Roma 5 - Perjanjian Baru Bahasa Melayu Maluku Utara

Torang deng Tuhan Allah pe hubungan so bae-bae ulang karna Yesus Kristus

¹ Tuhan Allah so biking torang jadi orang yang tara sala pa Dia pe muka karna torang percaya pa Yesus Kristus. Jadi torang deng Tuhan Allah pe hubungan so bae-bae ulang karna apa yang torang pe Tuhan Yesus Kristus so biking.

² Kong karna apa yang Yesus Kristus so biking itu, torang dapa pintu maso untuk dapa Tuhan Allah pe bae asal torang percaya pa Yesus Kristus. Turus torang me bole sanang lagi, karna torang bisa baharap deng yakin nanti torang mo sama-sama deng Tuhan Allah dapa puji deng hormat.

³ Kong bukang cuma itu saja, torang me sanang lagi waktu torang dapa siksa, karna torang tau, siksa itu biking torang jadi batahang percaya.

⁴ Turus deng torang pe batahang percaya itu, biking torang jadi lebe kuat sampe torang tara tagoda biking dosa. Kong kalu torang so bagitu, itu biking torang lebe baharap deng yakin pa Tuhan Allah.

⁵ Kong karna torang so baharap deng yakin pa Tuhan Allah, torang tau, torang tara akan kecewa karna Tuhan Allah akan kase samua yang Dia janji. Torang so tau itu butul karna Tuhan Allah so kase Roh Kudus yang bakarja di torang pe hati sampe torang bole rasa Dia pe sayang yang basar.

⁶ Tuhan Allah pe sayang pa torang itu bagini: waktu torang tara bisa biking apa-apa la bebas dari dosa-dosa, Yesus Kristus mati untuk torang yang hidup tara iko Tuhan Allah pe mau. Yesus Kristus mati, pas di waktu yang Tuhan Allah so tentukan.

⁷ Barang, kalu cuma iko torang manusia pe biasa, tarada orang yang mau mati untuk dia pe tamang biar dia pe tamang pe hidup butul. Cuma kaapa ada orang yang mau mati untuk dia pe tamang kalu dia pe tamang itu bae-bae.

⁸ Tapi Tuhan Allah pe sayang pa torang itu tara bagitu. Waktu torang masi berdosa, Yesus Kristus mati untuk torang. Itu yang kase tunju Tuhan Allah pe sayang yang basar pa torang.

⁹ Apalagi skarang ini, Tuhan Allah so biking torang jadi orang yang tara sala pa Dia pe muka karna Yesus Kristus pe dara yang tatumpa di kayu salib, kong deng bagitu, torang yakin torang pasti slamat dari Tuhan Allah pe hukuman.

¹⁰ Karna dulu, waktu torang masi pangmalawang pa Tuhan Allah, Tuhan Allah sandiri yang kase bae-bae ulang torang pe hubungan deng Dia, deng cara Dia kase Dia pe Anak supaya mati untuk torang. Kong karna torang deng Dia pe hubungan so bae-bae ulang skarang, torang tau, torang pasti akan dapa slamat dari dosa-dosa karna Dia pe Anak so hidup ulang.

¹¹ Deng torang sanang bukang cuma karna dapa slamat saja, tapi torang sanang karna torang ada hubungan bae deng Tuhan Allah. Torang pe hubungan deng Tuhan Allah so jadi bae ulang karna Yesus Kristus torang pe Tuhan.

Adam deng Yesus Kristus

¹² Dosa itu mulai ada di dunia ini waktu Adam biking dosa. Kong gara-gara dia so biking dosa, jadi dia musti mati. Bagitu lagi yang mo jadi pa samua orang yang jadi Adam pe turunan. Karna torang samua so biking dosa, torang samua musti mati.

¹³ Waktu aturan-aturan di lima kitab Musa bolong ada, dosa itu so kamuka ada di dunia. Tapi waktu itu, kalu orang biking dosa, dosa itu bolong tahitung karna bolong ada aturan yang dorang langgar.

¹⁴ Tapi biar bagitu me, dari Adam pe jaman sampe pa nabi Musa pe jaman, samua orang pasti mati, biar lagi dorang itu tara langgar Tuhan Allah pe parenta sama deng Adam. Jadi Adam deng Yesus Kristus ada dia pe sama. Dorang dua pe hidup ada biking barang yang kase pengaru pa orang-orang.

¹⁵ Tapi hasil dari apa yang Yesus Kristus biking deng apa yang Adam biking itu baku beda skali. Kalu Adam, dia langgar Tuhan Allah pe parenta, kong dia pe akibat samua orang mati. Tapi yang Yesus Kristus biking itu, jao lebe basar lagi. Karna Yesus, Tuhan Allah kase Dia pe bae yang cuma-cuma. Deng karna Tuhan Allah pe bae yang cuma-cuma itu, samua orang bole dapa slamat dari dosa-dosa.

¹⁶ Kong Tuhan Allah pe bae yang Dia kase deng cuma-cuma pa samua orang itu, jao lebe basar dari dosa yang Adam biking. Karna waktu Adam langgar Tuhan Allah pe parenta, dia pe akibat samua orang berdosa kong Tuhan Allah mo hukum pa dorang samua. Tapi waktu samua orang so banya biking dosa, Tuhan Allah kase Dia pe bae yang cuma-cuma pa samua orang. Tuhan Allah pe bae itu, Dia mo biking orang jadi tara sala pa Dia pe muka.

¹⁷ Jadi, karna Adam so langgar Tuhan Allah pe parenta, biar dia cuma sandiri, itu biking samua orang akan mati. Tapi apa yang Yesus Kristus ada biking, jao lebe basar. Biar Dia cuma sandiri me, Tuhan Allah mo biking banya orang jadi orang yang tara sala pa Dia pe muka. Dorang dapa itu deng cuma-cuma dari Tuhan Allah karna Dia pe bae. Deng dorang itu mo hidup deng Tuhan Allah slama-lamanya kong dorang me mo berkuasa sama-sama deng Dia lagi.

¹⁸ Jadi karna Adam biking satu dosa, itu biking torang samua mo dapa hukum. Tapi karna Yesus Kristus biking satu hal yang butul, itu biking samua orang bole jadi orang yang tara sala pa Tuhan Allah pe muka, kong nanti samua orang mo hidup deng Tuhan Allah slama-lamanya.

¹⁹ Karna Adam tara iko Tuhan Allah pe mau, itu biking samua orang berdosa. Tapi karna Yesus Kristus iko Tuhan Allah pe mau, itu biking samua orang bole jadi orang yang tara sala pa Tuhan Allah pe muka.

²⁰ Tuhan Allah kase aturan di lima kitab Musa supaya manusia tau persis, dorang so paling banya biking dosa. Tapi biar manusia pe dosa tamba banya, Tuhan Allah pe bae pa manusia lebe tamba banya.

²¹ Dulu, dosa kuasai pa samua orang, jadi torang musti mati kong tapisa deng Tuhan Allah slama-lamanya. Tapi skarang, karna apa yang Yesus Kristus torang pe Tuhan so biking, Tuhan Allah kase Dia pe bae pa torang, Dia biking torang jadi orang yang tara sala pa Dia pe muka. Turus, karna Tuhan Allah pe bae itu, samua orang bole hidup deng Dia slama-lamanya.