Roma 14 - Perjanjian Baru Bahasa Melayu Maluku Utara

Jang baku kase sala di antara orang-orang percaya

¹ Ada orang-orang yang so percaya pa Tuhan tapi dorang pe percaya bolong kuat. Dorang itu bolong talalu tau bagimana mo hidup butul pa Tuhan Allah pe muka. Ngoni musti tarima pa dorang, jang baku malawang deng dorang tentang dong pe pendapat.

² Ada conto bagini: orang yang pe percaya so kuat pa Tuhan, dorang itu so tau tarada makanang yang haram lagi. Tapi orang yang pe percaya bolong kuat pa Tuhan, dorang tako makang daging, dong cuma makang sayor saja.

³ Jadi, orang yang makang samua macam makanang, jang pandang enteng pa orang-orang yang cuma makang sayor saja, karna Tuhan Allah so tarima pa dorang. Kong orang yang cuma makang sayor, jang kase sala pa orang-orang yang bole makang samua macam makanang, karna Tuhan Allah me so tarima pa dorang.

⁴ Tuhan itu torang samua pe Tuang. Jadi torang tarada hak mo kase sala pa orang laeng pe orang karja. Cuma Tuhan saja yang ada hak untuk kase sala pa Dia pe orang karja. Deng Tuhan pasti mo tolong pa orang karja itu supaya bole hidup butul.

⁵ Ada conto laeng lagi bagini: ada orang yang pikir kata, ada hari yang lebe penting dari hari yang laeng. Ada lagi yang bilang samua hari sama saja. Tapi sebenarnya hari apa saja yang torang pili untuk semba pa Tuhan Allah, torang musti yakin, apa yang torang biking itu Tuhan Allah anggap butul.

⁶ Orang yang anggap satu hari lebe penting dari hari yang laeng, dia biking itu untuk hormati pa Tuhan. Deng orang yang makang samua macam makanang, dia makang itu, untuk hormati pa Tuhan karna dia mo bilang tarimakasi pa Tuhan Allah. Turus, orang yang cuma makang sayor saja karna pikir daging itu haram, dia makang itu untuk mo hormati pa Tuhan karna dia lagi bilang tarimakasi pa Tuhan Allah.

⁷ Torang samua musti biking bagitu, barang tarada orang dari torang yang hidup iko dia pe mau sandiri. Deng tarada orang dari torang yang akan mati iko dia pe mau sandiri.

⁸ Karna torang hidup, torang hidup untuk Tuhan, deng torang mati, torang mati untuk Tuhan. Jadi torang hidup ka mati ka, torang ini Tuhan punya.

⁹ Karna untuk itu suda, Yesus Kristus so mati kong hidup ulang, supaya Dia jadi samua orang pe Tuhan, orang-orang yang masi hidup deng orang-orang yang so mati.

¹⁰ Jadi, ngoni yang makang samua macam makanang, tara bole pandang enteng pa ngoni pe sudara yang percaya yang makang sayor saja. Bagitu lagi ngoni yang cuma makang sayor, ngoni tara bole kase sala ngoni pe sudara yang percaya yang makang samua macam makanang. Karna nanti satu waktu torang samua akan mangada pa Tuhan Allah di kursi raja untuk dapa adili.

¹¹ Sama deng ada tatulis di Kitab Suci bagini, “Kita Tuhan Allah, Kita butul-butul hidup, deng Kita bilang ini butul-butul mo jadi, samua orang nanti mo berlutut kong semba di Kita pe muka, deng samua orang mo mangaku deng dong pe mulu, Kita ini Tuhan Allah.”

¹² Jadi nanti torang masing-masing musti mangaku pa Tuhan Allah pe muka apa yang torang so biking, deng bikiapa kong torang biking itu.

Jang biking sampe torang pe sudara yang percaya jatu dalam dosa

¹³ Nanti Tuhan Allah mo adili pa torang samua, jadi jang torang baku kase sala lagi. Tapi lebe bae torang ati-ati supaya jang torang biking barang yang biking sampe torang pe sudara jatu dalam dosa!

¹⁴ Deng karna kita so satu hati deng Tuhan Yesus, kita tau deng yakin, tara ada lagi makanang yang haram pa Tuhan Allah pe muka. Tapi kalu ada orang yang pikir ada makanang yang haram, makanang itu mo jadi haram untuk dia kalu dia makang.

¹⁵ Tapi kalu ngoni makang makanang yang ngoni pe sudara yang percaya anggap haram sampe dia pe hati saki, itu berarti, ngoni tara sayang pa dia. Jadi jang ngoni makang atau minum apa-apa yang dia anggap haram, kalu gara-gara itu dia jadi berdosa, barang Yesus Kristus me mati untuk dia.

¹⁶ Karna itu, biar yang ngoni mo biking itu ngoni rasa butul, tapi kalu ngoni pe sudara yang percaya rasa itu tara bae, lebe bae jang ngoni biking itu, supaya jang ngoni pe nama jadi tara bae.

¹⁷ Karna kalu Tuhan Allah Berkuasa sebagai Raja pa torang pe hidup, yang penting itu bukang apa yang torang makang deng minum. Tapi Tuhan Allah mau torang hidup butul, baku bawa bae-bae, deng torang pe hati sanang karna Roh Kudus ada di torang pe hati.

¹⁸ Orang yang iko pa Yesus Kristus deng cara hidup macam bagitu, dia biking Tuhan Allah pe hati sanang kong orang-orang me hormati pa dia.

¹⁹ Jadi, mari suda torang salalu berusaha baku bawa bae-bae deng baku kase kuat torang samua pe percaya.

²⁰ Jang ngoni kase rusak Tuhan Allah pe karja pa orang-orang percaya pe hati cuma gara-gara makanang saja. Memang butul, so tarada lagi makanang yang Tuhan Allah larang ngoni makang. Tapi ngoni jadi sala, kalu cuma karna apa yang ngoni makang biking ngoni pe sudara jadi berdosa.

²¹ Lebe bae jang ngoni makang daging atau minum anggur atau biking apa-apa, kalu itu cuma biking ngoni pe sudara yang percaya jadi berdosa.

²² Kalu ngoni yakin apa yang ngoni makang, minum atau biking itu tara sala, biar suda ngoni simpang itu di ngoni pe dalam hati supaya cuma ngoni deng Tuhan Allah saja yang tau, tara perlu ngoni suru orang laeng iko apa yang ngoni biking itu. Kalu ngoni rasa tara sala waktu ngoni biking satu barang yang ngoni yakin itu butul, ngoni itu suda yang paling sanang.

²³ Tapi kalu ngoni pikir makang satu macam makanang itu berdosa, kong ngoni tetap makang itu, ngoni itu so jadi sala karna yang ngoni ada biking itu tara iko ngoni pe percaya. Barang, kalu yang ngoni biking itu tara iko ngoni pe percaya, itu berarti ngoni so berdosa.