Roma 8 - Perjanjian Baru Bahasa Melayu Maluku Utara

Roh Kudus tolong pa torang supaya hidup iko Tuhan Allah pe mau

¹ Jadi, skarang Tuhan Allah so tara hukum lagi pa torang karna torang so satu hati deng Kristus Yesus.

² Barang, Roh Kudus itu suda yang biking torang bole hidup satu hati deng Yesus Kristus. Roh Kudus itu tolong pa torang supaya torang tara iko dosa pe mau lagi yang biking torang mati tapisa deng Tuhan Allah slama-lamanya.

³ Kalu torang iko aturan-aturan di lima kitab Musa, tara mungkin torang dapa slamat, karna torang ini manusia yang tara mampo biking samua aturan itu. Tapi torang bole dapa slamat karna Tuhan Allah. Tuhan Allah kase slamat pa torang deng cara Dia utus Dia pe Anak sandiri datang di dunia ini. Dia pe Anak pe badan itu, sama deng torang manusia berdosa pe badan. Kong Dia pe Anak itu mati supaya hapus torang pe dosa. Deng Dia kase Dia pe Anak mati bagitu, itu pe arti, Dia pe Anak so kase kala dosa pe kuasa.

⁴ Tuhan Allah pe maksut biking bagitu, supaya torang bole jadi orang yang tara sala pa Tuhan Allah pe muka iko deng apa yang tatulis di lima kitab Musa. Kong torang lagi bole iko yang butul karna torang so iko Roh Kudus pe mau, bukang lagi iko torang manusia pe mau yang suka biking dosa.

⁵ Orang-orang yang hidup cuma iko manusia pe mau yang suka biking dosa, dorang itu cuma pikir barang yang tara bae yang biking sanang dong pe diri sandiri, tapi kalu orang-orang yang hidup iko Roh Kudus pe mau, dorang itu cuma pikir barang yang bae yang biking Roh Kudus itu sanang.

⁶ Orang-orang yang hidup cuma iko manusia pe mau yang suka biking dosa, dorang itu nanti mo dapa hukum tapisa deng Tuhan Allah slama-lamanya. Tapi kalu orang-orang yang hidup iko Roh Kudus pe mau, dorang pe hati salalu rasa tenang. Deng dorang itu mo hidup deng Tuhan Allah slama-lamanya.

⁷ Barang, orang-orang yang hidup cuma iko manusia pe mau yang suka biking dosa, dorang itu jaga malawang pa Tuhan Allah. Dorang tara iko Tuhan Allah pe aturan, karna memang dorang tara mampo iko aturan itu.

⁸ Kong orang-orang yang hidup cuma iko manusia pe mau yang suka biking dosa, dorang itu tara mungkin biking Tuhan Allah pe hati sanang.

⁹ Tapi ngoni, ngoni so tara hidup iko manusia pe mau yang suka biking dosa itu. Ngoni so hidup iko Tuhan Allah pe Roh pe mau, kalu memang Roh itu so ada di ngoni pe hati. Tapi inga e, orang yang tara ada Yesus Kristus pe Roh di dia pe hati, dia itu bukang Yesus Kristus pe umat.

¹⁰ Kong kalu Yesus Kristus so tinggal di ngoni pe hati, biar ngoni pe badan mo mati karna dosa, tapi Roh Kudus mo kase hidup ulang pa ngoni deng Dia slama-lamanya. Ngoni bole hidup deng Dia slama-lamanya karna Tuhan Allah so biking ngoni jadi orang yang tara sala pa Dia pe muka.

¹¹ Tuhan Allah pe Roh so kase hidup ulang pa Kristus Yesus, kong Roh itu suda yang ada di ngoni pe hati. Jadi biar ngoni pe badan mo mati, tapi Tuhan Allah nanti mo kase hidup ulang pa ngoni pake kuasa dari Dia pe Roh yang ada pa ngoni itu.

¹² Sudara-sudara, Roh Kudus itu so ada di torang pe hati, jadi ada yang musti torang biking, sama deng torang itu ada utang yang musti torang bayar. Ini yang musti torang biking: torang musti hidup iko Tuhan Allah pe mau, bukang hidup iko manusia pe mau yang suka biking dosa.

¹³ Karna kalu ngoni hidup iko manusia pe mau, ngoni mo dapa hukum tapisa deng Tuhan Allah slama-lamanya. Tapi kalu ngoni hidup iko Tuhan Allah pe Roh, Tuhan Allah pe Roh akan tolong pa ngoni supaya ngoni berenti biking ngoni pe mau yang jahat, ngoni itu mo hidup deng Tuhan Allah slama-lamanya.

¹⁴ Orang-orang yang Tuhan Allah pe Roh pimpin, dorang itu suda Tuhan Allah pe ana-ana.

¹⁵ Torang tau, tong itu Tuhan Allah pe ana-ana, karna Tuhan Allah pe Roh yang Dia so kase pa torang itu, tara biking torang tako sama deng orang karja yang tako dia pe tuang. Tapi Tuhan Allah pe Roh itu so biking torang jadi Tuhan Allah pe ana-ana, sampe torang me bole pangge pa Dia itu, “Papa e, ya Bapa!”

¹⁶ Torang tau, tong ini Tuhan Allah pe ana-ana karna Dia pe Roh yang biking torang yakin pa tong pe hati.

¹⁷ Deng karna torang ini so jadi Tuhan Allah pe ana-ana, nanti tong mo dapa warisan dari Dia, itu berarti, torang ini me ada hak dari samua yang Dia so kase sadia untuk Dia pe ana-ana. Kong torang mo dapa samua itu sama-sama deng Yesus Kristus. Tapi kalu torang mau dapa itu, tong lagi musti menderita iko pa Tuhan Allah sama deng Yesus Kristus so menderita, supaya torang nanti dapa puji deng hormat sama-sama deng Dia.

Biar torang sengsara skarang tapi nanti torang akan sanang sama-sama deng Tuhan Allah

¹⁸ Kita yakin, torang pe sengsara yang torang dapa skarang di dunia ini, itu cuma kacil kalu kase banding deng sanang yang luar biasa yang nanti Tuhan Allah mo kase pa torang.

¹⁹ Karna itu, samua yang Tuhan Allah so cipta di dunia ini, ada tunggu-tunggu waktu Tuhan Allah mo kase tunju sapa Dia pe ana-ana.

²⁰ Karna dulu, dunia deng dia pe isi, Tuhan Allah so kutuk sampe so tara bagus lagi sama deng waktu pertama Tuhan Allah biking. Tuhan Allah kase hukuman bagitu bukang iko dunia pe mau tapi iko Tuhan Allah pe mau sandiri.

²¹ Dunia deng samua dia pe isi yang Tuhan Allah so kutuk, ada yang mo jadi busu, ada yang mo jadi rusak, deng ada yang mo mati. Tapi nanti Tuhan Allah mo kase bebas samua dari kutuk itu supaya tara mo jadi bagitu lagi. Sampe nanti dunia deng samua dia pe isi mo dapa rasa sanang yang luar biasa sama-sama deng Tuhan Allah pe ana-ana.

²² Torang me tau, dunia deng samua dia pe isi skarang ada mengelu karna rasa susa deng sengsara. Itu sama deng parampuang yang rasa saki sementara tunggu dia mo melahirkan.

²³ Kong bukang cuma dunia deng dia pe isi saja yang tunggu dia pe hari itu, tapi torang lagi yang so percaya ada mengelu susa deng sengsara sementara tunggu Tuhan Allah mo kase Dia pe janji pa torang yang jadi Dia pe ana-ana. Tuhan Allah so kase Dia pe Roh kamuka pa torang, kong torang tunggu-tunggu Dia mo kase badan yang baru pa torang di sorga. Badan baru itu yang tara perna mo saki deng tara perna mo mati.

²⁴ Karna waktu torang jadi percaya, kong Tuhan kase slamat pa torang, mulai waktu itu, torang yakin torang mo dapa apa yang Tuhan Allah janji. Tapi, kalu umpama torang so dapa apa yang torang tunggu-tunggu, itu berarti, torang so tara usa baharap lagi. Karna tara mungkin orang masi baharap, kalu yang dia harap itu dia so dapa.

²⁵ Jadi, kalu torang bolong dapa apa yang torang harap, torang musti tunggu deng sabar.

²⁶ Bagitu lagi Tuhan Allah pe Roh mo tolong pa torang kase kuat torang pe hati waktu torang rasa tong pe percaya tara kuat. Jadi waktu torang berdoa, torang tara tau apa yang Tuhan Allah mau supaya torang mo bilang, tapi Tuhan Allah pe Roh yang tolong pa torang untuk kase turus pa Tuhan Allah apa yang torang mo bilang pa Tuhan Allah deng cara yang torang sandiri tara mampo bilang deng kata-kata.

²⁷ Tuhan Allah yang tau skali manusia pe dalam hati. Dia me tau Dia pe Roh pe maksut. Barang, Roh itu kase turus Tuhan Allah pe umat pe doa, iko Tuhan Allah pe mau.

²⁸ Torang tau ini: sapa saja yang sayang pa Tuhan Allah deng so dapa pangge la iko Dia pe mau, apa saja yang jadi pa dorang, mo bae ka, tara bae ka, torang tau, Tuhan Allah mo biking samua itu untuk dorang pe bae.

²⁹ Karna dari dulu, Tuhan Allah so pili pa sapa saja yang Tuhan Allah tau dorang itu nanti mo percaya pa Dia. Tuhan Allah so pili pa dorang itu supaya dorang pe sifat bole sama deng Yesus Kristus, Tuhan Allah pe Anak. Jadi, dorang itu so sama deng Yesus Kristus pe sudara, kong Tuhan Allah biking Yesus Kristus jadi Anak yang tua dari samua sudara yang percaya.

³⁰ Kong dorang yang Tuhan Allah so pili dari dulu itu, Dia pangge pa dorang jadi Dia pe umat. Dorang itu, Tuhan Allah biking jadi orang yang tara sala pa Dia pe muka. Kong nanti dorang itu mo dapa puji deng hormat sama-sama deng Dia.

Tuhan Allah sayang skali pa torang

³¹ Kalu torang inga samua yang Tuhan Allah so biking untuk torang, torang musti yakin Tuhan Allah ada sama-sama deng torang. Jadi sapa yang mampo lawan pa torang? Tarada, to?

³² Dia pe Anak sandiri saja Dia tara tahang-tahang, tapi Dia kase sampe mati di kayu salib supaya tebus torang pe dosa. Karna itu, torang jadi tau, apa saja yang bae untuk torang, pasti Dia kase.

³³ Tuhan Allah so pili pa torang jadi Dia pe umat, jadi sapa yang bisa kase sala pa torang? Tarada to, barang Tuhan Allah so biking torang jadi orang yang tara sala pa Dia pe muka.

³⁴ Tarada yang bisa kase hukuman pa torang yang percaya, karna Kristus Yesus yang ada bela pa torang pa Tuhan Allah pe muka. Kristus Yesus mati supaya tebus torang pe dosa. Kong lebe dari itu lagi, skarang Dia so hidup ulang kong dudu di tampa yang terhormat, pa Tuhan Allah pe sabla kanan.

³⁵ Kong tarada satu yang bisa kase pisa pa torang dari Yesus Kristus pe sayang. Biar torang menderita, sengsara, siksa, kelaparan, tarada baju, cilaka, atau mo dapa bunu lagi, tapi Yesus Kristus tetap sayang pa torang.

³⁶ Sama deng ada tatulis di Kitab Suci bagini: “Karna torang iko pa Tuhan, tiap hari orang cari la mo bunu pa torang, dorang anggap torang sama deng domba-domba yang so siap mo dapa potong.”

³⁷ Tapi, biar torang mo dapa samua susa itu, itu tara akan bisa kase kala pa torang, mala torang lebe tamba menang karna Yesus Kristus sayang deng tolong pa torang.

³⁸ Kita yakin skali, tara ada satu yang bisa kase pisa pa torang dari Yesus Kristus pe sayang. Jadi biar torang masi hidup atau so mati, Tuhan tetap sayang pa torang. Malaekat-malaekat deng setang-setang me tarada kuasa untuk mo kase pisa pa torang dari Tuhan pe sayang. Apa saja yang mo jadi skarang atau nanti, Tuhan tetap sayang pa torang.

³⁹ Biar lagi kuasa-kuasa yang ada di langit deng di bumi atau apa saja yang ada, tara ada yang bisa biking sampe torang tapisa deng Tuhan Allah pe sayang karna apa yang Kristus Yesus, torang pe Tuhan so biking.