Wahyu 11 - Perjanjian Baru Bahasa Melayu Maluku Utara

Tuhan Allah utus dua orang yang jadi Dia pe saksi

¹ Abis itu, ada yang kase pa kita tongkat satu yang jaga pake baukur, kong parenta pa kita bagini, “Yohanes, pigi suda kong ka sana ukur Tuhan Allah pe Ruma Ibada Pusat deng tampa bakar korban persembahan. Ngana lagi hitung barapa orang yang basambayang di situ.

² Tapi kintal di bagian luar di Ruma Ibada Pusat pe kompleks itu, tara usa ngana ukur, karna tampa itu so kase untuk suku-suku bangsa laeng yang tara kanal pa Kita. Kong dorang mo injang-injang deng kuasai kota Yerusalem, kota yang suci itu, pe lama ampa pulu dua bulan.

³ Kita akan utus dua orang untuk jadi Kita pe saksi, supaya dorang mo kase tau Kita pe pasáng tentang apa yang akan jadi nanti. Dorang mo kase tau pasáng itu pa orang-orang selama saribu dua ratus anam pulu ribu hari. Dorang akan pake baju duka karna sedi deng apa yang mo jadi di kota itu.”

⁴ Dua saksi itu bole kase sama deng dua pohong zaitun deng dua tiang tampa taru lampu yang badiri pa Tuhan Allah pe muka yang berkuasa di seluru dunia ini.

⁵ Kalu ada orang yang mo biking jahat pa dong dua itu, akan ada api yang kaluar dari dorang pe mulu la mo bakar dong pe musu itu. Deng bagitu, orang yang mo biking jahat pa dorang akan angus sampe mati.

⁶ Turus, selama dorang kase tau Tuhan Allah pe pasáng pa orang-orang, dorang me dapa kuasa dari Tuhan Allah untuk biking ujang tara turung-turung dari langit. Dorang me dapa kuasa untuk biking aer samua jadi dara. Deng dorang me ada kuasa untuk biking macam-macam cilaka di bumi. Jadi, tiap kali dorang mau cilaka jadi, pasti jadi.

⁷ Kalu dua saksi so abis kase tau Tuhan Allah pe pasáng, ada binatang jahat yang kaluar dari jurang maut, tampa tahang setang-setang. Binatang jahat itu akan serang deng kase kala pa dong dua kong bunu pa dong dua itu.

⁸ Dua saksi itu pe mayat akan tabiar-biar di jalang basar, di kota basar yang dulu orang-orang salib pa dorang pe Tuhan. Orang-orang di kota itu pe jahat skali, sampe orang jaga bilang kota itu kota Sodom atau Mesir dulu.

⁹ Orang-orang dari samua fam, suku bangsa, bangsa deng bahasa cuma haga-haga dorang dua pe mayat itu selama tiga hari stenga karna dorang tara kase ijin kubur dua mayat itu.

¹⁰ Orang-orang yang ada di dunia ini akan sanang skali karna dua orang saksi yang kase tau Tuhan Allah pe pasáng itu so mati. Dorang samua mo bapesta deng baku kase kado karna sanang so talapas dari dua orang yang jaga biking cilaka sampe samua orang di bumi dapa banya siksa.

¹¹ Tapi bagitu lewat tiga hari stenga, Tuhan Allah kase napas pa dua orang itu kong dorang dua hidup ulang, turus badiri. Kong samua orang yang lia pa dorang dua jadi tako skali.

¹² Dua orang itu dapa dengar suara dari sorga kuat skali yang bilang pa dorang bagini, “Ngoni dua nae kamari!” Turus dorang dua nae pigi di sorga. Sementara dorang dua nae, awan bungkus pa dorang. Waktu itu, dorang pe musu-musu lia-lia dorang nae.

¹³ Waktu itu suda, ada tana goyang pe kuat skali. Kalu mo bagi kota itu dalam spulu bagian, satu bagian yang ancor. Deng tuju ribu orang mati karna tana goyang itu. Orang-orang yang tara mati karna tana goyang itu, dorang jadi tako skali kong dorang puji deng hormat pa Tuhan Allah yang di sorga.

¹⁴ Deng bagitu, cilaka kedua so lewat. Tapi awas, cilaka yang ketiga so mo datang.

Malaekat ketuju tiop dia pe trompet

¹⁵ Malaekat yang ketuju tiop dia pe trompet, turus kita dengar banya suara yang kuat skali dari sorga bilang bagini, “Skarang yang berkuasa di dunia cuma torang pe Tuhan Allah deng Yesus Kristus, Raja yang Tuhan Allah pili untuk kase slamat pa manusia. Dia itu akan Berkuasa sebagai Raja sampe slama-lamanya.”

¹⁶ Pe dengar itu, dua pulu ampa pemimpin yang dudu di dorang pe kursi raja pa Tuhan Allah pe muka, dorang berlutut semba pa Tuhan Allah sampe dong pe muka kanal di tana.

¹⁷ Dorang bilang, “Puji sukur pa Tuhan Allah Yang Paling Berkuasa! Dia yang ada dari dulu sampe skarang. Torang bilang tarimakasi banya karna Dia pe kuasa basar, deng karna Dia so mulai berkuasa sebagai Raja.

¹⁸ Kong samua suku bangsa yang tara percaya pa Dia dong mara, karna dong mo lawan pa Dia. Tapi skarang so dia pe waktu Tuhan Allah mara, Dia mo hukum pa orang-orang yang tara mau kanal pa Dia. Skarang dia pe waktu so sampe, Dia mo adili orang-orang yang so mati. Turus dia pe waktu so sampe, Tuhan Allah mo balas yang bae pa Dia pe orang-orang yang jaga biking apa yang Dia suru: dorang itu nabi-nabi yang kase turus Tuhan Allah pe pasáng, deng orang-orang yang so jadi Tuhan Allah pe umat yang hormati pa Dia, biar itu orang biasa ka orang penting. Kong waktu itu, Tuhan Allah mo hukum pa dorang yang kase rusak bumi!”

¹⁹ Abis itu, kita dapa lia Tuhan Allah pe Ruma di sorga tabuka, kong di dalam itu kita dapa lia Tuhan Allah pe Kotak Perjanjian. Turus ada kilat deng guntur babunyi, tana goyang yang kuat, deng ujang es yang karas skali.