Roma 9 - Perjanjian Baru Bahasa Melayu Maluku Utara

Paulus pe hati saki deng sedi skali karna orang Israel tara percaya pa Yesus Kristus

¹ Sudara-sudara, kita so percaya pa Yesus Kristus, jadi kita mo bicara deng sunggu-sunggu pa ngoni, kita tara bafoya. Kita pe hati yang Roh Kudus ada kuasai lagi bilang itu butul.

² Ini yang kita mo bilang: kita pe hati saki deng sedi skali

³ karna kita pe sudara-sudara orang Yahudi tara mau percaya pa Yesus Kristus. Dorang itu sudara-sudara satu bangsa deng kita, jadi kita sanang skali kalu kita pe sudara-sudara itu dapa slamat dari dosa-dosa. Kalu saja kita bisa ganti pa dorang dapa hukuman deng tapisa dari Yesus Kristus, kita siap dapa hukuman itu, asal dorang bisa dapa slamat.

⁴ Dorang itu orang Israel. Dari dulu, Tuhan Allah pili kong biking pa dorang jadi Dia pe ana-ana. Deng Tuhan Allah so kase tunju Dia pe kuasa yang hebat pa dorang pe orang tua dulu-dulu. Tuhan Allah me so biking janji deng dorang pe orang tua dulu-dulu yang biking dorang jadi Dia pe umat. Tuhan Allah so kase pa dorang aturan di lima kitab Musa kong kase tunju pa dorang bagimana cara yang butul supaya semba pa Dia. Turus ada banya lagi janji yang Dia kase pa dorang pe orang tua dulu-dulu.

⁵ Dorang itu me turunan dari Abraham, Ishak deng Yakub, kong dari turunan ini Yesus Kristus lahir sebagai manusia untuk mo kase slamat pa manusia. Yesus Kristus itu suda Tuhan Allah, Dia pe kuasa lebe basar dari samua yang ada. Jadi Dia yang pantas dapa puji sampe slama-lamanya. Amin.

⁶ Memang banya orang Yahudi tara percaya pa Yesus Kristus. Tapi biar bagitu, kita tarada maksut mo bilang Tuhan Allah pe janji-janji pa torang pe orang tua dulu-dulu itu so tara akan jadi. Tapi kita pe maksut, tara samua orang yang lahir dari orang Israel pe turunan itu yang mo jadi Tuhan Allah pe umat.

⁷ Deng, tara samua Abraham pe turunan yang akan jadi Tuhan Allah pe ana-ana kong mo dapa Dia pe janji. Conto, Tuhan Allah so perna bilang pa Abraham bagini, “Cuma ngana pe turunan yang dari ngana pe ana Ishak saja, yang akan dapa Kita pe janji.”

⁸ Itu berarti, tara samua Abraham pe turunan yang Tuhan Allah biking jadi Dia pe ana-ana, tapi cuma orang yang percaya pa Tuhan Allah pe janji saja, dorang itu yang Tuhan Allah biking jadi Dia pe ana-ana.

⁹ Tuhan Allah janji pa Abraham bagini, “Satu taong lagi Kita mo bale ulang kamari, kong waktu itu, Sara mo melahirkan ana laki-laki.”

¹⁰ Deng bukang cuma itu saja. Ada conto laeng lagi waktu Ribka melahirkan ana laki-laki kambar. Dorang pe papa itu Ishak, Ishak itu torang pe orang tua dulu-dulu.

^11-12 Waktu ana dua itu bolong lahir, kong dorang bolong tau biking barang yang bae deng yang jahat, Tuhan Allah so bilang bagini pa Ribka, “Ngana pe ana yang bongso nanti mo jadi tuang pa dia pe kaka.” Tuhan Allah pe maksut supaya torang bole lia, Dia pili bukang iko apa yang dorang dua ada biking, tapi iko Tuhan Allah pe mau.

¹³ Yang kaka dia pe nama Esau, kong yang bongso dia pe nama Yakub. Tentang dorang, ada tatulis di Kitab Suci bagini: “Kita sayang pa Yakub, tapi Kita tara suka pa Esau.”

¹⁴ Deng bagitu, torang tau Tuhan Allah pili pa satu orang, kong yang laeng Dia tara pili. Tapi bukang berarti, Tuhan Allah itu tara adil, to?

¹⁵ Tuhan Allah sandiri so perna bilang pa nabi Musa bagini, “Kita mo kase tunju Kita pe rasa kasiang pa sapa saja yang Kita rasa kasiang. Deng Kita sandiri mo sayang pa sapa saja yang Kita rasa sayang.”

¹⁶ Jadi, kalu Tuhan Allah pili orang, Dia tara iko manusia pe mau, atau manusia pe usaha biking barang yang bae, tapi iko Tuhan Allah pe mau supaya Dia bole kase tunju Dia pe rasa sayang pa orang-orang.

¹⁷ Di Kitab Suci ada tulis tentang apa yang Tuhan Allah bilang pa raja Mesir bagini, “Kita angka pa ngana jadi raja, Kita pe maksut supaya waktu ngana malawang pa Kita, Kita bisa kase tunju Kita pe kuasa, sampe samua orang di dunia ini bole puji pa Kita.”

¹⁸ Jadi sudara-sudara, kalu Tuhan Allah mo kase tunju Dia pe rasa sayang pa satu orang, itu tersera Dia. Deng kalu Dia mo biking orang jadi karas kapala, itu me tersera pa Dia.

Tuhan Allah binci dosa, tapi Dia sabar pa orang yang Dia rasa kasiang

¹⁹ Tapi jang sampe ada orang yang bilang bagini, “Kalu samua yang jadi itu iko Tuhan Allah pe mau, bikiapa kong Tuhan Allah masi kase sala pa torang karna torang pe dosa? Padahal kalu torang biking sala itu, iko Dia pe mau.”

²⁰ Tapi torang tara bole pikir bagitu. Torang ini sapa kong, sampe torang barani malawang pa Tuhan Allah? Torang ini cuma manusia yang Tuhan Allah cipta. Masa torang bilang bagini pa Dia, “Bikiapa kong Tuhan Allah cipta pa kita bagini?”

²¹ Dia pe conto sama deng tukang biking pot, dia pe hak biking pot iko dia pe mau. Tana liat satu gumpal dia bisa biking pot dua. Pot yang satu, dia biking supaya mo pake di acara-acara penting, kong yang satu lagi, dia biking cuma mo pake di ruma.

²² Bagitu lagi deng Tuhan Allah. Dia pe hak biking pa torang iko Dia pe mau. Biar Dia mara pa dorang yang jaga biking dosa deng Dia ingin kase tunju Dia pe kuasa untuk hukum pa dorang, tapi Dia sabar deng dorang sampe Dia tara hukum pa dorang yang pantas mo tapisa deng Tuhan Allah slama-lamanya.

²³ Tuhan Allah sabar pa dorang supaya mo kase tunju Dia pe sayang yang luar biasa pa dorang yang Dia rasa kasiang. Dorang itu, Dia so pili dari dulu supaya dapa Dia pe sayang yang luar biasa itu.

²⁴ Kong orang-orang itu bukang cuma torang orang Yahudi saja tapi orang yang bukang Yahudi lagi.

²⁵ Tentang orang-orang yang bukang Yahudi, Tuhan Allah bilang bagini di kitab nabi Hosea, “Dulu orang-orang yang bukang Yahudi, Kita bolong pili pa dorang jadi Kita pe umat, tapi nanti Kita mo bilang, dorang itu Kita pe umat. Deng suku-suku yang dulu Kita tara sayang, dorang itu nanti mo jadi suku-suku yang Kita sayang.”

²⁶ Kong ada lagi tatulis bagini tentang orang-orang yang bukang Yahudi, “Di daera yang dulu Kita bilang dorang bukang Kita pe umat, di situ me nanti Kita bilang dorang itu Kita pe ana-ana. Kita itu Tuhan Allah yang hidup.”

²⁷ Tapi tentang orang Yahudi, Tuhan Allah togor karas pa dorang, kong ada tatulis di kitab nabi Yesaya bagini, “Biar orang Israel pe turunan banya sama deng paser di laut, tapi nanti cuma sadiki saja yang mo slamat dari dosa-dosa.

²⁸ Karna so tara lama lagi Tuhan Allah pasti mo hukum pa orang-orang yang ada di dunia ini, sama deng yang Dia perna bilang dulu. Kong Dia mo kase hukuman itu tara ragu-ragu deng tara mo tunda-tunda.”

²⁹ Kong ini lagi yang nabi Yesaya bilang tentang orang Yahudi dulu, “Torang itu untung karna Tuhan Yang Paling Berkuasa itu masi sayang pa torang, kong kase biar babarapa orang dari torang pe turunan itu bisa hidup. Kalu tarada, torang samua so abis dapa hukum, sama deng yang so jadi pa orang-orang di kota Sodom deng kota Gomora.”

Banya orang Yahudi tara percaya pa Yesus Kristus

³⁰ Karna itu, torang bole bilang bagini: orang-orang yang bukang Yahudi, dorang tara berusaha supaya jadi orang yang butul pa Tuhan Allah pe muka. Tapi, biar bagitu, ada dari dorang yang percaya pa Yesus Kristus sampe Tuhan Allah biking dorang itu jadi orang yang tara sala pa Dia pe muka.

³¹ Itu beda deng orang-orang Yahudi. Dorang berusaha iko aturan di lima kitab Musa, tapi dorang tara mampo mo biking aturan itu, jadi dorang tara jadi orang yang butul pa Tuhan Allah pe muka yang dorang cari itu.

³² Bikiapa kong dorang tara jadi orang yang butul? Karna dorang tara percaya pa Yesus Kristus. Tapi dorang pikir kata, dorang bisa hidup butul kalu dorang biking barang yang bae iko aturan di lima kitab Musa. Deng dorang tara percaya pa Yesus Kristus, itu sama deng dong pe kaki mo tagate di batu kong jatu.

³³ Dorang itu lagi sama deng yang Tuhan Allah bilang di Kitab Suci bagini, “Ngoni dengar bae-bae, Kita so taru batu satu di gunung Sion, kong sapa yang tara percaya, dorang pe kaki mo tagate di batu itu kong dorang mo jatu. Tapi sapa yang percaya pa Dia, dorang itu tara akan kecewa.”