju buang mangko yang dia pegang itu pe isi di udara. Kong dapa dengar suara dari kursi raja yang ada di dalam Tuhan Allah pe Ruma di sorga, yang bilang bagini, “Samua Kita pe hukuman ini so abis, Kita so tara mara lagi.”

¹⁸ Turus ada kilat yang basambar deng guntur yang babunyi kuat skali. Kong ada lagi tana goyang yang kuat skali yang bolong perna jadi dari waktu manusia ada di bumi. Tana goyang itu kuat skali,

¹⁹ sampe kota Babel yang basar itu tabalá jadi tiga. Deng kota-kota laeng yang dia pe orang tara kanal pa Tuhan Allah me ancor samua. Itu jadi karna Tuhan Allah tara lupa Dia pe mara pa kota Babel yang basar itu, tapi kase hukuman pa dorang tarada ampun. Itu sama deng Dia kase pa dorang minum anggur yang kuat skali.

²⁰ Kong samua pulo ilang, deng gunung-gunung me so tara dapa lia lagi.

²¹ Turus ujang es yang basar-basar jatu dari langit kanal pa orang-orang di bumi. Satu gumpal es itu dia pe barát kira-kira lima pulu kilo. Ujang es itu biking manusia sengsara skali, jadi dong kase tara bae Tuhan Allah pe nama.