Titus 1 - Perjanjian Baru Bahasa Melayu Maluku Utara

Paulus pe salam

¹ Titus, salam dari kita Paulus. Kita ini jaga biking apa yang Tuhan Allah suru deng kita ini Yesus Kristus pe utusan yang orang sebut rasul. Kita jadi Dia pe rasul itu supaya kita kase tau Tuhan pe Kabar Bae pa orang-orang yang Dia so pili la dorang dapa slamat. Kita dapa tugas kase kuat dorang pe percaya deng kase tau pa dorang ajaran yang butul. Ajaran itu yang mo tolong pa dorang supaya dorang bisa hidup iko Tuhan Allah pe mau.

² Kita ajar pa orang-orang yang percaya itu, supaya dorang bole baharap deng yakin, dorang bole dapa hidup deng Tuhan Allah slama-lamanya, sama deng Tuhan Allah so janji. Karna waktu Tuhan Allah bolong biking dunia ini, Dia so janji kamuka, Dia mo kase hidup slama-lamanya pa orang-orang yang percaya pa Dia. Dia pe janji itu pasti jadi, karna Tuhan Allah tara perna bafoya.

³ Kong pas di waktu yang Tuhan Allah so tentukan, Dia kase tau Kabar Bae itu la orang tau cara mo dapa hidup deng Dia slama-lamanya. Kabar Bae ini yang Tuhan Allah so kase percaya pa kita la kita kase tau pa orang-orang. Tuhan Allah itu yang kase slamat pa torang.

⁴ Titus, torang dua sama-sama percaya pa Yesus Kristus, jadi kita anggap ngana so sama deng kita pe ana sandiri. Kita minta pa Tuhan Allah, torang pe Bapa, deng pa Kristus Yesus yang kase slamat pa manusia, supaya kase yang bae pa ngana, deng salalu biking ngana pe hati tetap tenang.

Sarat-sarat untuk mo jadi penatua-penatua di jemaat

⁵ Titus, kita kase tinggal pa ngana di pulo Kreta itu, supaya ngana bole ator babarapa hal yang bolong selesai di jemaat, deng ngana pigi di kota-kota la lantik penatua-penatua jemaat, sama deng yang kita so suru pa ngana.

⁶ Tiap orang yang ngana pili mo jadi penatua, dia pe cara hidup musti butul, deng dia musti hidup setia pa satu bini saja. Dia pe ana-ana me musti percaya pa Yesus Kristus, deng tarada orang yang bilang ana-ana itu suka biking barang yang jahat atau dorang itu pangmalawang.

⁷ Barang, orang yang pimpin jemaat, dia pe karja itu urus Tuhan Allah pe jemaat. Dia pe cara hidup musti butul, tara sombong, tara pangmara, tara pangmabo, tara pukul-pukul orang, deng tara gila doi.

⁸ Tapi dia musti suka tarima orang laeng di dia pe ruma, deng suka hal-hal yang bae. Dia me musti tau bawa diri bae-bae, hidup butul pa Tuhan Allah pe muka, hidup cuma iko Tuhan Allah pe mau, deng mampo batahang diri.

⁹ Dia musti pegang butul-butul Tuhan pe ajaran yang dia so dapa, supaya dia mampo kase nasehat pa orang laeng iko ajaran itu, deng dia me bisa kase mangarti pa orang-orang yang suka lawan ajaran yang butul supaya dorang jadi yakin deng ajaran itu.

Orang-orang yang jaga kase ajar ajaran yang tara butul

¹⁰ Kita suru ngana cari orang yang pimpin macam bagitu, karna dorang itu musti kuat hadapi banya orang yang tantang ajaran yang butul skarang ini. Orang-orang itu suka pengaru orang laeng supaya iko pa dorang, padahal dorang pe ajaran itu ajaran yang sala deng tara guna. Lebe-lebe lagi, ada dari dorang itu, orang agama Yahudi yang so percaya pa Yesus, tapi dong kase ajar kata, kalu orang bukang Yahudi yang mo iko pa Yesus, musti sunat dulu.

¹¹ Orang-orang yang bagitu, ngana musti larang pa dorang supaya jang dong ajar lagi ajaran yang tara butul itu. Barang, dorang so biking kaco banya keluarga deng dong pe ajaran itu. Padahal dorang itu mangajar cuma karna mau dapa doi.

¹² Memang dorang pe orang sandiri yang jadi nabi perna bilang bagini, “Orang-orang dari pulo Kreta pangbafoya, deng dorang pe sifat sama deng binatang yang jahat yang golojo deng pamalas.”

¹³ Apa yang nabi so kase tau itu butul. Jadi ngana musti tegas kase inga pa dorang supaya dorang butul-butul iko ajaran yang butul saja.

¹⁴ Kong togor pa dorang supaya jang dengar lagi orang Yahudi pe carita-carita dulu-dulu yang tara guna deng aturan-aturan dari orang-orang yang so tara iko ajaran yang butul.

¹⁵ Untuk orang yang dong pe hati bersi pa Tuhan, tarada aturan agama yang larang pa dorang. Tapi untuk orang-orang yang dong pe hati tara bae deng tara percaya pa Tuhan, dorang tara bisa biking barang yang bae karna dorang pe hati deng pikiran so tara tau mana yang butul.

¹⁶ Dorang bilang kata, dorang kanal pa Tuhan Allah, padahal dong pe kalakuang itu kase tunju dorang itu tara kanal pa Dia. Orang-orang yang jahat bagitu, dorang tara iko Tuhan Allah pe mau, deng tara mampo biking barang yang bae.