Titus 2 - Perjanjian Baru Bahasa Melayu Maluku Utara

Ajaran yang butul jadi alasan untuk hidup yang butul

¹ Tapi Titus, ngana kase ajar suda pa orang-orang la dorang iko ajaran yang butul.

² Ngana kase ajar pa laki-laki yang so tua supaya dorang mampo batahang diri, deng dong pe kalakuang musti bae yang biking orang hormati pa dorang. Dorang musti tau bawa diri bae-bae, percaya kuat pa Tuhan, deng sayang pa orang laeng. Biar susa me, dorang musti tetap iko pa Tuhan.

³ Bagitu lagi deng parampuang-parampuang yang so tua, ngana kase ajar pa dorang supaya dorang pe cara hidup iko Tuhan Allah pe mau. Dorang tara bole biking busu orang pe nama, deng tara bole jadi pangmabo. Dorang musti kase ajar yang bae pa orang-orang.

⁴ Deng bagitu, dorang bole kase ajar pa parampuang-parampuang yang masi muda supaya sayang dong pe laki deng dong pe ana-ana,

⁵ dorang hidup iko Tuhan pe ajaran, dorang pe hati bersi pa Tuhan pe muka, dorang mampo ator dong pe ruma tangga bae-bae, dorang pe hati bae, deng dorang dengar-dengaran pa dong pe laki. Kalu dorang pe hidup bagitu, orang tara dapa alasan untuk kase tara bae Tuhan Allah pe firman.

⁶ Bagitu lagi deng laki-laki yang masi muda, kase nasehat pa dorang supaya dorang kuasai dorang pe hidup dalam sagala hal.

⁷ Kong Titus, ngana lagi pe kalakuang musti bagus, supaya ngana bole jadi conto pa dorang. Kalu ngana mangajar, musti deng hati yang bersi deng sunggu-sunggu.

⁸ Ngana musti pande pake kata-kata yang pas supaya orang tarima pa ngana kong tara dapa alasan mo kase sala pa torang. Orang yang malawang pa torang akan jadi malu sandiri.

⁹ Ngana me musti kase ajar pa orang-orang karja supaya dorang salalu dengar-dengaran pa dong pe tuang, jang malawang pa dong pe tuang tapi dong musti salalu biking sanang dong pe tuang pe hati.

¹⁰ Dorang tara bole ambe dong pe tuang pe barang, biar cuma sadiki. Dorang musti biking barang yang bae supaya dong pe tuang percaya pa dorang. Kalu dorang jujur bagitu, orang laeng jadi suka deng torang pe ajaran yang dari Tuhan Allah. Tuhan Allah itu yang kase slamat pa torang.

¹¹ Torang musti hidup macam bagitu, barang Tuhan Allah so kase jalang la torang samua bole dapa slamat dari torang pe dosa-dosa, supaya torang jang dapa hukuman. Itu Dia pe bae pa torang.

¹² Tuhan kase Dia pe bae itu, biking torang jadi sadar la kase tinggal torang pe kalakuang yang tara iko Tuhan Allah pe mau deng yang cuma iko dunia pe mau. Deng bagitu torang mampo kuasai diri dalam sagala hal, jadi orang yang hidup butul pa Tuhan Allah pe muka, deng setia pa Dia di dunia skarang ini.

¹³ Sementara torang biking samua itu, torang batunggu hari yang nanti biking torang paling sanang waktu Tuhan Yesus Kristus datang lagi deng Dia pe kuasa yang luar biasa. Dia itu suda torang pe Tuhan Allah Yang Paling Berkuasa, deng yang kase slamat pa torang. Torang pe harapan cuma pa Dia.

¹⁴ Dia yang so serakan Dia pe diri untuk mati la kase bebas pa torang dari torang pe dosa. Dia biking torang pe hati jadi bersi, sampe torang jadi Dia pe umat sandiri yang suka biking barang yang bae.

¹⁵ Titus, ngana musti kase ajar samua itu pa orang-orang percaya. Ngana kase smangat pa dorang la dorang tamba percaya pa Tuhan, deng togor pa dorang yang sala. Tuhan so kase kuasa pa ngana untuk kase ajar pa dorang, jadi jang ada orang yang pandang enteng pa ngana.