Roma 13 - Perjanjian Baru Bahasa Melayu Maluku Utara

Torang yang percaya musti dengar-dengaran pa pemerinta

¹ Tiap orang musti dengar-dengaran pa pemerinta, karna Tuhan Allah sandiri yang kase kuasa pa dorang, deng karna pemerinta-pemerinta yang ada itu Tuhan Allah yang pili.

² Jadi, orang yang malawang pa pemerinta, itu sama deng dia so malawang pa apa yang Tuhan Allah so ator. Kong sapa yang biking bagitu, dia pasti mo dapa hukum.

³ Orang yang biking barang yang bae, tara usa tako dapa hukuman dari pemerinta. Cuma orang yang biking barang yang jahat saja yang musti tako dapa hukuman dari pemerinta. Jadi kalu ngoni tara mau mo dapa hukum, ngoni musti biking barang yang bae, supaya ngoni dapa puji dari pemerinta.

⁴ Karna pemerinta itu sama deng Tuhan Allah pe orang karja, dorang biking dong pe karja untuk tong pe bae. Tapi kalu yang ngoni biking itu barang yang jahat, ngoni memang musti tako, karna dorang itu ada kuasa untuk hukum orang. Pemerinta itu Tuhan Allah pe orang karja, dorang itu sama deng Tuhan Allah pe wakil yang kase Tuhan Allah pe hukuman pa orang-orang yang jaga biking barang yang jahat.

⁵ Karna itu, ngoni musti dengar-dengaran pa pemerinta. Ngoni dengar-dengaran pa dorang bukang cuma karna ngoni tako Tuhan Allah mara kong mo kase hukuman, tapi ngoni dengar-dengaran, karna ngoni so tau di ngoni pe hati, itu suda yang butul yang ngoni musti biking.

⁶ Itu dia pe sebab bikiapa sampe ngoni bayar pajak. Deng ngoni bayar pajak, ngoni biking pemerinta bole biking dong pe tugas yang Tuhan Allah so kase pa dorang.

⁷ Jadi ngoni bayar suda apa yang pantas ngoni bayar pa samua orang: ngoni musti bayar pajak, deng bayar yang laeng lagi pa pemerinta yang ada hak mo tarima itu. Deng ngoni musti dengar-dengaran kong musti hormati pa sapa saja yang pimpin pa ngoni.

Hidup baku-baku sayang

⁸ Jang ngoni bautang apa-apa pa sapa-sapa. Kacuali satu hal yang amper sama deng utang, yang ngoni musti biking turus-turus dalam ngoni pe hidup: ngoni musti baku-baku sayang satu deng yang laeng. Karna sapa saja yang sayang pa orang laeng, dia itu so biking samua aturan yang tatulis di lima kitab Musa.

⁹ Karna di lima kitab Musa itu ada tatulis bagini: ‘Jang baku suka deng orang pe laki atau orang pe bini, jang bunu orang, jang pancuri, deng jang ingin apa yang orang laeng punya.’ Torang so biking samua parenta itu kalu torang biking Tuhan Allah pe parenta satu yang bagini, “Ngoni musti sayang pa orang laeng sama deng ngoni sayang pa ngoni pe diri sandiri!”

¹⁰ Orang yang sayang pa orang laeng, tara mungkin dia biking barang yang jahat pa orang itu. Jadi orang yang sayang pa orang laeng, dia itu so biking samua Tuhan Allah pe aturan di lima kitab Musa.

So tara lama Tuhan mo datang ulang, jadi berenti suda biking barang yang jahat

¹¹ Ngoni tau Tuhan pe waktu mo datang ulang so tara lama, jadi skarang dia pe waktu ngoni biking suda apa yang kita so bilang tadi, itu sama deng ngoni bangun tidor kong biking apa yang kita so bilang itu. Karna skarang ini Tuhan pe waktu mo kase slamat pa torang so lebe dekat, tara sama deng dulu waktu torang baru pertama jadi percaya.

¹² Torang pe waktu untuk hidup di dunia ini so mo abis karna so tara lama lagi Tuhan mo datang. Itu sama deng so lewat tenga malam kong so mo amper siang. Karna itu, mari suda torang berenti biking barang yang jahat, yang biasa orang yang hidup di galap jaga biking. Deng mari suda torang kase siap tong pe diri untuk lawan samua yang tara bae, sama deng torang ada pake senjata.

¹³ Torang musti hidup deng kalakuang yang bae, kalakuang yang orang-orang jaga biking siang-siang. Jang babapesta kong mabo-mabo sampe biking hal sabarang, jang baseks sabarang, jang iko napsu sama deng binatang, jang suka bakalae deng jang suka mangiri.

¹⁴ Tapi lebe bae tiap hari torang iko cara hidup yang Yesus Kristus torang pe Tuhan so kase conto. Deng jang sama skali torang iko manusia pe mau yang suka biking dosa untuk kase puas torang pe keinginan.