Markus 5 - Perjanjian Baru Bahasa Melayu Maluku Utara

Yesus user setang pa satu orang di daera Gerasa

¹ Yesus deng Dia pe murit-murit sampe di talaga Galilea pe sabla, di orang Gerasa pe daera.

² Bagitu Yesus turung dari parau, ada orang satu yang datang dari kubur-kubur goa. Orang itu kemasukan setang.

³ Dia jaga tinggal di kubur-kubur goa itu. Dia itu kuat skali, sampe tara ada satu orang yang mampo ika pa dia biar pake rante besi.

⁴ Barang, so banya kali dia pe tangan deng kaki dong ika deng rante besi, tapi dia cuma kase putus. Jadi tarada satu orang yang bisa tahang pa dia.

⁵ Siang malam dia pe tampa cuma di kubur-kubur goa deng di bukit-bukit, kong babataria deng jaga pukul-pukul dia pe badan pake batu sampe luka-luka.

⁶ Waktu dia dapa lia pa Yesus dari jao, dia lari ka sana pa Yesus kong dia berlutut pa Yesus pe muka.

^7-8 Turus Yesus bilang pa dia, “Ee, setang! Ngana kaluar dari dia!” Kong orang itu bataria kuat-kuat, dia bilang, “Ado Yesus, Tuhan Allah yang Paling Tinggi pe Anak! Ngana mo biking apa pa kita? Demi Tuhan Allah, jang siksa pa kita!”

⁹ Yesus tanya pa setang yang ada pa orang itu, “Ngana pe nama sapa?” Setang itu jawab, “Torang pe nama Legion, barang torang ini deng ribu.”

¹⁰ Kong setang-setang yang ada pa orang itu minta ulang-ulang pa Yesus, la jang user pa dorang dari daera itu.

¹¹ Tara jao dari situ, ada babi banya skali yang sementara bacari makang di panta-panta gunung.

¹² Kong setang-setang itu bamohon pa Yesus bagini, “Suru saja pa torang maso di babi-babi itu.”

¹³ Yesus kase iko dong pe mau. Turus setang-setang itu kaluar dari orang itu, kong pigi maso di babi-babi itu. Babi-babi itu pe banya kira-kira ada dua ribu. Kong babi-babi itu lari kancang di pinggir jurang, turus balumpa samua di talaga kong mati.

¹⁴ Pe lia bagitu, orang-orang yang jaga babi-babi itu lari kong pigi carita apa yang jadi itu di kota deng di kampong-kampong di dekat situ. Pe dengar itu, orang-orang langsung datang mo lia apa yang so jadi.

¹⁵ Waktu orang-orang itu datang pa Yesus, dorang lia orang yang kemasukan itu ada dudu di situ, dia so bae kong dia so pake baju. Dapa lia dia so bae, dorang jadi tako.

¹⁶ Orang-orang yang lia samua itu, dorang carita apa yang jadi itu pa orang-orang yang baru datang itu. Dorang carita apa yang jadi pa orang yang ada kemasukan deng apa yang jadi pa babi-babi itu.

¹⁷ Pe dengar itu, orang-orang yang tinggal di daera itu bamohon la Yesus kaluar dari dorang pe daera itu.

¹⁸ Waktu Yesus sementara nae ulang di parau, orang yang kemasukan tadi itu datang, kong dia bamohon supaya dia iko pa Yesus.

¹⁹ Tapi Yesus tara mau kong Dia bilang pa orang itu, “Lebe bae ngana pulang suda di ngana pe ruma, kong kase carita pa orang-orang yang satu kampong deng ngana tentang samua yang Tuhan so biking pa ngana, deng bilang bagimana Tuhan kase tunju Dia pe rasa kasiang pa ngana.”

²⁰ Turus orang itu pigi kong mulai kase tau pa orang-orang di daera Dekapolis. Dia kase tau samua yang Yesus biking pa dia, kong dorang samua jadi herang.

Yairus pe ana hidup ulang Parampuang yang pendarahan sembu

²¹ Abis itu, Yesus deng Dia pe murit-murit nae di parau kong bale ulang di talaga Galilea pe sabla. Pe sampe di pinggir talaga itu, banya orang datang bakumpul kong kuliling pa Yesus.

²² Ada lagi satu orang yang datang, dia pe nama Yairus. Dia itu kapala di satu ruma ibada agama Yahudi. Bagitu dia dapa lia pa Yesus, dia ka sana kong berlutut pa Yesus pe muka.

²³ Yairus bamohon deng hati yang sunggu-sunggu pa Yesus, dia bilang bagini, “Bapa, tolong pa kita pe ana parampuang ka. Dia ada saki barát, amper mati. Bapa datang dulu di ruma la taru Bapa pe tangan pa dia, supaya dia sembu deng tetap hidup.”

²⁴ Pe dengar itu, Yesus pigi iko pa Yairus. Waktu dorang bajalang, orang banya iko pa Yesus sampe dorang baku-baku gepe.

²⁵ Di situ ada lagi parampuang satu, dia saki pendarahan so dua blas taong.

²⁶ Parampuang itu so ulang-ulang barobat di dokter-dokter, sampe dia pe doi me so abis, tapi dia tara sembu. Mala dia pe panyake lebe tamba para.

²⁷ Parampuang itu so perna dengar orang carita tentang Yesus. Jadi biar orang banya me, dia basusuru pa dorang pe tenga-tenga. Dia badekat pa Yesus dari balakang, kong dia sontong Yesus pe juba.

²⁸ Dia sontong Yesus pe juba karna di dia pe dalam hati dia bilang bagini, “Asal kita sontong Dia pe juba saja, pasti kita sembu.”

²⁹ Waktu dia sontong Yesus pe juba, langsung dia pe pendarahan berenti kong dia rasa dia so sembu.

³⁰ Pas dia sontong, Yesus rasa ada kuasa yang kaluar dari Dia. Turus Dia babale kong tanya pa orang-orang banya, “Sapa yang sontong Kita pe juba?”

³¹ Yesus pe murit-murit bilang, “Guru lia sandiri. Orang-orang baku-baku gepe bagini banya kong Guru tanya ‘Sapa yang sontong Kita pe juba tu?’ ”

³² Turus Yesus lia kasana-kamari, mo cari tau sapa yang sontong Dia pe juba.

³³ Parampuang itu tako skali sampe totofore, karna dia tau dia yang sontong Yesus pe juba sampe dia sembu. Jadi, dia berlutut pa Yesus pe muka kong carita samua bagimana sampe dia bisa sembu.

³⁴ Kong Yesus bilang pa parampuang itu, “Ibu, skarang ibu so sembu karna ibu percaya pa Kita. Pulang suda deng hati tenang, ibu memang so butul-butul sembu.”

³⁵ Waktu Yesus masi bicara, ada babarapa orang datang dari Yairus pe ruma. Dorang bilang pa Yairus bagini, “Bapa, bapa pe ana so mati, jadi tara usa biking pusing lagi pa Guru.”

³⁶ Tapi Yesus tara bapusing deng apa yang dorang bilang itu. Dia bilang pa Yairus, “Jang tako! Percaya saja.”

³⁷ Turus Yesus pigi pa Yairus pe ruma, tapi Dia tara kase bae banya orang iko. Dia cuma bawa pa Petrus, Yakobus deng Yakobus pe sudara Yohanes.

³⁸ Bagitu dorang sampe pa Yairus pe ruma, Yesus lia orang-orang manangis deng badodora di situ, kong itu jadi baribut.

³⁹ Pe lia itu, Yesus maso, kong Dia tanya pa orang-orang itu, “Bikiapa kong ngoni baribut deng manangis? Ana ini tara mati, dia cuma tidor.”

⁴⁰ Tapi dorang cuma kase tatawa pa Yesus. Kong Yesus suru orang-orang yang ada di situ kaluar. Abis itu, Yesus bawa ana itu pe papa, pe mama deng Yesus pe murit-murit yang sama-sama deng Yesus kong maso pa ana itu pe kamar.

⁴¹ Di dalam kamar, Yesus pegang ana itu pe tangan, kong bilang, “Talita kum,” yang pe arti, ‘Nona! Bangun suda!’

⁴² Yesus pe bilang bagitu, ana itu langsung bangun kong bajalang. Samua orang yang lia kejadian itu dong herang skali. (Ana itu pe umur so dua blas taong).

⁴³ Turus Yesus larang karas pa dorang, jang kase carita apa yang so jadi itu pa orang laeng. Abis itu, Yesus suru pa dorang kase makang pa ana itu.