Roma 3 - Perjanjian Baru Bahasa Melayu Maluku Utara

Tuhan Allah itu salalu butul deng tetap setia

¹ Jadi, karna orang Yahudi deng orang bukang Yahudi sama saja pa Tuhan Allah pe muka, apa dia pe untung jadi orang Yahudi? Deng, apa dia pe guna iko orang Yahudi pe aturan sunat?

² Yang pasti, banya skali dia pe untung. Yang paling penting itu, torang orang Yahudi yang kakamuka Tuhan Allah pili untuk tarima deng jaga Dia pe firman.

³ Tapi ada dari torang orang Yahudi yang tara setia pa Tuhan Allah. Kalu bagitu, apa Tuhan Allah tara mau setia lagi deng Dia pe janji?

⁴ Yang pasti tara bagitu! Biar samua orang tukang bafoya, Tuhan Allah tetap setia deng Dia pe janji. Tuhan Allah itu salalu butul sama deng yang ada tatulis di Kitab Suci, “Samua yang Tuhan Allah bilang itu butul, kong kalu ada yang mo kase sala pa Dia, Tuhan Allah pasti menang.”

⁵ Torang orang Yahudi jaga biking barang yang tara butul. Deng bagitu, banya orang lebe tau Tuhan Allah itu salalu butul. Tapi jang sampe ada yang bilang bagini, “Itu berarti, ada dia pe bae torang biking dosa. Jadi, kalu torang dapa hukum, itu pe arti, Tuhan Allah tara butul.” Kalu dorang bilang bagitu, itu cuma manusia pe pikiran saja.

⁶ Dorang pe pikiran itu sala! Karna kalu Tuhan Allah tara butul, Dia tara bisa adili dunia ini di hari kiamat.

⁷ Turus ada lagi yang bilang bagini kata, “Ternyata torang pe kalakuang yang jahat itu, biking orang lebe dapa lia Tuhan Allah itu butul sampe orang laeng lebe puji deng hormat pa Dia. Kalu bagitu, bikiapa kong Tuhan Allah musti mo hukum pa torang gara-gara torang pe dosa?”

⁸ Kalu pikiran yang macam bagitu, itu sama deng torang ada bilang bagini, “Mari suda torang biking yang jahat supaya yang bae lebe dapa lia!” Kasiang, torang to tara bole bilang bagitu. Memang ada orang yang bilang kata, torang jaga bilang macam bagitu. Dorang itu so kase tara bae torang pe nama kong dorang itu pantas dapa hukum dari Tuhan Allah.

Samua orang so biking dosa

⁹ Jadi, dari situ torang dapa tau, torang orang Yahudi tara lebe bae dari orang yang bukang Yahudi, karna tadi torang so bilang kamuka, dosa so kuasai pa samua orang, biar lagi dia itu orang Yahudi atau bukang Yahudi.

¹⁰ Sama deng yang tatulis di Kitab Suci bagini, “Tarada orang yang butul pa Tuhan Allah pe muka, biar cuma satu lagi.

¹¹ Tarada satu orang yang tau apa yang butul, deng tarada satu orang yang cari pa Tuhan Allah.

¹² Samua orang pe hati so jao dari Tuhan Allah, dorang pe hidup so tarada dia pe guna. So tarada orang yang biking barang yang bae, biar cuma satu lagi.”

¹³ “Dorang pe kata-kata pe tara bae, itu sama deng bobou busu yang kaluar dari kubur yang ada tabuka. Dorang pe mulu tukang bafoya.” “Dorang pe kata-kata jahat, sama deng ular pe bisa.”

¹⁴ “Dorang pe mulu jaga momake deng jaga bicara tara bae.”

¹⁵ “Kong dorang paling capat skali pigi bunu orang.

¹⁶ Di mana saja dorang pigi, dorang tetap biking kaco deng biking susa orang.

¹⁷ Dorang lagi so tara tau bagimana supaya hidup baku bawa bae-bae.”

¹⁸ “Kong dorang so tarada rasa tako pa Tuhan Allah.”

¹⁹ Samua tulisan itu ada di Kitab Suci. Torang so tau, aturan di lima kitab Musa itu Tuhan Allah kase supaya torang orang Yahudi iko. Jadi deng aturan itu, ada kase jelas, tarada satu orang yang bole bilang, dia itu so butul pa Tuhan Allah pe muka. Samua orang di dunia pantas dapa hukum dari Tuhan Allah.

²⁰ Barang, tarada satu orang yang jadi orang yang butul pa Tuhan Allah pe muka karna dia iko aturan-aturan di lima kitab Musa. Mala dari aturan itu, torang jadi tau, torang berdosa.

Tuhan Allah biking torang jadi orang yang tara sala pa Dia pe muka karna torang percaya

²¹ Tapi skarang, Tuhan Allah so kase tunju bagimana cara supaya torang jadi orang yang tara sala pa Dia pe muka. Kong itu bukang karna torang iko aturan yang ada di lima kitab Musa. Tapi cara itu dulu so tatulis di lima kitab Musa deng di nabi-nabi laeng pe kitab bagini,

²² torang bole jadi orang yang tara sala pa Dia pe muka karna torang percaya pa Yesus Kristus. Itu mo jadi pa samua orang yang percaya, karna Tuhan Allah tara pili-pili orang.

²³ Barang, samua orang so biking dosa, kong so tara dapa lia lagi Tuhan Allah pe kuasa yang luar biasa dalam dorang pe hidup.

²⁴ Deng karna Tuhan Allah pe bae yang Dia kase deng cuma-cuma bole biking torang jadi orang yang tara sala pa Dia pe muka, karna torang so percaya pa Kristus Yesus yang so tebus manusia pe dosa-dosa.

²⁵ Tuhan Allah utus pa Kristus Yesus di dunia ini supaya Dia mati kong Dia pe dara tatumpa di kayu salib. Tuhan Allah biking bagitu supaya Yesus dapa hukuman yang sebenarnya musti manusia yang dapa, kong deng bagitu Dia kase ampun manusia pe dosa asal dorang percaya pa Yesus. Waktu Yesus bolong mati, Tuhan Allah masi sabar deng manusia yang biking dosa. Tapi kalu Dia tara perna hukum orang yang berdosa, Dia tara adil. Jadi deng Yesus mati di kayu salib, Tuhan Allah kase tunju, Dia itu adil.

²⁶ Kong skarang karna Yesus mati untuk torang, torang dapa tau Tuhan Allah adil, deng torang lagi tau, Dia biking orang berdosa yang percaya pa Yesus jadi orang yang so tara sala lagi pa Tuhan Allah pe muka.

²⁷ Kong kalu Tuhan Allah sandiri yang biking torang jadi orang yang tara sala, torang tarada alasan untuk puji diri. Jang torang pikir Tuhan Allah anggap tong tara sala pa Dia pe muka, karna torang so iko aturan di lima kitab Musa. Tara bagitu, to? Barang, Tuhan Allah sandiri yang biking torang jadi orang yang tara sala pa Dia pe muka karna torang percaya pa Yesus.

²⁸ Jadi, ini dia pe maksut: Tuhan Allah biking torang manusia jadi orang yang tara sala pa Dia pe muka, bukang karna torang so iko aturan di lima kitab Musa, tapi karna tong so percaya pa Yesus Kristus.

²⁹ Karna Tuhan Allah itu bukang cuma orang-orang Yahudi pe Tuhan saja, Dia itu me orang-orang yang bukang Yahudi pe Tuhan lagi.

³⁰ Tuhan Allah memang cuma satu. Dia mo biking orang-orang yang so percaya pa Yesus jadi orang yang tara sala pa Dia pe muka, biar dia itu orang Yahudi atau bukang Yahudi lagi.

³¹ Tapi ada kaapa orang yang pikir, “Jadi kalu Tuhan Allah biking torang jadi orang yang tara sala karna torang percaya pa Yesus, itu pe arti, torang tara perlu mo biking lagi aturan di lima kitab Musa.” Sama skali bukang bagitu. Mala karna torang percaya, torang lebe tamba biking aturan di lima kitab Musa itu.