Roma 6 - Perjanjian Baru Bahasa Melayu Maluku Utara

Dosa pe kuasa so tara kuasai lagi pa torang

¹ Tuhan Allah so kase ampun pa torang, karna Dia pe bae pa torang. Tapi jang sampe ada orang yang bilang bagini, “Kalu bagitu, torang turus biking dosa saja supaya Tuhan Allah lebe tamba kase Dia pe bae pa torang.”

² Pasti tara bagitu to? Karna waktu torang percaya pa Yesus Kristus, torang deng dosa itu so tarada hubungan lagi, torang so sama deng orang yang so mati kong so tara biking dosa. Jadi torang so tara bole turus-turus biking dosa lagi.

³ Pasti ngoni tau, waktu torang dapa baptis, itu jadi tanda torang so jadi satu deng Yesus Kristus, kong torang so iko pa Dia, itu sama deng torang pe cara hidup yang lama so mati waktu Yesus Kristus mati.

⁴ Jadi deng torang dapa baptis, torang bole bilang torang so kase tinggal torang pe hidup yang cuma iko torang pe mau sandiri, itu sama deng torang so mati kong dapa kubur sama-sama deng Yesus Kristus. Karna itu, torang yang so dapa baptis, torang pe hidup skarang so beruba jadi baru, sama deng Yesus Kristus yang so hidup ulang deng kuasa yang hebat dari Tuhan Allah, torang pe Bapa.

⁵ Jadi, kalu memang torang itu so sama deng orang yang so mati sama-sama deng Yesus Kristus, torang me pasti akan hidup ulang sama-sama deng Dia.

⁶ Torang tau to, torang pe hidup lama yang suka biking dosa itu so mati sama-sama deng Yesus Kristus di kayu salib, supaya torang so tara iko lagi torang pe mau yang basar untuk mo biking dosa, itu sama deng torang so tara jadi dosa pe suru-suru lagi.

⁷ Torang sama deng orang yang so mati, karna kalu orang so mati, pasti dia so tara biking dosa lagi.

⁸ Kong, karna torang itu sama deng so mati sama-sama deng Yesus Kristus, torang me percaya lagi, torang akan hidup sama-sama deng Dia.

⁹ Torang bole percaya torang akan hidup sama-sama deng Dia karna torang tau, deng Yesus Kristus so hidup ulang, Dia so tara akan mati lagi. Kong tarada satu kuasa laeng yang bisa biking Dia mati,

¹⁰ karna Dia so mati untuk kase kala dosa pe kuasa. Dia mati itu cuma satu kali untuk slama-lamanya. Turus, skarang Dia so hidup ulang, supaya Tuhan Allah dapa puji.

¹¹ Bagitu lagi deng ngoni, ngoni musti pikir, ngoni so sama deng orang yang so mati, jadi ngoni so tarada hubungan lagi deng dosa karna ngoni so satu hati deng Kristus Yesus. Jadi skarang, dosa so tara kuasai lagi pa ngoni, tapi ngoni cuma hidup untuk Tuhan Allah.

¹² Karna itu, jang ngoni kase biar dosa kuasai pa ngoni pe hidup di dunia ini lagi, supaya ngoni tara iko keinginan yang jahat.

¹³ Deng tara bole ngoni kase biar ngoni pe tangan, kaki deng samua-samua yang ada pa ngoni pe badan untuk dosa kuasai supaya biking barang yang jahat. Tapi ngoni kase ngoni pe diri pa Tuhan Allah supaya biking barang yang butul, karna ngoni sama deng orang yang so mati, kong skarang Dia so kase pa ngoni hidup yang baru. Ngoni kase biar suda ngoni pe tangan, kaki, deng samua-samua yang ada di ngoni pe badan untuk Tuhan Allah pake supaya mo biking barang yang butul.

¹⁴ Jadi, dosa so tara bole kuasai lagi pa ngoni, barang ngoni dapa slamat bukang karna iko aturan di lima kitab Musa, tapi karna Tuhan Allah pe bae.

Torang bukang dosa pe suru-suru tapi Tuhan Allah pe suru-suru

¹⁵ Tuhan Allah kase slamat pa torang dari dosa-dosa, bukang karna torang iko aturan di lima kitab Musa, tapi karna Dia pe bae pa torang. Deng bagitu, apa skarang torang bole biking dosa turus-turus? Yang pasti tarada!

¹⁶ Ngoni tau to, kalu ngoni serakan ngoni pe diri pa satu orang untuk iko apa yang dia suru, ngoni itu so jadi dia pe suru-suru. Bagitu lagi, kalu ngoni jaga iko ngoni pe mau yang jahat, itu berarti, dosa itu so jadi tuang pa ngoni, kong dia suru-suru pa ngoni, deng bagitu ngoni mo mati kong tapisa deng Tuhan Allah slama-lamanya. Tapi kalu ngoni dengar-dengaran pa Tuhan Allah, itu berarti, ngoni so kase ngoni pe diri jadi Tuhan Allah pe suru-suru, kong Dia biking ngoni jadi orang yang tara sala pa Dia pe muka.

¹⁷ Kita bilang tarimakasi pa Tuhan Allah. Karna, biar dulu dosa jadi sama deng ngoni pe tuang, tapi skarang ngoni so butul-butul iko ajaran yang torang so kase ajar pa ngoni.

¹⁸ Jadi, skarang ngoni so bebas dari dosa pe kuasa yang jaga suru-suru pa ngoni itu. Kong ngoni so serakan ngoni pe diri jadi Tuhan Allah pe suru-suru, supaya ngoni biking turus yang butul.

¹⁹ Kita pake conto suru-suru, supaya ngoni bole capat mangarti yang kita bilang itu. Dulu, dosa so jadi ngoni pe tuang yang suru-suru pa ngoni. Ngoni so iko ngoni pe napsu sampe biking hal-hal kotor deng ngoni pe badan, deng ngoni malawang turus-turus Tuhan Allah pe parenta. Tapi skarang, ngoni musti serakan ngoni pe diri jadi Tuhan Allah pe suru-suru supaya ngoni biking turus yang butul pa Tuhan Allah pe muka. Deng bagitu, Tuhan Allah biking ngoni jadi Dia pe umat yang hidup cuma biking Dia pe mau.

²⁰ Waktu dosa masi jadi ngoni pe tuang, ngoni tara biking apa yang butul iko Tuhan Allah pe mau.

²¹ Tapi kita tanya pa ngoni e, apa dia pe untung yang ngoni dapa dari dosa yang ngoni jaga biking? Tarada, to? Mala ngoni jadi malu skarang dari apa yang ngoni jaga biking dulu itu. Apalagi dosa itu biking orang mati kong tapisa deng Tuhan Allah slama-lamanya.

²² Tapi skarang Tuhan Allah so kase bebas pa ngoni dari dosa, jadi dosa so tara jadi ngoni pe tuang lagi. Deng ngoni so serakan ngoni pe diri jadi Tuhan Allah pe suru-suru. Dia pe untung, Tuhan Allah so biking ngoni jadi Dia pe umat yang hidup cuma biking Dia pe mau. Kong dia pe ahir kabawa, ngoni mo hidup deng Tuhan Allah slama-lamanya.

²³ Karna orang yang jaga biking dosa, dia pe akibat dia mo mati kong tapisa deng Tuhan Allah slama-lamanya. Tapi Tuhan Allah kase deng cuma-cuma hidup deng Dia slama-lamanya karna torang so satu hati deng Kristus Yesus, torang pe Tuhan.