Roma 7 - Perjanjian Baru Bahasa Melayu Maluku Utara

Orang percaya tara perlu biking aturan di lima kitab Musa untuk dapa slamat

¹ Sudara-sudara, skarang kita bicara pa ngoni yang so tau aturan-aturan di lima kitab Musa. Ngoni pasti tau, selama torang hidup, torang iko aturan-aturan itu, tapi kalu torang so mati, torang so tara iko aturan itu lagi.

² Kita ambe conto dari aturan tentang laki bini. Parampuang yang so kawing, dia itu so jadi dia pe laki pe hukum selama dia pe laki masi hidup. Tapi kalu dia pe laki so mati, itu berarti, dia so bebas dari aturan itu.

³ Jadi kalu parampuang pe laki masi hidup, kong parampuang itu kawing ulang deng laki-laki laeng, itu berarti, parampuang itu so langgar aturan tentang laki bini deng cara baku suka deng laki-laki laeng. Tapi kalu dia pe laki so mati kong parampuang itu kawing ulang, itu berarti, dia bukang baku suka deng laki-laki laeng, karna dia so bebas dari aturan tentang laki bini itu.

⁴ Sudara-sudara, bagitu lagi yang jadi pa torang deng aturan di lima kitab Musa. Dulu, torang musti iko aturan di lima kitab Musa itu supaya torang bole dapa slamat dari dosa-dosa. Tapi Yesus Kristus so mati, kong torang yang percaya pa Dia so kase tinggal torang pe hidup yang cuma iko torang pe mau sandiri, itu sama deng torang so mati sama-sama deng Dia. Jadi skarang torang so tara usa lagi iko aturan di lima kitab Musa itu supaya mo dapa slamat. Torang so jadi Yesus Kristus punya, Dia itu yang so hidup ulang. Kong karna torang so jadi Yesus Kristus punya, torang bole biking barang yang bae untuk Tuhan Allah.

⁵ Karna waktu torang bolong percaya pa Yesus, torang pe hidup itu cuma iko manusia pe mau sandiri yang suka biking dosa. Waktu torang tau aturan di lima kitab Musa yang kase tau apa itu dosa yang torang tara bole biking, itu yang biking torang lebe tamba ingin biking dosa. Kong karna torang biking dosa itu, torang so mo dapa hukum tapisa deng Tuhan Allah slama-lamanya.

⁶ Tapi skarang torang so tara taika lagi deng aturan di lima kitab Musa. Barang torang so bebas dari aturan-aturan itu yang selama ini ika pa torang, sama deng torang pe hidup yang lama so mati sama-sama deng waktu Yesus Kristus mati. Karna itu, aturan di lima kitab Musa so tara kuasai lagi pa torang. Kong torang pe hidup bole iko Tuhan Allah pe mau deng cara yang baru, yang iko Roh Kudus pe mau, bukang lagi deng cara yang lama iko aturan yang ada tatulis di lima kitab Musa itu.

⁷ Kong, kalu gara-gara aturan di lima kitab Musa itu torang lebe tamba biking dosa, apa torang mo bilang aturan itu sala? Pasti tarada, to? Aturan di lima kitab Musa itu tara sala, mala karna aturan itu ada, kita sandiri baru tau apa itu dosa. Dia pe conto bagini: di lima kitab Musa ada aturan yang tatulis, “Tara bole ingin orang laeng pe barang.” Kita tara tau kalu ingin orang laeng pe barang itu dosa, kong kita baru tau itu dosa, karna aturan itu.

⁸ Tapi waktu kita tau aturan itu, itu mala biking kita pe hati lebe tamba ingin orang laeng pe barang. Padahal kalu aturan itu tarada, itu berarti, kita pe keinginan mo biking dosa itu tara ada.

⁹ Dulu, waktu kita bolong tau aturan di lima kitab Musa, kita pikir kita pe hidup so butul. Padahal waktu kita tau aturan di lima kitab Musa, baru kita sadar kita so biking dosa. Kong di kita pe hati, kita lebe tamba ingin skali mo biking dosa.

¹⁰ Jadi kita pantas mati kong tapisa deng Tuhan Allah slama-lamanya. Padahal, sebenarnya kalu kita biking aturan di lima kitab Musa, kita bole hidup deng Tuhan Allah slama-lamanya. Tapi waktu kita tau aturan itu, mala kita lebe tamba lagi biking dosa, sampe kita nanti mo dapa hukum kong tapisa deng Tuhan Allah slama-lamanya.

¹¹ Aturan di lima kitab Musa itu butul. Tapi deng bagitu, dosa dapa kesempatan untuk tipu pa kita, barang kita pikir kalu kita biking aturan di lima kitab Musa, kita bole dapa slamat. Tapi ternyata kita pe hati lebe tamba ingin biking dosa, dia pe ahir kabawa, kita mo dapa hukum tapisa deng Tuhan Allah slama-lamanya.

¹² Jadi, aturan-aturan di lima kitab Musa itu suci, kong samua parenta yang ada di aturan-aturan itu me butul deng bagus. Samua aturan itu dari Tuhan Allah.

¹³ Tapi jang sampe ada orang pikir, aturan yang bagus itu biking torang tapisa deng Tuhan Allah slama-lamanya. Pasti tara bagitu. Dosa yang kita jaga biking itu yang biking kita dapa hukum kong tapisa deng Tuhan Allah slama-lamanya. Sebenarnya, aturan itu bagus, tapi waktu kita tau aturan itu, kita pe hati lebe tamba ingin biking dosa, sampe kita lebe tamba biking dosa turus. Jadi deng ada aturan yang bagus itu, kita bole tau mana itu dosa, kong kita bole tau lebe jelas, dosa itu jahat.

Barang yang bae deng yang jahat baku malawang di torang pe hati

¹⁴ Torang tau, aturan di lima kitab Musa itu Tuhan Allah yang kase. Tapi kita ini cuma manusia yang suka biking dosa, itu sama deng dosa so jadi kita pe tuang.

¹⁵ Kita sandiri me bingung deng kita pe kalakuang. Kita ingin biking barang yang bae, tapi yang kita jaga biking itu cuma barang yang jahat yang kita tara suka.

¹⁶ Jadi, kalu kita biking barang yang jahat yang kita tara suka mo biking, itu berarti, kita so mangaku, aturan yang di lima kitab Musa itu bagus untuk kita biking.

¹⁷ Kalu bagitu, bukang kita pe mau biking barang yang jahat. Tapi kita biking itu, karna dosa ada kuasai kita pe hati, sampe kita cuma suka biking barang yang jahat.

¹⁸ Barang kita tau, di kita pe hati, tarada apa-apa yang bae, karna kita cuma manusia yang jaga biking dosa. Kita memang suka biking barang yang bae, tapi kita tara mampo biking itu.

¹⁹ Kita tara biking barang yang bae yang kita suka biking, mala, barang yang jahat yang kita tara suka, itu yang kita biking.

²⁰ Deng kalu kita biking barang yang kita tara suka, itu berarti, bukang kita yang pe mau biking barang yang jahat, tapi dosa yang kuasai kita pe hati sampe kita biking bagitu.

²¹ Jadi samua itu biking kita tau, biar kita ingin biking barang yang bae, tapi yang kita biking itu cuma barang yang jahat saja.

²² Karna, di kita pe hati, kita suka skali iko Tuhan Allah pe aturan.

²³ Tapi kita tara iko Tuhan Allah pe aturan itu, karna di kita pe hati ada dosa yang baku malawang deng kita pe mau untuk iko Tuhan Allah pe aturan. Itu yang biking kita pe diri susa mo bebas dari dosa pe kuasa itu.

²⁴ Ado, kasiang e kita ini! Sapa yang mo tolong pa kita supaya kita jang biking dosa? Kalu tara ada to, kita mo dapa hukum tapisa deng Tuhan Allah slama-lamanya.

²⁵ Tapi tarimakasi banya pa Tuhan Allah! Dia itu yang kase Yesus Kristus torang pe Tuhan yang biking sampe dosa pe kuasa so tara kuasai lagi pa kita. Jadi pa kita pe pikiran, kita ingin biking Tuhan Allah pe aturan, tapi di kita pe hati, kita cuma iko manusia pe mau yang suka biking dosa.