Roma 10 - Perjanjian Baru Bahasa Melayu Maluku Utara

¹ Sudara-sudara, kita ingin skali supaya orang-orang Yahudi yang satu bangsa deng kita bole dapa slamat dari dosa-dosa. Itu yang kita minta deng butul-butul pa Tuhan Allah.

² Kita sandiri so lia, dorang memang smangat skali berusaha mo iko pa Tuhan Allah. Tapi biar dorang smangat, dorang tara mangarti cara yang butul mo iko pa Tuhan Allah.

³ Dorang tara tau dia pe cara supaya Tuhan Allah biking dorang itu jadi orang yang tara sala pa Dia pe muka. Dorang berusaha iko dorang pe cara sandiri. Dorang pikir kata, kalu dorang iko aturan-aturan di lima kitab Musa, dorang sandiri bisa jadi orang yang butul pa Tuhan Allah pe muka. Karna itu, dorang tara mau iko Tuhan Allah pe jalang la jadi orang yang tara sala pa Tuhan Allah pe muka.

⁴ Tuhan Allah pe jalang itu Yesus Kristus. Karna deng Yesus Kristus mati, orang tara usa iko aturan yang ada di lima kitab Musa lagi untuk jadi orang yang butul pa Tuhan Allah pe muka. Kalu dorang percaya pa Yesus Kristus, dorang itu mo jadi orang yang tara sala pa Tuhan Allah pe muka.

Tuhan Allah mo kase slamat pa orang-orang yang percaya pa Yesus Kristus

⁵ Dulu nabi Musa so tulis tentang orang yang mo jadi butul pa Tuhan Allah pe muka iko aturan yang ada di lima kitab Musa, dia tulis bagini, “Sapa yang biking aturan-aturan itu, dia akan hidup deng Tuhan Allah slama-lamanya.”

⁶ Tapi, ada lagi yang nabi Musa tulis yang bilang, torang bole jadi orang yang tara sala pa Tuhan Allah pe muka kalu torang percaya. Dia tulis, “Jang ngoni bilang dalam hati bagini, ‘Musti ada satu orang yang nae ka sorga.’ ” Kalu ngoni bilang bagitu, itu dia pe maksut mo bawa Yesus Kristus turung kamari dari sorga supaya kase tau cara orang dapa slamat.

⁷ Atau jang ngoni bilang, “Musti ada satu orang yang turung ka tampa orang mati.” Kalu ngoni bilang bagitu, itu dia pe maksut mo angka pa Yesus Kristus bawa kamari supaya kase tau cara orang dapa slamat.

⁸ Ngoni tara usa cari pa Yesus Kristus macam bagitu, karna di Kitab Suci so tatulis bagini, “Tuhan Allah pe kata-kata yang bawa slamat itu tara jao dari ngoni. Ngoni bole mangaku itu deng ngoni pe mulu, kong bole percaya itu di ngoni pe hati.” Tuhan Allah pe kata-kata itu yang torang jaga kase tau pa orang-orang, kata-kata itu tentang percaya pa Yesus Kristus.

⁹ Barang, kalu ngoni mangaku deng ngoni pe mulu, Yesus itu Tuhan, kong di ngoni pe hati butul-butul percaya Tuhan Allah so kase hidup ulang pa Yesus, ngoni itu mo dapa slamat dari dosa-dosa.

¹⁰ Karna kalu di ngoni pe hati ngoni percaya, Tuhan Allah mo biking ngoni jadi orang yang tara sala pa Dia pe muka. Deng kalu ngoni mangaku deng ngoni pe mulu, ngoni mo dapa slamat dari dosa-dosa.

¹¹ Di Kitab Suci ada tatulis bagini, “Sapa saja yang percaya pa Tuhan Allah, dia tara akan kecewa.”

¹² Samua orang bole dapa slamat, barang orang Yahudi deng orang yang bukang Yahudi tarada dia pe beda, karna Tuhan Allah itu samua orang pe Tuhan. Dia itu paling bae pa samua orang yang minta tolong pa Dia.

¹³ Barang di Kitab Suci ada tatulis bagini, “Sapa saja yang minta tolong pa Tuhan Allah, pasti dia mo dapa slamat.”

¹⁴ Tapi bagimana mungkin dorang bole minta tolong pa Tuhan Allah kalu dorang sandiri bolong percaya pa Dia, to? Deng dorang tara bisa percaya kalu dorang bolong dengar kabar tentang Dia, to? Dorang lagi tara bisa dengar kabar tentang Dia kalu tarada orang yang pi kase tau kabar pa dorang, to?

¹⁵ Bagitu me, tarada orang yang akan kase tau kabar tentang Dia kalu tarada yang utus pa dorang, to? Jadi sama deng di Kitab Suci ada tatulis, “Pe sanang skali dapa lia orang yang datang untuk kase tau Kabar Bae dari Tuhan Allah!”

¹⁶ Tapi tara samua orang yang dengar Kabar Bae itu jadi percaya. Barang, nabi Yesaya dulu perna tulis, “Tuhan, amper-amper tarada orang yang percaya kabar yang torang kase tau to?”

¹⁷ Jadi, orang musti dengar dulu kabar tentang Yesus Kristus, baru dorang mo percaya. Deng, dorang bisa dengar kabar tentang Yesus Kristus, kalu ada orang yang kase tau kabar itu pa dorang.

¹⁸ Banya orang Israel bolong percaya pa Yesus Kristus, tapi itu bukang karna dorang tara dengar kabar itu, to? Pasti dorang so dengar, karna di Kitab Suci ada tatulis, “Orang-orang so bawa kabar itu sampe di seluru dunia, dorang pe kata-kata so tasiar sampe pa samua orang.”

¹⁹ Atau kaapa dorang tara mangarti kabar itu? Tara mungkin. Dorang itu so mangarti kabar itu. Torang tau karna nabi Musa yang kakamuka kase tau Tuhan Allah pe bicara pa orang Israel, yang bagini, “Kita mo biking ngoni cemburu, waktu ngoni lia Kita perhatikan pa suku-suku bangsa yang bukang Kita pe umat. Kong Kita mo perhatikan pa orang-orang yang ngoni anggap bodo. Itu yang mo biking ngoni mara.”

²⁰ Kong deng barani nabi Yesaya me bilang Tuhan Allah pe pasáng tentang orang-orang yang bukang dari ngoni pe bangsa Israel, bagini, “Orang yang tara perna cari pa Kita, skarang dorang so kanal pa Kita. Pa orang-orang yang tara perna tanya pa Kita, Kita so kase tunju Kita pe diri pa dorang.”

²¹ Tapi tentang orang Israel, nabi Yesaya kase tau Tuhan Allah pe pasáng pa dorang bagini, “Siang malam Kita buka Kita pe tangan pa ngoni, supaya ngoni bale ulang pa Kita. Tapi, ngoni ini tara dengar-dengaran pa Kita, ngoni memang pangmalawang.”