Roma 11 - Perjanjian Baru Bahasa Melayu Maluku Utara

Tuhan Allah tetap sayang pa orang Israel

¹ Dari dulu Tuhan Allah so pili pa orang Israel jadi Dia pe umat, tapi banya yang so tara dengar-dengaran pa Dia. Kalu bagitu, apa Tuhan Allah mo buang pa dorang? Tarada! Karna kita sandiri me orang Israel, Abraham pe turunan dari suku Benyamin.

² Tuhan Allah tara buang Dia pe umat yang Dia so pili dari dulu. Itu jelas kalu ngoni inga Tuhan Allah pe jawaban dulu pa nabi Elia, waktu dia mengelu pa Tuhan Allah tentang orang Israel. Carita itu ada tatulis di Kitab Suci.

³ Nabi Elia bilang bagini, “Tuhan Allah, dorang so bunu pa Tuhan Allah pe nabi-nabi, yang jaga kase turus Tuhan Allah pe pasáng. Kong dorang lagi so kase ancor tampa-tampa yang torang jaga pake bakar binatang korban persembahan untuk Tuhan Allah. Tinggal kita sandiri nabi yang masi hidup, kong dorang cari lagi pa kita la mo bunu.”

⁴ Tapi ini yang Tuhan Allah bilang pa nabi Elia, “Bukang cuma ngana, tapi masi ada Kita pe umat tuju ribu orang yang Kita jaga supaya dorang setia pa Kita, yang tara perna berlutut semba pa Baal, orang pe puji-puji.”

⁵ Jadi bagitu lagi deng skarang ini, biar cuma sadiki, tetap masi ada lagi orang Yahudi yang setia. Dorang itu yang Tuhan Allah pili dari dulu karna Dia pe bae pa dorang.

⁶ Dia tara pili pa dorang karna dong pe bae. Barang, kalu Tuhan Allah pili pa dorang cuma karna dong jaga biking barang yang bae, itu berarti, Tuhan Allah tara kase Dia pe bae yang cuma-cuma pa dorang, tapi itu cuma Dia mo balas dorang pe bae.

⁷ Jadi bagini, orang-orang Israel, dorang cari jalang supaya dong jadi orang yang butul pa Tuhan Allah pe muka, tapi amper samua tara dapa. Ada yang dapa, tapi tara banya orang. Dorang itu yang Tuhan Allah so pili dari dulu. Tapi orang Israel yang laeng jadi kapala batu, dong tara mau dengar-dengaran pa Tuhan Allah.

⁸ Dorang sama deng yang so tatulis di Kitab Suci bagini, “Tuhan Allah biking dorang pe hati deng pikiran sama deng orang yang so tasono. Dia biking dorang pe mata so tara bisa lia apa-apa, deng biking dorang pe talinga so tara bisa dapa dengar. Jadi, sampe hari ini dorang tara mangarti apa yang butul.”

⁹ Raja Daud dulu me ada bilang tentang orang Israel yang kapala batu itu bagini, “Tuhan, kita minta, kase biar saja dorang sanang-sanang turus deng dorang pe pesta sampe dorang tara sadar Tuhan tara suka deng dorang pe kajahatan, kage-kage dorang so dapa hukum. Sama deng dorang so taika di dodeso, sama deng dong tagate di batu. Itu yang jadi balasan untuk dorang pe kapala batu itu.

¹⁰ Kase biar dorang tara tau apa-apa sampe dong tara tau jalang yang butul, itu sama deng dong pe mata so kabur sampe tara bisa lia apa-apa. Kong kase biar la dorang tanggung turus dong pe hukuman sampe dong rasa sengsara, sama deng orang yang ada pikul barang di balakang sampe dia bongko.”

Tuhan Allah mo kase slamat lagi pa orang yang bukang Yahudi

¹¹ Jadi bagimana deng orang Yahudi yang tara percaya pa Yesus Kristus? Apa Tuhan Allah mo buang pa dorang? Tarada! Karna biar skarang dorang tara percaya pa Yesus Kristus, tapi kalu dong beruba kong percaya pa Dia, dorang masi bole dapa slamat. Tapi karna dong pe tara percaya, itu yang biking sampe suku-suku bangsa laeng dapa kesempatan supaya percaya la dong dapa slamat. Deng bagitu, waktu orang Yahudi lia pa suku-suku bangsa laeng yang percaya kong dapa slamat, dorang jadi cemburu kong mau percaya.

¹² Jadi, orang Yahudi yang tara percaya itu yang biking sampe orang dari bangsa-bangsa laeng bole dapa berkat basar. Berkat basar itu slamat dari dosa-dosa. Jadi coba ngoni pikir, kalu nanti tamba deng samua orang Yahudi yang so bertobat kong percaya pa Yesus Kristus, pasti lebe basar lagi berkat yang Tuhan Allah mo kase.

¹³ Skarang kita mo bilang pa ngoni, sudara-sudara yang bukang Yahudi: kita ini Yesus Kristus pe utusan yang orang sebut rasul. Dia utus pa kita untuk kase tau Kabar Bae tentang Yesus Kristus pa ngoni orang-orang yang bukang Yahudi. Kong kita hargai skali kita pe pelayanan ini,

¹⁴ karna kita harap deng kita pe tugas ini, kita bisa biking kita pe sudara orang Yahudi yang satu bangsa deng kita jadi cemburu. Barang kalu dorang lia ada orang dari bangsa laeng dapa slamat, sapa tau deng bagitu, ada dari dorang yang bole percaya la dapa slamat lagi.

¹⁵ Kita pe maksut bagini, waktu Tuhan Allah tara tarima pa orang Yahudi yang tara percaya, itu kase kesempatan pa orang-orang yang bukang Yahudi supaya dorang percaya pa Yesus Kristus la jadi baku bae deng Tuhan Allah. Jadi, lebe bagus lagi kalu nanti Tuhan Allah tarima pa orang Yahudi lagi, itu sama deng dorang so mati kong hidup ulang.

¹⁶ Torang pe orang tua dulu-dulu, Abraham, Ishak deng Yakub, so jadi Tuhan Allah punya, jadi pasti torang lagi so jadi Tuhan Allah punya. Sama deng conto bagini, kalu torang orang Yahudi biking roti, tong pe biasa kase adonan yang pertama pa Tuhan Allah, itu berarti, samua adonan yang ada itu Tuhan Allah punya. Bagitu lagi kalu torang mo tanam pohong. Pasti dia pe akar yang torang mo serakan pa Tuhan Allah. Itu berarti, akar deng pohong itu satu kali so jadi Tuhan Allah punya.

¹⁷ Tapi orang Yahudi yang tara percaya pa Yesus Kristus, dorang itu sama deng cabang-cabang yang dapa potong dari pohong zaitun yang ada tanam di kobong. Kong orang yang bukang Yahudi, kalu dorang percaya pa Yesus Kristus, dong itu sama deng cabang-cabang dari pohong zaitun yang batumbu sandiri kong tuang kobong datang potong cabang-cabang itu turus kase malakat di pohong zaitun yang ada tanam di kobong itu. Deng bagitu, cabang dari pohong yang batumbu sandiri dapa hidup dari pohong yang ada tanam di kobong itu. Cabang itu sama deng ngoni orang yang bukang Yahudi, ngoni ini yang so percaya, jadi ngoni so tarima Tuhan Allah pe janji yang dulu Dia so kase pa orang Yahudi.

¹⁸ Jadi ngoni sudara-sudara yang bukang Yahudi, ngoni tara bole pandang enteng pa orang Yahudi yang Tuhan Allah tara tarima pa dorang. Dorang itu sama deng cabang yang Tuhan Allah so potong. Kalu ngoni mulai rasa pandang enteng pa dorang, ngoni musti inga, ngoni itu cuma sama deng cabang yang ada kase malakat, bukang sama deng akar. Ngoni tau to, bukang cabang yang kase hidup pa akar, tapi akar yang kase hidup pa cabang.

¹⁹ Jadi, jang ngoni bilang bagini, “Tuhan Allah suka pa torang, jadi Dia so buang pa orang Yahudi supaya bole tarima pa torang. Itu sama deng cabang-cabang dari pohong Zaitun di kobong dapa potong supaya cabang-cabang dari pohong laeng dapa kase malakat.”

²⁰ Memang, banya orang Yahudi yang Tuhan Allah so buang, itu karna dorang tara percaya. Tapi ngoni orang yang bukang Yahudi, Tuhan Allah tarima pa ngoni karna ngoni percaya pa Dia. Jadi ngoni tara bole basombong, tapi ngoni musti tako pa Tuhan Allah!

²¹ Karna biar orang Yahudi itu sama deng cabang-cabang dari pohong zaitun yang ada tanam di kobong, Tuhan Allah buang pa dorang karna dong tara percaya. Apalagi ngoni yang cuma cabang-cabang dari pohong yang batumbu sandiri, Dia pasti buang pa ngoni kalu ngoni tara percaya.

²² Dari samua yang kita so bilang tadi, torang bole tau, Tuhan Allah itu bae, deng Dia lagi tegas kalu kase hukuman. Dia mo hukum pa orang Yahudi yang tara percaya pa Dia, tapi Dia kase Dia pe bae pa ngoni orang bukang Yahudi, asal ngoni tetap percaya pa Dia. Kalu tarada, Tuhan Allah mo buang lagi pa ngoni sama deng cabang yang so potong dari dia pe pohong yang ada tanam di kobong.

²³ Kong tentang orang Yahudi yang tetap tara percaya itu, kalu dorang bertobat, dong me Tuhan Allah akan tarima ulang, sama deng Dia ada kase malakat ulang cabang itu di pohong zaitun yang ada tanam di kobong. Tuhan Allah biking bagitu, karna Dia ada kuasa.

²⁴ Ngoni orang-orang bukang Yahudi, sebenarnya tara pantas Tuhan Allah tarima, sama deng cabang-cabang dari pohong zaitun yang batumbu sandiri, tara cocok dapa kase malakat di pohong zaitun yang ada tanam di kobong. Tapi biar bagitu, Tuhan Allah tarima pa ngoni karna ngoni percaya pa Dia. Jadi lebe-lebe lagi orang Yahudi kalu dorang percaya, Tuhan Allah pasti mo tarima ulang pa dorang. Dorang itu sama deng cabang yang dapa potong dari pohong zaitun yang ada tanam di kobong itu, jadi cocok kalu kase malakat ulang di pohong zaitun yang ada tanam di kobong itu.

Tuhan Allah kasiang pa samua orang

²⁵ Sudara-sudara yang percaya yang bukang orang Yahudi, kita mo kase tau pa ngoni Tuhan Allah pe rencana yang bolong ada orang yang tau. Kita mo kase tau supaya jang ngoni baanggap diri pande. Ini Tuhan Allah pe rencana: biar skarang banya orang Yahudi tara mo percaya pa Yesus Kristus, tapi dorang tara akan bagitu turus. Dorang pe kapala batu itu cuma sampe di waktu samua orang bukang Yahudi yang Tuhan Allah so pili jadi percaya.

²⁶ Kalu orang bukang Yahudi so percaya pa Yesus Kristus, itu baru samua orang Yahudi me akan jadi percaya kong dapa slamat dari dosa-dosa. Dorang mo dapa slamat itu, barang ada tatulis di Kitab Suci bagini, “Nanti ada satu Orang yang datang kase slamat pa orang-orang, Dia datang dari gunung Sion. Dia mo hapus orang Yahudi pe kajahatan, orang Yahudi itu, Yakub pe turunan.”

²⁷ Tuhan Allah ada bilang lagi, “Ini Kita pe janji pa dorang: Kita mo kase ampun dorang pe dosa-dosa.”

²⁸ Biar bagitu me, banya dari kita pe sudara bangsa Yahudi yang tara percaya Kabar Bae tentang Yesus Kristus, karna itu dorang so jadi Tuhan Allah pe musu. Tapi karna dorang tara percaya Kabar Bae itu, biking ngoni untung, skarang Tuhan Allah so tarima pa ngoni. Cuma biar bagitu, orang-orang Yahudi tetap Tuhan Allah sayang, barang Tuhan Allah so pili pa dorang jadi Dia pe umat. Itu Dia pe janji dari dulu pa dorang pe orang tua dulu-dulu.

²⁹ Tuhan Allah masi sayang pa orang Yahudi, karna kalu Dia pili orang untuk jadi Dia pe umat deng kase yang bae pa dorang, Dia tara perna beruba pikiran.

³⁰ Dulu, ngoni orang-orang yang bukang Yahudi tara iko pa Tuhan Allah. Tapi skarang karna orang Yahudi tara dengar-dengaran pa Dia, Dia so kasiang pa ngoni sampe Dia kase bebas pa ngoni dari dosa-dosa.

³¹ Orang Yahudi jadi tara dengar-dengaran itu supaya Tuhan Allah jadi rasa kasiang pa ngoni kong kase kesempatan pa ngoni la bole bebas dari dosa-dosa. Tapi nanti satu waktu, Tuhan Allah akan rasa kasiang lagi pa dorang sama deng yang Dia so biking pa ngoni, kong dorang me bole bebas dari dosa-dosa.

³² Samua orang so tara dengar-dengaran pa Tuhan Allah. Tapi Tuhan Allah kase biar dorang bagitu supaya Dia bole kase tunju Dia pe rasa kasiang pa dorang sampe Dia kase bebas pa dorang dari dosa-dosa.

Tuhan Allah itu luar biasa

³³ Bukang maeng, pe luar biasa skali Tuhan Allah! Dia tau samua hal, deng Dia tau ator samua. Tarada satu orang yang bisa mangarti Dia pe keputusan, deng tarada orang yang tau maksut dari apa yang Dia so biking.

³⁴ Sama deng yang tatulis di Kitab Suci bagini, Tarada satu orang yang tau Tuhan Allah pe pikiran. Deng tarada satu orang yang bisa kase nasehat pa Dia.

³⁵ Tarada apa-apa yang torang bisa kase pa Tuhan Allah sampe Dia musti mo balas pa torang.

³⁶ Karna samua yang ada di dunia ini Tuhan Allah yang biking, kong samua itu Dia yang ator. Dia biking samua itu supaya Dia bole dapa puji. Jadi, mari suda torang puji deng hormat pa Dia sampe slama-lamanya! Amin.