Wahyu 14 - Perjanjian Baru Bahasa Melayu Maluku Utara

Anak Domba deng Dia pe umat saratus ampa pulu ampa ribu

¹ Abis itu, kita lia Anak Domba badiri di gunung kacil satu, gunung itu pe nama Sion. Anak Domba itu badiri sama-sama deng Dia pe umat saratus ampa pulu ampa ribu. Di orang-orang itu pe testa ada tatulis Anak Domba pe nama deng Dia pe Bapa pe nama.

² Turus kita dengar ada suara dari sorga. Suara itu kuat skali, sama deng aer terjun basar deng guntur pe babunyi. Tapi suara itu bagus skali, sama deng alat musik kecapi yang banya, kong ada banya orang yang bakuti.

³ Kong kita dengar saratus ampa pulu ampa ribu orang itu manyanyi lagu baru pa Tuhan Allah pe muka, yang ada dudu di kursi raja, deng di muka ampa binatang yang luar biasa itu, deng di muka pemimpin dua pulu ampa orang itu. Tarada satu orang laeng di luar dorang yang bisa balajar lagu baru itu. Saratus ampa pulu ampa ribu orang itu yang Tuhan Allah so kase slamat dari dunia.

⁴ Dorang itu pe hidup bersi pa Tuhan Allah pe muka, itu sama deng laki-laki yang tara perna tidor deng parampuang. Dorang itu jaga iko pa Anak Domba itu di mana saja Dia pigi. Tuhan Allah so tebus pa dorang kamuka dari samua orang, jadi dorang itu so jadi sama deng korban persembahan yang pertama untuk Tuhan Allah deng Anak Domba.

⁵ Dorang itu tara perna bicara putar bale, deng tarada orang yang bisa kase sala pa dorang.

Malaekat tiga bawa pasáng dari Tuhan Allah

⁶ Abis itu, kita lia satu malaekat laeng lagi ada terbang di langit. Dia itu bawa pasáng dari Tuhan Allah yang tara beruba slama-lamanya. Dia mo kase tau pasáng itu pa orang-orang yang tinggal di bumi, pa orang-orang dari samua fam, samua suku, samua bahasa deng samua bangsa.

⁷ Malaekat itu bicara kuat-kuat bagini, “Ngoni musti tako pa Tuhan Allah kong puji deng hormat pa Dia! Karna dia pe waktu so sampe, Dia mo adili samua orang deng kase hukum pa dorang yang tara iko pa Dia. Semba suda pa Dia! Dia yang biking langit, bumi, laut deng samua mata aer.”

⁸ Abis itu, kita lia malaekat yang kedua datang lagi, dia bilang bagini, “Suda, so ancor! So ancor, kota Babel yang basar itu. Kota itu so rata deng tana! Barang, orang-orang di kota Babel itu so pengaru pa samua suku bangsa di bumi la iko dong pe kalakuang tara bae. Itu sama deng parampuang tara bae so kase minum anggur pa dorang kong dong mabo sampe baseks sabarang.”

⁹ Turus, ada malaekat laeng lagi yang ketiga. Malaekat itu iko dari balakang pa dua malaekat yang so kamuka. Malaekat ketiga itu bicara kuat-kuat bilang bagini, “Sapa saja yang semba pa binatang jahat itu, deng pa binatang itu pe patong, deng sapa saja yang so tarima binatang jahat pe cap di dia pe testa deng tangan,

¹⁰ Tuhan Allah mara skali kong mo hukum pa dorang. Hukuman itu sama deng dorang mo minum anggur pait yang tara campur deng apa-apa. Tuhan Allah mo buang pa dorang di api deng di belerang kong malaekat-malaekat yang kudus deng Anak Domba lia pa dorang dari atas.

¹¹ Api pe asap yang siksa pa dorang itu akan ada sampe slama-lamanya. Dorang yang jaga semba pa binatang jahat deng dia pe patong, deng sapa saja yang tarima cap yang ada binatang itu pe nama, dorang itu dapa siksa tara berenti-berenti.”

¹² Jadi yang penting di sini, orang-orang yang so jadi Tuhan Allah pe umat, musti batahang percaya pa Dia biar dapa siksa. Dorang itu yang iko Tuhan Allah pe parenta, deng tetap percaya pa Yesus.

¹³ Kong kita dengar suara dari sorga bilang bagini, “Yohanes, tulis ini: mulai skarang, orang-orang yang mati karna percaya pa Tuhan, dorang itu paling sanang suda!” Kong Tuhan Allah pe Roh bilang bagini, “Butul, butul dorang itu paling sanang suda! Dorang akan istrahat dari dong pe karja karas, jadi Tuhan akan balas dong pe lala itu deng apa yang bae di sorga.”

Tuhan Allah hukum pa orang-orang yang tara iko pa Dia

¹⁴ Abis itu, kita lia ada awan puti satu gumpal. Kong ada satu orang dudu di atas awan itu. Orang itu sama deng Anak Manusia yang dari sorga. Pa Dia pe kapala ada pake makota mas, deng Dia ada pegang parang sabit satu yang tajam.

¹⁵ Turus kita lia ada malaekat satu yang laeng yang kaluar dari Tuhan Allah pe Ruma. Malaekat itu bicara kuat skali pa Dia yang dudu di atas awan itu bagini, “Pake parang sabit itu la mulai bapete suda, karna musim bapanen so sampe deng hasil-hasil di bumi so siap untuk panen.”

¹⁶ Jadi Dia yang dudu di atas awan itu, angka Dia pe parang sabit di bumi untuk bapanen, kong ambe dia pe hasil-hasil.

¹⁷ Abis itu, ada malaekat satu lagi yang kaluar dari Tuhan Allah pe Ruma yang di sorga. Dia me ada pegang parang sabit satu yang tajam.

¹⁸ Turus, malaekat satu lagi kaluar dari dekat tampa bakar korban persembahan. Dia itu yang dapa tugas untuk jaga api di situ. Kong dia bicara kuat-kuat pa malaekat yang pegang parang sabit yang tajam itu bagini, “Angka ngana pe parang sabit itu la ka sana panen bua-bua anggur yang ada di bumi, karna bua-bua itu so masa.”

¹⁹ Abis dengar itu, malaekat itu dia ayun dia pe parang sabit di bumi. Dia potong bua-bua anggur itu kong kase lempar bua-bua anggur itu di tampa baramas anggur. Tampa itu, jadi lambang tampa Tuhan Allah kase hukum orang karna Dia mara skali.

²⁰ Dorang pe cara baramas bua-bua anggur itu, dorang injang-injang di tampa baramas anggur yang ada di luar kota. Bagitu me deng orang-orang yang tara iko pa Tuhan, dorang itu mo dapa hukum barát sampe dorang pe dara me malele. Dara yang malele pe banya skali sama deng kali yang mangalir. Dia pe panjang sampe tiga ratus kilo, dia pe dolom amper dua meter kalu mo ukur dari tana sampe di kuda pe mulu.